13 Nëntor 2019

SHBA do të mbështesë Kosovën për parandalimin e trafikimit me njerëz

Prishtinë, 18 tetor - Në Ditën e Bashkimit Evropian Kundër Trafikimit me Njerëz dhe njëkohësisht hapjes së fushatës Kundër Trafikimit me Njerëz, Ministria e Punëve të Brendshme ka organizuar konferencë për media.

Në këtë ceremoni, ministri i Punëve të Brendshme, z. Ekrem Mustafa tha se Autoriteti Kombëtar Anti-trafikim ka bërë një punë domethënëse në luftimin e kësaj dukurie negative.

“Ka qenë një vit mjaft i suksesshëm në luftimin e trafikimit me njerëz, prandaj falënderoj të gjithë ata që kontribuan në këtë drejtim”, tha ministri Mustafa.

Duke theksuar se moto e kësaj fushate është “Mos hesht”, ministri Mustafa ftoi të gjithë qytetarët që të bashkëpunojnë dhe të ndihmojnë organet shtetërore.

Zyrtari për të drejtat e Njeriut pranë Ambasadës së Shteteve të Bashkuara të Amerikës, z. John Bush, theksoi se raporti i Departamentit të Shtetit Kundër Trafikimit më Njerëz ka njohur progresin e Kosovës në parandalimin dhe ndjekjen penale të trafikimit me njerëz dhe mbrojtjen e viktimave.

Ai tha se SHBA do të vazhdojë të mbështesë përpjekjet e Kosovës për ndjekjen penale  dhe parandalimin e këtij krimi.

“Ne besojmë se përpjekjet tona të përbashkëta reflektojnë angazhimin tonë të ndërsjellë për të drejtat e njeriut dhe forcimin e sundimit të ligjit në Kosovë, në mënyrë që të sjellë drejtësi dhe prosperitet për njerëzit dhe rajonin”, tha Bush.

Fushata Kundër Trafikimit me Njerëz do të zgjasë një muaj dhe synon ngritjen e vetëdijes së qytetarëve dhe fuqizimin e  ndërgjegjësimit mbi këtë fenomen. 

Me anë të kësaj fushate MPB synon që të bëhet fuqizimi i mekanizmave për parandalim, identifikim dhe luftim të trafikimit, të bëhet ngritja e efikasitetit në zbulimin dhe ndjekjen e trafikantëve si dhe të bëhet fuqizimi i bashkëpunimit vendor dhe ndërkombëtar për një partneritet të fuqizuar ndaj trafikimit me njerëz.
 

Kalendari

Ngjarjet e datës 13 nëntor 2019

- Save the Children në bashkëpunim me Minstrinë e Arsimit dhe Institutin Pedagogjik organizojnë konferencën ndërkombëtare ‘Fuqizimi i Kujdesit, Zhvillimit dhe Edukimit në Fëmijërinë e Hershme’ që ka për qëllim të ofrojë mundësi për hartuesit e politikave, ofruesit e shërbimeve, përfaqësuesit nga akademia dhe akterë të tjerë, për t’u informuar dhe ndarë praktikat më të mira mbi rëndësinë e investimeve në kujdesin dhe zhvillimin e fëmijërisë së hershme. (Hotel Sirius, ora 9:30)

- Instituti Demokratik i Kosovës organizon tryezën e diskutimit lidhur me dy projekte të mëdha të Ministrisë së Infrastrukturës siç janë, rehabilitimi i rrugës Prishtinë - Pejë dhe Prishtinë - Mitrovicë ku edhe do të bëhet edhe publikimi i hulumtimit mbi arsyet e vonesave në punime në këto dy rrugë, i titulluar “Rrugë pa fund”. (Hotel Sirius, ora 10:00)

- Organizata "Voice of Roma, Ashkali and Egyptians" VoRAE organizon Festivalin Multikulturorë i pari i këtij lloji në Kosovë. (Hotel Emerald, ora 10:00)

- Grupi për Studime Juridike dhe Politike organizon tryezën e diskutimit me temë “Roli i vendimeve të Gjykatës Supreme në luftën kundër krimit dhe korrupsionit: Një thirrje për disiplinim të gjyqtarëve që marrin vendime të kundërligjshme”. (Qendra e konferencave Orion, ora 10:30)

- Në kuadër të fushatës “Jo drogë tek të rinjtë”, Task Forca Anti Drogë tek të rinjtë dhe siguri në Shkolla do të organizoj pritje për student, ku do të shfaqin prezantimet me njohurit e tyre lidhur me narkotikët, si dhe do të bashkëbisedojnë me Shefin e Task Forcës Anti Drogë. (Ndërtesa e Qeverisë, salla P38, ora 11:00) 

- Drejtori i Drejtorisë së Shëndetësisë në Komunën e Prizrenti, Visar Shehu, do të mbajë konferencë për shtyp për ta njoftuar opinionin publik me më të rejat nga fusha e shëndetësisë. (Zyret e Shërbimit Urgjent, rruga Tirana në Prizren, ora 11:00)

- Ambasada e Francës në Kosovë mban konferencë për media në të cilën do të prezantojë edicionin e 19 - të Festivalit të Filmit Frankofon në Kosovë i cili organizohet në bashkëpunim me përfaqësitë diplomatike të Zvicrës, Belgjikës dhe Luksemburgut, Aleancën Franceze, Ministrinë e Punëve të Jashtme, si dhe Ministrinë e Kulturës, Rinisë dhe Sportit të Kosovës. (Salla e konferencave në Ministrinë e Punëve të Jashtme, ora 12:00)

- Teatri i Qytetit te Mitrovicës "Muharrem Qena" shfaq premierën teatrore “Kur treni vonohet”, me autor Osman Goranci dhe me regji të Artan Tmavës. (Qendra e Kulturës “Rexhep Mitrovica”, ora 19:00)