28 Shtator 2020

Facebook mbyll llogari në Rusi dhe Iran

New York, 13 shkurt - Gjigandi i mediave sociale Facebook mbylli dy rrjete llogarish, faqesh dhe grupesh "që merreshin me ndërhyrje të huaj ose qeveritare", njëri me origjinë nga Rusia dhe tjetri në Iran, që të dy të dyshuar për lidhje me shërbimet e inteligjencës.

Duke i quajtur veprimet e tyre "të koordinuara" dhe "joautentike", kreu i politikave të sigurisë në Facebook, Nathaniel Gleicher, tha se të dy operacionet vepronin në emër të "një qeverie ose të një aktori të huaj".

Rrjeti rus kishte në shënjestër kryesisht Ukrainën dhe vendet fqinje, ndërsa operacioni iranian përqendrua kryesisht te Shtetet e Bashkuara.

Njerëzit që qëndronin pas këtyre grupeve dhe llogarive "koordinoheshin me njëri-tjetrin dhe përdornin llogari të rreme për të fshehur identitetin e tyre dhe kjo ishte baza e veprimit tonë," tha kompania e mediave sociale Facebook.

Gjithsej, janë mbyllur 78 llogari, 11 faqe, 29 grupe dhe katër llogari në Instagram me origjinë nga Rusia.

Hetimi i kompanisë Facebook për rrjetin rus "gjeti lidhje me shërbimet e inteligjencës ruse dhe ato ushtarake".

Personat që qëndronin pas rrjeteve hiqeshin si gazetarë qytetarë dhe përpiqeshin të kontaktonin politikanë, gazetarët dhe figura të tjera publike në rajon.

Ata postonin përmbajtje në rusisht, anglisht dhe në gjuhën ukrainase "në lidhje me ngjarjet lokale dhe politike, duke përfshirë figura publike në Ukrainë, angazhimin ushtarak rus në Siri, tensionet etnike në Krime dhe rrëzimin e aeroplanit të Malajzisë në Ukrainë në vitin 2014."

Po ashtu, u mbyllën gjashtë llogari në Facebook dhe pesë në Instagram me origjinë nga Irani që merreshin me "veprimtari të koordinuar të rreme".

Disa prej tyre përpiqeshin të kontaktonin figura publike dhe ndanin postime për tema të tilla si zgjedhjet në SHBA, krishterimi, marrëdhëniet SHBA-Iran, politika amerikane e imigracionit dhe kritika ndaj politikave amerikane në Lindjen e Mesme. 

Kalendari

Ngjarjet e datës 28 Shtator 2020 - Mbahet mbledhja e Qeverisë së Kosovës. (Ndërtesa e Qeverisë, ora 8:30)

-  Mbahet mbledhja e Komisionit për Mbikëqyrjen e Agjencisë së Kosovës për Inteligjencë në të cilën do të bëhët shqyrtimi dhe plotësimi i Planit të Punës së Komisionit për sesionin vjeshtor. (Ndërtesa e Kuvendit, ora N10, ora 9:30)

-  Organizata për Rritjen e Cilësisë në Arsim organizon aksionin protestues "Kundër plagjiaturës të përbashkuar", për denoncimin e plagjiaturave të udhëheqësve të ministrive të Arsimit në Kosovë dhe në Shqipëri, ministrit Ramë Likaj dhe ministres Evis Kushi. (Rruga Radovan Zogoviq në lagjen Pejton, para Ambasadës së Shqipërisë në Kosovë, ora 10:00)

-  Mbahet mbledhja e Komisionit për Punë të Jashtme dhe Diasporë në të cilën do të bëhët shqyrtimi i Përfundimit të Kryesisë së Kuvendit dhe shqyrtimi i draft - Planit të Punës së Komisionit. (Ndërtesa e Kuvendit, salla N303, ora 10:00)

- Zëvëndësministri i Drejtësisë, njëherit Koordinatori Nacional për Mbrojtje nga Dhuna në Familje, Florian Dushi, ​mbnjë një takim koordinues në të cilën temë diskutimi do të jetë: "Trajtimi i rasteve të dhunës në familje në kohën e pandemisë". (ish-objekti i Rilindjes, kati IX, salla 914, ora 11:00)

- Komisioni Hetimor Parlamentar lidhur me procesin e privatizimit në Kosovë bën përzgjedhjen e ekspertëve të jashtëm si dhe cakton intervistat për dëshmitar. (Ndërtesa e Kuvendit, salla N302, ora 11:00)

- Vazhdimi i seancës plenare të Kuvendit në të cilën do të bëhet zgjedhja e Avokatit të Popullit. (Salla e Kuvendit, ora 12:00)

-  Komisioni Parlamentar në lidhje me menaxhimin e pandemisë së virusit COVID-I9 nga ana e Qeverisë së Republikës së Kosovës dëgjon dëshmin e dëshmitarit Beqë Cufaj  – Ambasador i Republikës së Kosovës në Gjermani. (Ndërtesa e Kuvendit, salla N204, ora 14:00)

- Mbahet paraqitja e parë e Salih Mustafës. (Salla e  gjyqit të Dhomave  të  Specializuara të Kosovës  (DHSK) në Hagë ora 15:00 - mund  të  përcillet edhe përmes transmetimit në Internet, me një vonesë të shkurtër në https://www.scp-ks.org/sq/transmetim)

- Ministri i Punëve të Brendshme, Agim Veliu, ministri i Shëndetësisë, Armend Zemaj dhe drejtori EMCDDA do të nënshkruajnë marrëveshje pune. (Objekti i Ministrisë së Punëve të Brendshme, salla P-01, ora 16:00)