07 Korrik 2020

Komuna e Prizrenit padit portalet qe shpifin

Prizren, 25 shtator - Kryetari i Komunës së Prizrenit, Mytaher Haskuka, së bashku me drejtorin e Drejtorisë së Urbanizmit dhe Planifikimit Hapësinor, Fatmir Memaj, sot kanë mbajtur konferencë për shtyp lidhur me dezinformatat që janë plasuar nga mediat për propozim-vendimin e Kuvendit Komunal mbi hyrjen në koncesion të pronës komunale.

Duke i quajtur të pavërteta dhe me tendencë politike lajmet e dalura në media për këtë çështje, kryetari i Komunës fillimisht tha se do të nisin proceset gjyqësore për shpifje ndaj atyre që kanë publikuar këto lajme.

"Portalet që kanë përmendur shifra marramendëse në lajmet e tyre të rreme, do të paditen për shpifje pikërisht me ato shifra për kompenzim të dëmit që dëshirojnë të shkaktojnë nëpërmjet gënjeshtrave. Pos dokumenteve të cilat janë publike dhe nuk ka asgjë sekrete, i gjithë përshkrimi i lajmit është i pavërtetë," tha ai.

Më tej, kryetari shtoi se Komuna ka për synim rritjen e vlerës së pronës komunale, ndërsa në rastin konkret, gjendet një parcelë komunale mbi të cilën është një trafostacion elektrik, ku Komuna nuk mund të realizojë asnjë projekt për shkak të hapësirës së pamjaftueshme, pasi aty parashihet ndërtimi i lartë sipas Planit Rregullues.

"Me dhënien në shfrytëzim të kësaj parcele, Komuna synon të ketë benefit duke marrë për kompenzim rreth 5 banesa, të cilat më pas mund të shfrytëzoheshin për familjet me raste sociale, familje të dëshmorëve apo edhe për nevojat e tjera të Komunës. Pra, qëllimi i Komunës është që një aset i vdekur të shndërrohet në hapësirë që mund të përdoret në dobi të qytetarëve," shtoi Haskuka.

Ndërkaq drejtori Memaj, duke shtuar se rasti në fjalë është politizuar pa nevojë, tha se drejtoria që ai e drejton vepron sipas dokumenteve ekzistuese të planifikimit.

"Drejtoria e Urbanizmit dhe Planifikimit Hapësinor vepron sipas dokumenteve të planifikimit që janë të miratuara qysh nga qeverisjet e kaluara komunale. Në këtë rast bëhet fjalë për Planin Rregullues Qendra e Re në Prizren, e cila lejon ndërtimin e objekteve me etazhitet 2B+P+7 (2 bodrume dhe 8 kate). Në kuadër të këtij plani gjendet blloku C3, në të cilën gjenden disa ngastra, përfshirë edhe ajo e investitorit me numër 8628-11 dhe ajo e Komunës me numër 8628-15. Ndërsa sipërfaqja e tokës në pronësi të Komunës që është shndërruar temë diskutimi është 459 m2.

Prandaj, me kërkesën e investitorit për të marrë leje ndërtimore, në interes publik ka qenë që pala të inicojë kërkesë për hyrjen në koncesion në ngastrën komunale.

Në këtë rast në qoftë se kjo pronë e Komunës nuk do t'i bashkëngjitej këtij investitori, atëherë do të mbetej e pashfrytëzuar dhe në kuptimin ekonomik do të konsiderohej si ngastër e vdekur, për të cilën pastaj Komuna nuk ka mundësi të realizojë asnjë projekt.

Kjo për arsye se në këtë zonë parashihet vetëm ndërtimi i lartë dhe nëse investitori e shfrytëzon vetëm ngastrën e vet dhe nuk e shfrytëzon edhe ate të Komunës, atëherë Komuna nuk do të mund të realizonte ndonjë projekt për shkak të normave teknike të planifikim hapësinor, të cilat i përmban Plani Rregullues dhe për shkak të distancës që duhet të përmbajë nga të gjitha anët e kufirit të ngastrës," tha drejtori Memaj.

Krejt në fund, drejtori Memaj kujtoi se raste të tilla të marrëveshjes me koncesion kanë ndodhur edhe në të kaluarën, duke përmendur ato të vitit 2012, ndërkaq kryetari Haskuka tha se ajo që po bëhet nga disa media dhe partitë opozitare është pjesë e fushatës politike, që ka për qëllim ta njollosë punën e Komunës së Prizrenit.

Sot në mbledhjen e Kuvendit Komunal ka qenë e paraparë që të votohet për t'u miratuar vendimi që jep të drejtën për lidhjen e bashkëpunimit me partneritet publiko-privat, që parashihet sipas Ligjit për Partneritet Publiko Privat dhe Ligjit për Koncesione.

 
 
 

Kalendari

Ngjarjet e datës 7 Korrik 2020 - Dr. Basri Sejdiu do të mbajë konferencë për media lidhur me vendimin e Bordit Drejtues për shkarkimin nga detyra e drejtorit të përgjithshëm të SHSKUK. (QKUK, ora 11:00)

- Ministri i Drejtësisë Selim Selimi do të vizitoje Komunën e Prishtinës. (Ndërtesa e Komunës së Prishtinës, ora 11:00)

- Kryetari i Sindikatës së Pavarur të Sektorit Privat të Kosovës, Jusuf Azemi do të mbaj takim me Ministren e financave, znj. Hikmete Bajrami me të cilën do të bisedoj lidhur me pagesën e pagave të  punëtorëve nga pakoja emergjente, tërheqjen e mjeteve për punëtorë nga fondi i kursimeve si dhe eliminimin e gabimeve teknikeve gjatë  aplikimit për pakon fiskale emergjente. (Kabineti i ministres Bajrami, ora 11:00)

- Kryetari i Sindikatës së Pavarur të Sektorit Privat të Kosovës, Jusuf Azemi pas takimit me Ministren e financave, znj. Hikmete Bajrami do të mbaj konferencë për shtyp, ku do të ju njoftojë lidhur me këtë takim. (Zyret e Sindikatës në objektin e ish Gërmisë, ora 11:45)

- Lëvizja Vetëvendosje! mban konferencë për media në të cilën flet nënkryetari Besnik Bislimi. (Zyret e LV-së në Arbëri, ora 12:00)

- Ministri i Drejtësisë, Selim Selimi, do të  mbajë konferencë për media për Kodin Civil. (Holli i Ministrisë së Drejtësisë, ora 14:00)

- Organizatat e dala nga Lufta e UÇK-së dhe Shoqata e ish të Burgosurve Politik, që janë Këshill Organizues i Protestave mbajnë sot konferencë për medie. (Selia qendrore e Organizatës së Veteranëve të Luftës së UÇK-së në Prishtinë, ora 14:00)

- Me hapjen e ekspozitës multimediale në hapësirat e SENSE Qendrës në Pulë, Qendra për Drejtësi Tranzicionale në bashkëpunim me Fondin për të Drejtën Humanitare Kosovë nisin kampanjën me titull: Srebrenica 25: Së bashku kundër virusit të mohimit në ditën kur në vitin 1995 ka rënë Srebrenica. (Transmetim direkt livestream http://srebrenica.sensecentar.org, ora 17:00)

- Komuna e Rahovecit mban dëgjim publik me banorët të fshatrave Malësi e Vogël dhe Gexhë. (Objekti i Shkollës Fillore të Mesme të Ulët “Skender Kastrati” në fshatin Malësi e Vogël, ora 19:00)

- Komuna e Rahovecit mban dëgjim publik me banorët të fshatrave Ratkoc, Dejnë, Vrajak dhe Bratotin. (Objekti i Shkollës  Fillore të Mesme të Ulët “4 Dëshmorët” në fshatin Ratkoc, ora 20:00)