10 Dhjetor 2018

Kryeministri Haradinaj: E meritojmë të anëtarësohemi sa më shpejt në NATO

Prishtinë, 14 nëntor - Kryeministri i Republikës së Kosovës, Ramush Haradinaj mori pjesë në konferencën ndërkombëtare “NATO dhe Ballkani Perëndimor – Dinamikat regjionale në periudhën e sfidave globale të sigurisë”, e cila u organizua nga Ministria e Punëve të Jashtme e Republikës së Kosovës dhe Qendra Kosovare për Studime të Sigurisë.

Me këtë rast Kryeministri Haradinaj theksoi rolin e Kosovës në krijimin e sigurisë rajonale dhe bashkëpunimin e ndërsjellë që ka me të gjitha shtetet veç e veç.

Kosova nuk duhet të jetë vetëm konsumuese e sigurisë, por të kontribuojë për sigurinë dhe paqen në botë, ka thënë kryeministri Haradinaj.

Fjala e plotë e Kryeministrit Haradinaj në konferencë:

Të nderuar pjesëmarrës,

Dinamikat rajonale, në kohën që ne jetojmë, kanë ndikim vendimtar në sigurinë nacionale të shteteve veç e veç, e sidomos në Ballkan. Siguria kërkon një parametër dhe ajo është respekti, shtetet duhet ta respektojnë njëri-tjetrin. Nëse mungon respekti i ndërsjellë shumë parametra tjerë e humbin peshën e vet.

E kemi të qartë se asnjë shtet nuk është i vetëmjaftueshëm për sigurinë nacionale. Asnjëri nga ne nuk mjafton për ta siguruar vetveten, për këtë na duhet bashkëpunimi ndërshtetëror sa më i gjerë dhe, ne si Kosovë jemi të gatshëm dhe dëshirojmë bashkëpunim të ndërsjellë.

Sfidat dhe kërcënimet e sigurisë tash i kalojnë kufijtë e shteteve, edhe të shtetit tonë. Sfidat që ne i veçojmë janë terrorizmi global, ndërhyrja e Rusisë në Ballkan, kryesisht përmes luftës informative, krimi i organizuar ndërkombëtar, rreziku kibernetik, rreziqet sociale dhe ekonomike dhe rreziqet e stabilitetit rajonal.

Për këtë na duhen iniciativa të përbashkëta për t’u përballur me këto sfida dhe kërcënime, duke respektuar sovranitetin e secilit shtet në mënyrë reciproke. Respekti në Ballkan është i nevojshëm.

E kemi të qartë se përgjegjësinë finale për sigurinë nacionale të shtetasve tanë e mbajmë vet secili shtet.

Për këtë Kosova, si shtet, e ka të vendosur rrugën e vet. Ne nuk jemi shtet neutral në aspektin ushtarak dhe të politikës së jashtme.

Ne duam dhe e meritojmë të anëtarësohemi sa më shpejt në NATO. Pra ne jemi me NATO-n

Ne duam NATO të qëndrojë në Kosovë. Ne kemi të drejtë dhe po bëjmë të gjitha përpjekjet për të themeluar Forcat e Armatosura të Kosovës. Ne synojmë që brenda kësaj dekade pra, deri në vitin 2020 të arrijmë fazën e dialogut, pra ta përmbyllim anëtarësimin në NATO.

Dëshirojmë që Kosova të përfshihet në programin për partneritet për paqe në bazë të fushave të specializuara ushtarake si dhe të ftohet për t’u bashkuar në Membership Action Plan, projektimi i stabilitetit NATO dhe Ballkani Perëndimor.

Ne e shohim NATO-n si faktor të posaçëm dhe vendimtar të stabilitetit rajonal. Poashtu, e shohim si shumë të rëndësishme NATO-n për parandalimin e ekstremizmit të dhunshëm dhe radikalizmit.

E shohim NATO-n si mundësi për të parandaluar dhe për t’u përballur më luftën e dezinformimit.

E mendojmë NATO-n si ndihmesë për Kosovën, që Kosova të ndalojë së absorbuari siguri dhe të mund të ofrojë dhe të ndihmojë sigurinë dhe paqen në botë.

Themelimi i Forcave të Armatosura të Kosovës jemi të bindur se e ndihmon këtë proces dhe njëkohësisht siguron të gjithë qytetarët që jetojnë në Kosovë.

 


 

 

Kalendari

Ngjarjet e datës 10 dhjetor 2018 - Ambasador i Shteteve të Bashkuara të Amerikës, Philip S. Kosnett së bashku me ambasadorët e Mbretërisë së Bashkuar, Italisë dhe Francës,  të ngarkuarin me punë të ambasadës gjermane, Kryesuesen e Zyrës së BE-së në Kosovë, si dhe një përfaqësues të organizatës Iniciativa për Progres do të flasin gjatë hapjes së Javës kundër korrupsionit në Kosovë. (Sirius Hotel, ora 9:30)

- Koalicioni i Organizatave për Mbrojtjen e Fëmijëve organizon konferencën për avancimin e shërbimeve shëndetësore dhe rehabilituese për fëmijë. (Hotel Sirius, ora 10:00)

- Mbahet konferenca e Forumit të Rinisë së LDK-së me temën “Pa-siguria Sociale dhe Ekonomike e të Rinjve në Kosovë”. (Hotel Sirius, ora 10:00)

- Ministria e Drejtësisë, Zyra e Koordinatorit Nacional kundër Dhunës në Familje, organizon konferencën “Qasja në drejtësi e viktimave të dhunës në familje dhe dhunës në baza gjinore”. (Hotel Emerald, ora 10:00)

- Kryeministri Ramush Haradinaj merr pjesë në Konferencën Rajonale "Qasja në drejtësi për viktimat e dhunës në familje dhe dhunës në baza gjinore". (Hotel Emerald, ora 10:00)

- Mbahen punimet e Forumit Kosovaro-Maqedonas të Sigurisë 2018, që organizohet nga Fondacioni “Konrad Adenauer Stiftung”, Kolegji AAB dhe Universiteti Kliement Ohridski, Fakulteti i Sigurisë, Shkup. (Kolegji AAB, ora 10:00)

- Klubi Dëshira organizon promovimin e programit të Ndërmarrjes Sociale Dëshira. (Hotel Prishtina, ora 10:00)

- Institucioni i Avokatit të Popullit në bashkëpunim me organizatat joqeveritare dhe shoqërinë civile të Kosovës organizojnë aktivitetin “Çohu për të Drejtat e Njeriut” për shënimin e 10  dhjetorit, Ditës Ndërkombëtare për të Drejtat e Njeriut.​  (Teatri Kombëtar të Kosovës, ora 10:30)

- Mbahet mbledhja e Komisionit për Zhvillim Ekonomik, Infrastrukturë, Tregti, Industri dhe Zhvillim Rajonal në të cilën do të behët shqyrtimi i Projektligjit për Ratifikimin e Marrëveshjes për Protokollin Shtesë 5 të Marrëveshjes për Amendimin dhe Aderimin në Marrëveshjen e Tregtisë së Lirë të Evropës Qendrore si dhe shqyrtimi i vendimit të Qeverisë për emërimin e anëtarëve të Bordit të Agjencisë Kosovare të Privatizimit. (Ndërtesa e Kuvendit, salla N 303, ora 11:00)

- Në kuadër të Javës Kundër Korrupsion, Demokraci Plus organizon debatin publik në lidhje me gjetjet e monitorimit të prokurimit publik në Komunën e Vushtrrisë. (Restaurant Holiday, ora 11:00)

- Muzeu i Kosovës për nder të ditës ndërkombëtare të drejtave të njeriut do të bëjë promovimin e katalogut me imazhe taktile dhe të përkthyer në Brail në bashkëpunim me shoqatat e të verbërve në Kosovë. (Muzeu i Kosovës, ora 11:00)

- Koalicioni i OJQ-ve “Java Kundër Korrupsionit 2018” organizon tryezën e diskutimit me temë “Parandalimi dhe luftimi i konfliktit të interesit në pushtetin gjyqësor”. (Hotel Sirius, ora 11:00)

- Koordinatori Nacional për Kulturë, Rini dhe Sport në Qeverinë e Republikës së Kosovës, Rexhep Hoti do të nënshkruajë marrëveshje bashkëpunimi me kryetarin e Komunës së Klinës Zenun Elezaj. (Objekti i Komunës së Klinës, ora 11:30)

- Institucioni i Avokatit të Popullit në bashkëpunim me organizatat joqeveritare dhe shoqërinë civile të Kosovës organizojnë marshin “Çohu për të Drejtat e Njeriut”, i cili fillon nga sheshi “Skënderbeu” deri te sheshi “Zahir Pajaziti”. (Sheshi “Skënderbeu”, ora 12:00)

 - Mbahet mbledhje e Komisionit për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi në të cilën do të behët shqyrtimi në parim i Projektligjit për Arsimin e Lartë në Republikën e Kosovës(Ndërtesa e Kuvendit, salla N 303, ora 13:00)

- Koordinatori Nacional për Kulturë, Rini dhe Sport në Qeverinë e Republikës së Kosovës, Rexhep Hoti do të nënshkruajë marrëveshje me kryetarin e Komunës së Junikut Agron Kuçi. (Objekti i Komunës së Junikut, ora 13:30)

- Me rastin e 10 Dhjetorit, Ditës Ndërkombëtare të të Drejtave të Njeriut, Kolegji AAB në bashkëpunim me KMDLNJ organizojn tryezë që i kushtohet Adem Demaçit, fitues i Çmimit Saharov dhe çmimeve të tjera ndërkombëtare për të drejtat e njeriut. (Qendra Mediale e Kolegjit AAB, ora 14:00)

- Qendra Kinematografike e Kosovës në bashkëpunim me Shtëpinë e Kulturës në Bujanoc organizojn Javën e Filmit të Kosovës në Bujanoc. (Shtëpia e Kulturës në Bujanoc, ora 17:00)

- Mbahet ceremonia e dorëzimit të çmimit që shënon Ditën Ndërkombëtare Kundër Korrupsionit për të falenderuar publikisht kontributet e gazetarëve të guximshëm të cilët zbulojnë rastet e korrupsionit dhe për të rritur ndërgjegjësimin përmes tregimeve të tyre. (Grand Hotel, ora 17:30)