21 Gusht 2019

BE ndëshkon kompaninë Google me 1.7 miliardë dollarë

Bruksel, 21 mars - Komisioni Rregullator i Bashkimit Evropian ndëshkoi kompaninë Google me një gjobë prej 1.49 miliardë eurosh ose 1.68 miliardë dollarë, për abuzim me reklamat në internet për shkak të rolit të tij dominues.

Kjo është hera e tretë që komisioni ndëshkon kompaninë Google me gjobë, pas atyre prej disa miliarda dollarësh, rezultat i dy hetimeve të veçanta ndaj gjigandit të biznesit të Silicon Valley-t.

Komisionerja e BE-së për konkurencën Margrethe Vestager, njoftoi rezultatet e hetimit afatgjatë ndaj shërbimit për reklamat që ofron Google të quajtur “AdSense”, të mërkurën gjatë një conference për shtyp në Bruksel.

“Vendimi i sotëm ka të bëjë me atë se si Google ka abuzuar me pozitën e tij dominuese për të ndaluar faqet e internetit të përdorin agjentë të tjerë përveç platformës AdSense", tha zonja Vestager.

Sipas gjetjeve të komisionit, Google dhe kompania e saj mëmë Alphabet kanë shkelur rregullat antitrust të BE-së duke imponuar klauzola kufizuese në kontratat me faqet e internetit që kanë përdorur AdSense-n, duke parandaluar konkurentët e firmës Google të vendosin reklamat e tyre në këto faqe interneti.

Google “pengoi konkurentët e tij nga mundësia për të përtërirë dhe për të konkuruar në treg falë meritave që kanë'', tha zonja Vestager.

“AdSense” është një shërbim i hershëm i Google-t që u mundëson publikueseve në faqe interneti si blogerëve, të vendosin reklama në faqet e tyre, me përmbajtje bazuar në rezultatet e kërkimit në faqet e tyre. Kompania Microsoft paraqiti një ankesë tek komisioni antitrust i BE-së në lidhje me shërbimin në vitin 2009 dhe komisioni nisi zyrtarisht hetimin në vitin 2016, megjithëse në atë kohë tha se Google kishte bërë disa ndryshime për t’u dhënë më shumë liri konsumatorëve të prekur për të publikuar reklama konkuruese.

Vitin e kaluar, komisionerja e BE-së për konkurencën Margrethe Vestager ndëshkoi kompaninë me një shifër rekord prej rreth 5 miliardë dollarësh pas një hetimi në sistemin operativ Android të kompanisë.

Në 2017 ajo vendosi ndaj Google-t një gjobë prej 2.42 miliardë eurosh ose rreth 3 miliardë dollarë, në një rast që lidhej me kërkimet për blerjet në internet.

Kalendari

Ngjarjet e datës 21 gusht 2019 - Vazhdon greva e punëtoreve të Sindikatës së Pavarur të Punëtorëve në Aeroportin Ndërkombëtar të Prishtinës “ Adem Jashari”. (Aeroporti i Prishtinës, ora 8:00)

- Kryetari i Komunës së Prizrenit Mytaher Haskuka dhe drejtori i Drejtorisë për Punë dhe Mirëqenie Sociale Fejzë Kabashi do të vizitojnë disa shtëpi të cilat po ndërtohen në kuadër të projektit “Ndërtimi i shtëpive për familjet skamnore”. (Lagjja “Bajram Curri” e më pas do të vizitohen edhe disa shtëpi në fshatin Zhur. (Nisja do të bëhet nga Shtëpia e Bardhë, ora 9:45)

- Në kuadër të Etnofestit mbahet punëtoria kreative dhe instalacione me atelje te pikëtorëve dhe skulptorëve. (Ambientet e Etnofestit në fshatin Kukaj, ora 10:00)

- Ministri në detyrë i Inovacionit dhe Ndërmarrësisë, Muzafer Shala dhe kryetari i Komunës së Shtimes, Naim Ismajli, do të nënshkruajnë memorandum të bashkëpunimit për rregullimin e objektit Mulitifunksional Inovativ në Shtime. (Objekti i Ministrisë së Punëve të Jashtme kati i 3-të, ora 10:00)

- Mbahet mbledhjen e rregullt të Komitetit për Politikë dhe Financa e Komunës së Mitrovicës. (Salla e mediave të Komunës së Mitrovicës, ora 10:00)

- Komisioni Hetimor Parlamentar në lidhje me gjendjen në PTK dhe Vala miraton draft raportin e punës së Komisionit Hetimor Parlamentar në lidhje me gjendjen në PTK dhe Vala. (Ndërtesa e Kuvendit, salla N 303, ora 11:00)

- Kryetari i komunës së Deçanit, Bashkim Ramosaj, pret në vizitë  Ministrin e Arsimit, Shkencës dhe Teknologjisë Shyqiri Bytyqi. (Zyra e Kryetarit të Komunës së Deçanit, ora 11:00)

- Fillojnë punimet në rrugën Budisalc-Zllakuqan i Klinës. (Pranë përmendores së Kolë Mirditës në Zllakuqan, ora 11:00)

- Komuna e Vushtrrisë mban mbledhje komemorative për veteranin e arsimit dhe UÇK-së, si dhe ish drejtorin e arsimit në Komunën e Vushtrrisë, Behxhet Jashari. (Salla e Kuvendit të Komunës së Vushtrrisë, ora 11:30)

-  Kryetari i Komunës së Prishtinës, Shpend Ahmeti dhe Nënkryetari Muhedin Nushi do të mbajnë konferencë për media. (Objekti i vjetër të Komunës, ora 11:30)

- Kryetari i komunës së Deçanit, Bashkim Ramosaj dhe Ministri i Arsimit, Shkencës dhe Teknologjisë Shyqiri Bytyqi vëjn gurethemelin e shkollës fillore “Heronjtë e Dukagjinit” në Gllogjan. (Gllogjan, ora 11:30)

- Kryetari i komunës së Deçanit, Bashkim Ramosaj dhe Ministri i Arsimit, Shkencës dhe Teknologjisë Shyqiri Bytyqi inspektojn punimet në objektin përcjellës të Shkollës Fillore “Isa Boletini” në Isniq. (Isniq, ora 12:00)

- Agjencia Kosovare e Privatizimit mban ceremoninë e hapjes së ofertave të shitjeve përmes Likuidimit nr.49. në të cilën janë 132 asete. (Hoteli Grand, ora 12:30)

- Kryeministri në detyrë Ramush Haradinaj pret në takim një delegacion prej 60 studentësh të programit Akademia Verore, nga shtete të ndryshme të botës. (Ndërtesa e Qeverisë, ora 12:30)

- Në kuadër të Etnofestit mbahet zona e debatit për shtëpin tradicionale dhe familjen e madhe shqiptare. (Shtëpia e vjetër në Fshatin Kukaj, ora 17:00)

- Komuna e Prizrenit në kuadër të hartimit të buxhetit për vitin 2020 do të organizojë dëgjime publike me me banorët e e rajonit të Zhupës dhe Podgorës me qëllim të angazhimit të tyre në procesin e hartimit të buxhetit, transparencës, gjithëpërfshirjes dhe llogaridhënies ndaj qytetarëve. (Shtëpia e Kulturës në Reçanë, ora 19:00)