15 Nëntor 2019

Infrakos kërkon ndryshimin e ligjit për hekurudha

Prishtinë, 4 tetor - Me Ligjin aktual për Hekurudhat, parashihet që vija ndërtimore të jetë 25 metra distancë nga aksi i hekurudhës.

Por, kjo distancë duket e madhe për shefin e “Infrakosit” Agron Thaçi, i cili kërkon plotësim ndryshimin e ligjit.

Edhe nëse një pronë është private, sipas ligjit aktual në Kosovë, nuk mund të ndërtohen objekte në afërsi prej 25 metrash nga hekurudhat.  Për shkak të ndërtimeve të tilla, janë ngritur padi të shumta nga “Infrakosi”.

Por, shefi i kësaj kompanie, Agron Thaçi, për Radio Kosovën ka thënë se në ligjin aktual nuk janë marrë parasysh specifikat e rajoneve të caktuara dhe për këtë arsye ai kërkon ndryshimin e këtij ligji.

“Pretendojmë që në një të ardhme të afërt të bëjmë amendamentimin përkatësisht plotësim ndryshimin e ligjit, pikërisht të merremi me këto distanca, sepse konsideroj unë dhe ne në përgjithësi si hekurudhë se gjatë hartimit të ligjit nuk janë marrë parasysh specifikat, nuk janë trajtuar sa duhet hapësirat urbane dhe jashtë-urbane. Por është marrë një shabllon prej 25 metrave që në rastin e Prizrenit, Prishtinës dhe disa komunave nuk është domosdoshmërish të respektohen, mund të jenë distanca edhe më të vogla”, thotë Thaçi.

Ai thotë se në plotësim ndryshimin e ligjit duhet pasur parasysh edhe legjislacionin e vendeve të tjera. Ndërtimet e larta që e kanë shkelur këtë ligji, janë bërë kryesisht në Komunën e Prizrenit. Pasi që rrënimi i tyre duket i vështirë, Thaçi thotë se aty do të ndërtohen mure mbrojtëse.

“Ne me mure mbrojtëse kundër zhurmës, do të barikadohemi aty, do ta shfrytëzojmë pronën tonë, do të krijojmë akces transportit dhe trenit deri në stacion pa asnjë problem. Mirëpo nuk do të jetë e përshtatshme për ata që i shfrytëzojnë ato objekte”, thotë ai.

Shefi i kompanisë që ka mision t’i rrisë dhe mirëmbajë vijat hekurudhore për operim, kërkon edhe ri-funksionalizimin e linjës Xërxe-Prizren, që mund të jetë një linjë turistike. Ai thotë se këtë çështje ia ka hapur edhe kryeministrit në detyrë, Ramush Haradinaj. E në hapësirën ku ndodhet stacioni i vjetër i trenit në Prizren, mund të zhvillohet ndonjë projekt atraktiv, ku në mes mund të qarkullojë treni nostalgjik, ashtu siç ekzistojnë nëpër disa metropole botërore.

Kalendari

Ngjarjet e datës 15 nëntor 2019 - Klinika e Neonatologjisë dhe Shoqata e Neonatologëve të Kosovës, organizojnë Konferencën e I-rë nderkombëtare. (Hotel Garden, ora 9:00)

- Policia e Kosovës në shënim të ditës botërore të përkujtimit të viktimave në trafikun rrugor, në bashkëpunim me Këshillin e Sigurisë në Trafikun Rrugor dhe me Shoqatën e Sigurimeve , do të mbaj tryezë për shënimin e kësaj dite. (Salla Orion në Prishtinë në afërsi të Kino ABC, ora 9:30)

- Ministria e Arsimit, Shkencës dhe Teknologjisë organizon tryezën dhe punëtorinë me temën “Status quo e Zhvillimit të Kërkimit dhe Inovacionit në Kosovë: Ide rreth së ardhmes së K&I në Kosovë”, mbështetur nga Projekti HERAS i cili përkrahet nga Qeveria e Austrisë. (Hotel Sirius, ora 9:30)

- Komisioni i Pavarur për Miniera dhe Minerale mban punëtorinë lidhur me “Udhëzuesin për miradministrimin e aktiviteteve minerare dhe mjedisore. (Hotel Amazona, ora 10:00)

- Programi i Kombeve të Bashkuara për Zhvillim në Kosovë, përmes projektit Interdev 2, organizon një panair me shoqatat e grave prodhuese për të shënuar Ditën Ndërkombëtare të Sipërmarrësisë së Grave. (Qendra Kulturore në Viti, ora 11:00)

- Ministria e Mbrojtjes organizon ceremoninë e certifikimit të rekrutëve të rinj të FSK-së, gjenerata e dytë 2019. (Kazerma 'Adem Jashari' në Komandën e Forcave Tokësore në Prishtinë, ora 11:00)

- Komuniteti artistik organizon takim përkujtimor për regjisoren Arzana Kraja. (Teatri Kombëtar, ora 12:00)

- Organizata ETEA dhe Kuvendi i të Rinjve të Prishtinës organizon ceremoninë e hapjes të minibibliotekës së lagjes Ulpiana. (Te fontana në lagjen Ulpiana, ora 12:00).

- Ministri i MMPH-së, Fatmir Matoshi, do të nënshkruajë gjashtë Udhëzime Administrative që avancojne fushën e kadastrës dhe regjistrimit të pronës. (Zyret e Agjencisë Kadastrale të Kosoves, ndërtesa e Arkivit të Kosovës, ora 14:00)

- Kryetari i Gjykatës Themelore në Gjilan, Ramiz Azizi, do të mbajë një konferencë për media në të cilën do të prezantohet raporti nga muaji korrik deri në muajin tetor për Gjykatën Themelore të Gjilanit, së bashku me Degët e saja. (Gjykata Themelore Gjilan, ora 14:30)

- Mbahet marsh përkujtimor në këmbë nga Lagja Arbëria, rrugës Fehmi Agani deri te Teatri Kombëtar ku do të bëhet ndezja e qirinjve në përkujtim të viktimave që kanë humbur jetën në aksidente në trafikun rrugor. (Kolegji i Shkencave të Aplikuara Teknike “Tempulli”, ora 18:00)

- Mbahet stërvitja e Kombëtares së Kosovës. (Stadiumi ‘Fadil Vokrri’, ora 18:00)

- Galeria e Ministrisë së Kulturës organizn hapjen e ekspozitës individuale të autores Lumjetë Havolli, e titulluar "Is This Me...Or i Do it For You Only!?". (Galeria e Ministrisë së Kulturës, ora 19:00)

- Qendra për Informim dhe Përmirësim Social feston hapjen e Linjës telefonike për parandalim të vetëvrasjes "Linja e Jetës" në Kosovë! (Menza Ramiz Sadiku, ora 21:00)