17 Shkurt 2019

Presidenti Thaçi ia dorëzoi ekipit olimpik në mënyrë solemne Flamurin e Kosovës

Prishtinë, 5 shkurt - Presidenti i Republikës së Kosovës, Hashim Thaçi, ia dorëzoi sot ekipit olimpik në mënyrë solemne Flamurin e Kosovës, i cili do të marrë pjesë në lojërat olimpike dimërore “PyeongChang 2018”, që do të mbahen në Korenë Jugore.

Ai tha se është sot një moment i veçantë për Kosovë, ngase për herë të parë në histori po merr pjesë në Lojërat Olimpike Dimërore.

 “Edhe për mua si president i vendit, edhe për shtetin, edhe për shoqërinë kosovare, por është lajm edhe për gjithë botën pjesëmarrja e Kosovës për herë të parë në garat olimpike dimërore në Kore. Shpresoj që nuk do të jetë lajm vetëm pjesëmarrja, por do të kemi edhe lajm të fuqishëm fitimin e ndonjë medalje”, theksoi presidenti Thaçi.

Ai më tej tha se “kemi besim të plotë në përkushtimin, kreativitetin, dhe talentin e Albinit, i cili do të na bëjë të ndihemi krenar të gjithëve si Majlinda më herët, dhe tash Albini”, duke shtuar tutje se të gjithë do jemi të orientuar, fokusuar dhe në mbështetje të fuqishme për Albinin, për suksesin e tij.

Në fund presidenti Thaçi, duke uruar për sukseset më të mira, tha “Më lejoni që si president i vendit t’ia dorëzoj edhe kryetarit të Komitetit Olimpik, gjithë ekipës, Flamurin e Republikës të Kosovës shtetit tonë, që do të ngritet në Kore për herë të parë e ritheksoj në lojërat olimpike dimërore, por është edhe moment tjetër i veçantë sepse e tëra kjo histori po ndodhë me rastin e 10 vjetorit të pavarësisë, në 20 vjetorin e betejës së Ushtrisë Çlirimtare të Kosovës në Prekaz, dhe në 19 vjetorin e lirisë së Kosovës”.

Ndërsa, Besim Hasani kryetar i Komitetit Olimpik, falënderoi presidentin Thaçi për dorëzimin e Flamurit, duke shprehur besimin e tij se kjo do të ndikoj në motivacionin e Albinit.

“Dorëzimi i flamurit te Ekipi Olimpik, jam i sigurt se do të ndikojë në rritjen e motivacionit të Albinit, i cili është i përgatitur jashtëzakonisht mirë dhe asnjë dilemë se ka pas që t’i mbrojë ngjyrat e Republikës së Kosovës”.

Ai shprehur falënderimin e tij për presidentin Thaçi, për mbështetjen e vazhdueshme për sportin.

“Unë sinqerisht dëshiroj të ju falënderoj për mbështetjen e përhershme të sportit, për pjesëmarrjen tuaj në Rio dhe përpjekjet tuaja përkundër agjendës së vështire që të jeni edhe në PyeongChang”, shtoi ai.

Sipas Hasanit, mbështetja e Presidentit do e rrisë jo vetëm motivacionin e Albinit, por të gjithë delegacionit që do të jemi atje, por e di dhe jam shumë i sigurt se do të rritet imazhi i shtetit të Kosovës.

 “Ju jeni i ftuar edhe nga presidenti Thomas Bach për të qenë atje dhe keni ftesën speciale dhe ne kishim qenë shumë të lumtur nëse ju arrini që përkundër agjendës së vështire që të jeni në PyeongChang”, tha Besim Hasani.

Ndërkaq, skijatori Albin Tahiri  i cili do të përfaqësoi Kosovën në “PyeongChang” është shprehur i lumtur që do të përfaqësoi Kosovën në Lojarat Polimike në Kore të Jugut.

“President do të ndiheni krenar”, shtoi Albin Tahiri.

Në fund, presidenti Thaçi tha se pjesëmarrja e Albinit në Olimpiadë dhe flamurit të Kosovës do të forcojë shtetin tonë.

 

Kalendari

Ngjarjet e datës 17 shkurt 2019 - Qeveria e Kosovës mban mbledhje festive për nder të 11-vjetorit të Pavarësisë. (Ndërtesa e Qeverisë, ora 8:00)

- Ngritja solemne e Flamurit të Republikës së Kosovës për nder të 11-vjetorit të Pavarësisë në të cilën marrin pjesë presidenti Hashim Thaçi, kreu i Kuvendit, Kadri Veseli dhe kryeministri Ramush Haradinaj. (Hapësira mes ndërtesës së Kuvendit dhe Qeverisë, ora 8:30) 

- Presidenti Thaçi, kryeparlamentari Veseli dhe kryeministri Haradinaj vendosin kurora lulesh te shtatorja e ish-presidentit Ibrahim Rugova. (Sheshi “Ibrahim Rugova”, para Kuvendit, ora 8:45) 

- Presidenti Thaçi, kryeparlamentari Veseli dhe kryeministri Haradinaj vendosin kurora lulesh në Kompleksin Memorial “Adem Jashari” në Prekaz. (Prekaz, ora 9:40)

- Në 11 vjetorin e shpalljes së pavarësisë të Kosovës, anëtarë të kryesisë së LDK-së bashkë më struktura të saj, bëjnë homazhe te varri i Presidentit Historik të Kosovës, Dr. Ibrahim Rugova. (Velani, ora 10:00)

- Komuna e Gjilanit organizon homazhe  te varrezat e dëshmorëve. (Gjilan, ora 10:00)

- Federata e Ping-Pongut e Kosovës (FPPK) organizon turneun “Dita e Pavarësisë”.  (ShMU “Tefik Çanga”, Ferizaj, ora 10:00)

- “Star Kids” do të performojnë në sheshin “Skënderbeu” për nder të Pavarësisë. (Sheshi “Skënderbeu” në Prishtinë, ora 10:00)

- Kuvendi i Kosovës mban seancë solemne për nder të 11-vjetorit të Pavarësisë. (Kuvendi i Kosovës, ora 10:45) 

- Komuna e Gjilanit organizon akademi solemne dhe program artistik nga Shkolla e Muzikës në Gjilan. (Teatri i Qytetit, ora 11:00)

- Trupat e Forcës së Sigurisë së Kosovë parakalojnë me rastin e 11-vjetorit të Pavarësisë së Kosovës. (Prej Sheshit “Nënë Tereza” deri te Sheshi “Ibrahim Rugova”, ora 12:20)

- Me rastin e 11-vjetorit të Pavarësisë së Kosovës organizohet koktej për të gjithë të ftuarit në Parakalimin e Trupave të FSK-së. (Hotel “Swiss Diamond”, ora 13:00)

- Dega e Lidhjes Demokratike të Kosovë në Gjilan bën përurimin e bustit të ish-presidentit Ibrahim Rugova (Gjilan, ora 13:00)

- Përfaqësues të organizatave studentore organizojnë një “protestë artistike” në lidhje me vonesën e liberalizimit për qytetarët e Kosovës. (Sheshi “Zahir Pajaziti”, ora 13:00) 

- Komuna e Vushtrrisë organizon manifestimin qendror për shënimin e 11-vjetorit të Pavarësisë. (Kalaja e Qytetit, Vushtrri, ora 13:00)

- Kryeministri Ramush Haradinaj pret në takim deputetët nga Mbretëria e Bashkuar, John Grogan dhe Martin Vickers. (Ndërtesa e Qeverisë, ora 14:00)

- Shoqata e Gastronomëve të Prishtinës, në bashkëpunim me Qeverinë e Kosovës, organizon një event simbolik për Pavarësi. (Sheshi “Skënderbeu”, ora 14:00) 

- Kryetari i Kuvendit të Kosovës, Kadri Veseli, dhe ministri i Kulturë, Rinisë dhe Sportit, Kujtim Gashi, përurojnë Palestrën Sportive në Shtime. (Shtime, ora 15:00)

- Kryeministri Ramush Haradinaj pret në takim delegacionin 17-anëtarësh nga Shtetet  e Bashkuara të Amerikës, të kryesuar nga Senatori James Inhofe. (Ndërtesa e Qeverisë, ora 15:00) 

- Komuna e Lipjanit organizon koncert festiv për 11-Vjetorin e Pavarësisë. (Qendra e Kulturës “Tahir Sinani”, Lipjan, ora 15:00)

- Ansambli Kombëtar i Këngëve dhe Valleve “Shota” mban koncert festiv për Pavarësi. (Sheshi “Zahir Pajaziti”, Prishtinë, 18:00)

- Për 11-vjetorin e Pavarësisë së Kosovës bëhet ndezja e organizuar e fishekzjarrëve. (Sheshi “Zahir Pajaziti”, Prishtinë, ora 18:30)

- Me rastin e 11-vjetorit të Pavarësisë së Kosovës organizohet pritja shtetërore nën përkujdesjen kryeministrit Ramush Haradinaj. (Hotel “Venus”, magjistralja Prishtinë-Ferizaj, ora 19:30)

- Mbahet koncerti festiv për nder të 11-vjetorit të Pavarësisë së Kosovës. (Sheshi “Zahir Pajaziti”, Prishtinë, ora 20:00)