18 Janar 2018

Mbështetja e MKRS-së për xhudon kosovare do të rritet edhe më tej

Prishtinë, 12 shtator - Ministri i Kulturës, Rinisë dhe Sportit, Kujtim Gashi, ka pritur në takim njohës drejtuesit e Federatës së Xhudos së Kosovës, të prirë nga kryetari Agron Kuka, nënkryetarin Memli Krasniqi, përzgjedhësin e Përfaqësueses së Kosovës në xhudo, Driton Kuka dhe kampionen olimpike Majlinda Kelmendi.

Kryetari i FXHK-së, Agron Kuka, e uroi ministrin Gashi për marrjen e detyrës së re duke i dëshiruar që të përmbushin objektivat dhe programin e paraparë.

Ai e informoi ministrin për punën që po bën Federata e Xhudos, të arriturat dhe përgatitjet që janë duke bërë për garat në të ardhmen, me theks për pjesëmarrje në lojërat olimpike që do të mbahen në Tokio 2020.

Kuka tha se kemi 25 xhudistë elitarë të nivelit botëror. Ai përmendi edhe vështirësitë me të cilat përballen, ndër to është edhe çështja e realizimit të obligimeve nga ana e MKRS-së.

Kryetari Kuka u shpreh se vlerëson punën dhe bashkëpunimin e deritashëm me MKRS-në, duke shtuar se pa mbështetjen e MKRS-së nuk do t’i arrinim rezultatet e deritashme në sportin e xhudos.

Ndërkaq, kampionia olimpike, Majlinda Kelmendi, e uroi ministrin për marrjen e detyrës duke i dëshiruar mbarëvajtje në mandatin dhe punën që e pret përpara, duke shpresuar që mbështetja e MKRS-së për të dhe për FXHK-në nuk do të mungojë.

Nga ana e tij, ministri Gashi theksoi se është dita e parë e punës dhe se është i privilegjuar që ndër takimet e para po e zhvillon me krenarinë e Kosovës, Majlinda Kelmendi dhe drejtuesit e federatës së suksesshme të FXHK-së, duke u zotuar se mbështetja e MKRS-së për xhudon kosovare nuk do të ndërpritet, veçse do të rritet edhe më tej.

Ai u shpreh se është i informuar për disa obligime të mbetura nga ana e MKRS-së në drejtim të FXHK-së por edhe të Majlindës dhe se ato shumë shpejtë do të përmbushen.

Ministri shprehu gatishmërinë për të bashkëpunuar me drejtuesit e xhudos me qëllim që rruga dhe tradita e rezultateve në këtë sport të vazhdojë edhe më tej.

Ai ka theksuar se është i hapur për kërkesat dhe idetë që do të vijnë prej Federatës së Xhudos.

“Tashmë janë bërë disa përmirësime në infrastrukturën ligjore sikurse që është rregullorja për kategorizim, e cila do të na e lehtësojë punën edhe ne si ministri, por edhe federatat e sportistët do të përkrahen në bazë të meritave”, tha ministri Gashi.

Kalendari

Ngjarjet e datës 18 Janar 2018 - Ministri i Arsimit,Shkencës dhe Teknologjisë, Shyqiri Bytyqi do të zhvilloi një takim me kryetarin e komunës Gazmend Muhaxheri. (Rezidenca e kryetarit Muhaxheri në Pejë, ora 9:30)

- Mbahet mbledhja e Kuvendit Komunal të Prishtinës, ku do të formohet Komiteti për Politikë dhe Financa si dhe do të caktohen anëtarët e komisioneve të aksionarëve nëpër ndërmarrjet publike komunale. (Objekti i Komunës, ora 10:00)

- Demokracia Plus në bashkëpunim me CoDe organizon tryezën me temë “Roli i Grupeve Jo formale të Grave në Politik Bërje – Shkëmbimi i përvojave në mes të grupeve jo formale të grave në nivel lokal dhe institucioneve qendrore”. (Hotel Sirius, ora 10:00)

- Koalicioni i OJQ–ve për Mbrojtjen e Fëmijëve në Kosovë - KOMF organizon konferencën e lançimit kombëtar të Indeksit për Mbrojtjen e Fëmijës 2.0. (Hotel Sirius, ora 10:00)

- Hapen punimet e punëtorisë me temë  “ Profilizimi i mësimdhënësve të klasave  I -V ”,  të organizuar nga MAShT dhe ku do të jenë të pranishëm drejtorët e Drejtorive Komunale të Arsimit në rajonin e Pejës  si dhe të gjithë drejtorët e Sh.F.M.U-ve së bashku me dy mësimdhënës të klasave  I –V dhe nga një mësimdhënës i shkollave të fshatrave. (Shkolla fillore “Shaban Spahija “ në Pejë, ora 10:00)

- Ministri i Infsrastrukturës, Pal Lekaj, do të zhvillojë vizitë inspektuese në Autostradën “Arbën Xhaferi”. (Autostrada në fshatin Doganaj, ora 10:30)

- Në kuadër të lansimit të programit Zhvillim Rajonal, Ministria për Zhvillim Rajonal,  nesër më 18 janar, 2018,  nga ora 13:30, organizon takimin me kryetarët e Komunave të Republikës së Kosovës me qëllim të informimit të komunave lidhur me këtë programin për Zhvillim Rajonal dhe mundësit e zhvillimit socio- ekonomik rajonal. (Ndërtesa e Qeverisë, salla e takimeve P-38 në, ora 13:30) 

- Mbahet mbledhja për themelimin e komisionit për bashkëpunim ndërkombëtar dhe kordinim vendor në fushën e Shkencës së Astronomisë në kuadër të Asociacionit për Mbështetjen e Arsimit dhe Aftësimit Profesional të Republikës së Kosovës. (Ministria e Arsimit, Shkencës dhe Teknologjisë, ora 15:00)