04 Dhjetor 2020

Bota dhe Kosova pas Zgjedhjeve në Amerikë

Shkruar nga Ramiz Tafilaj

Kam kaluar thuajse gjysmë shekulli të jetës sime në SHBA, dhe nuk mbaj mend të kemi pasur ndonjëherë më parë zgjedhje më të rëndësishme sesa këto presidencialet e fundit.

Nuk do mend se zgjedhjet në Amerikë përcillen me një vëmendje të vecantë nga të gjithë anekënd globit, por këto zgjedhjet e fundit krijuan një rritje enorme edhe të interesimit, por edhe polarizimit të vet amerikanëve.

Beteja e fundit zgjedhore nuk ka se si të përshkruhet ndryshe pos si një përplasje titanësh në garë për Zyrën Ovale.

Në njërën anë kishim Demokratin Joe Biden, një figure të spikatur të politikës amerikanë që thuajse ka kaluar pesë dekada në shërbim publik në poste të zgjedhura nga votuesi amerikan – kryesisht si Senator, pastaj si Zëvendës Presidenti, dhe tanimë edhe si President i 46-të i SHBA-ve.

Në anën tjetër, jo më pak i rendësishëm, ka qenë Republikani Donald Trump, një personalitet sa kompleks aq edhe pragmatik.

Mund të thuhet se Trump humbi garën për rizgjedhje si Shef i Shtëpisë së Bardhë, por të jeni të bindur se humbja e tij tani nuk shënon historinë më shumë sesa fitorja e tij katër vite më parë.

Kur secili priste që ai të humbëte edhe garën brendapartiake tek Republikanët, ai pati triumfuar. Vula e fitorës së tij u vendos kur Trump po ashtu fitoi edhe betejën zgjedhore presidenciale më 2016.

Për shumëkë, Presidenca Trump u vlerësua ndryshe, jo tradicionale. Por, efekti Trump krijoi një mendësi të vecantë tek elektorati dhe politikbërja amerikane.

 Ai prodhoi pragmatizmin politik të slloganit të tij zgjedhor nga viti 2016, duke vënë gjithëherë Amerikën të parën. Kjo casje e Presidentit Trump nuk i shkoi aspak për shtati as atyre që historikisht konsideroheshin ‘aleatë të SHBA-ve.’

Por, ajo që duhet kuptuar është se shpeshëherë ‘aleatët historik’ të SHBA-ve për kohë të gjatë kishin ‘përdorur’ fuqinë ekonomike dhe ushtarake amerikane si mburojë për vete pa ofruar shumë në shkëmbim.

Trump, duke përdorë logjikën e një biznesmeni, insistoi që postulatin e famshëm ekonomik “there is no free lunch,” apo thënë figurativisht në shqip, “nuk ka asgjë falas.”

Zgjedhjet që tanimë po marrin epilogun, si rezultat i casjes së Trump, na shpërfaqën një përplasje titanësh sic e ceka qysh në fillim, pasi që krijuan një koalicion të gjerë botëror në përkrahje të Joe Biden që për bosht të përbashkët kishte idealet e globalizmit, dhe ideologjikisht ndjenjen e së majtës.

Karshi kësaj fryme globale qëndroi Trump, por assesi i vetëm. Edhe ky kishte përkrahje që rrjedhje përtej Amerikës, por nga një frymë komplet e kundërtë – nga një frymë antiglobaliste, shumë realiste, e afërtë me ndjenjën nacionaliste, do të thoja. Përplasja ishte globale, anipse zgjedhjet ishin Amerikane!

Ajo që është me rendësi për neve si shqiptarë ka të bëjë me pozitën tonë tani e tutje. Historikisht shqiptarët aleat të mocëm dhe të fuqishëm e kanë pasë Amerikën.

Kjo aleancë apo miqësi permanente sic do thoshte Presidenti historic Dr. Rugova nuk ka ardhë rastësisht. Përkundrazi, rol esencial këtu kanë luajtur shqiptarët e Amerikës, e specifikisht lobin ynë në Washington, DC, që tani e mbi tri dekada rresht udhëhiqet suksesshëm nga ish-Kongresisti arbëresh Joe DioGuardi dhe Liga Qytetare Shqiptaro-Amerikane.

Ata që nuk e kuptojnë apo nuk e njohin rolin e Ligës dhe DioGuardit, fatkeqësisht as nuk e kuptojnë e as nuk e njohin miqësinë tonë me Amerikën, po ashtu.

DioGuardi dhe një pjesë e madhe e komunitetit shqiptaro-amerikan kësaj rradhe u vu në përkrahje të Joe Biden, jo për shkak të ndonjë ideologjie apo bindje partiake, por kryekëput për shkak të historisë së punës të jashtëzakonshme që Joe Biden kishte bërë bashkë me Joe DioGuardin për Kosovën sidomos gjatë viteve të 1990-ta. Ndjenja kombëtare triumfoi më shumë se gjithëcka tjetër për shqiptarët këtu.

Sidoqoftë, historia jonë me Joe Biden është gurthemel i mirë për atë që mund të pritet nga Presidenca Biden, por puna vecse fillon në Janar 2021.

Asgjë nuk duhet marrë si e mirëqenë. Presidenti Biden nuk është më Senatori Biden, jo pse ai nuk don të jetë, por se tanimë përgjegjësitë e tij janë në Zyrën Ovale dhe jo në Senat.

Ai tanimë është i pari i Amerikës, jo njëri nga njëqind Senatorët e Amerikës. Por, nuk duhet vënë aspak në dyshim njohuritë dhe lidhjen edhe emocionale që ai ka me shqiptarët, për shkak të kalurës.

E këtë lidhje, shqiptarët kudo në Ballkan, e kryesisht ata në Kosovë, duhet ta shfrytëzojnë maksimalisht. Rastin dhe mundësinë e kemi. Por a do t’ia dalim, varet nga vendimet tona dhe ecja jonë politike si Kosovë.

Historia e Biden me shqiptarët që fillon nga viti 1991 në dëgjimin e parë të Komitetit për Punë të Jashtme të Senatit ku Joe DioGuardi e bënë për vete dhe rrjedhimisht zë të fuqishëm për Kosovën Joe Bidenin me dëshminë e tij para Senatit, duhet të sendërtohet tutje.

Shto këtu edhe rolin e rendësishëm të komunitetit shqiptar në këto zgjedhje dhe në favor të Biden përmes Ligës dhe platëformës specifike që Liga kishte ngritur në koordinim me fushatën e Biden për President, të quajtur Albanians for Biden e të cilën e udhëhoqi suksesshëm Dr. Faton Bislimi nga Gjilani i Kosovës, një nga lobistit më të rinjë në Washington, krah i djathtë i DioGuardit dhe Ligës për afro dy dekada.

Profesionistët e rinjë me arritje akademike kulminante si Dr. Bislimi (i shkolluar në Harvard) janë aseti më i cmueshëm që politika kosovare duhet t’i vëjë në shërbim të vendit.

Ata e njohin dhe e kuptojnë secilin labyrinth të politikës së Washingtonit më mirë se shumëkush tjetër. Ata janë armë që shumë të tjerë në Ballkan nuk i kanë, dhe ne nuk duhet humbur këtë mundësi.

Marrëdhënjet tona me Amerikën nuk cënohen lehtë. Por, ato shumë lehtë mund të mos e prodhojnë rezultatin që ne si shqiptarë e duam dhe rezultatin për të cilin ka aq shumë nevojë Kosova.

Syqelë dhe vizionarë, së bashku dhe përtej interesave personale a partiake, ne mund të përfitojmë hatashëm nga Presidenca Biden. Përndryshe historia do na gjykojë për një rast të humbur e i cili vështirë se na përsëritet.

Përplasja e titanëve ka hapë mundësi titanike për ne nëse dijmë dhe duam t’i shfrytëzojmë – për interesin madhor kombëtar!

/Autori është shqiptaro-amerikan dhe activist i shquar i kauzës kombëtare në SHBA. Për punën e tij vullnetare dhe filantropiste, ai në vitin 2018 është nderuar me Cmimin Jetësor të Arritjes nga Presidenti Donald Trump/

Kalendari

Ngjarjet e datës 4 Dhjetor 2020 - Mbahet seanca fillestare për rastin e vrasjes së politikanit serb Oliver Ivanoviq pranë Gjykatës Themelore në Prishtinë, departamenti Special - krimet e rënda me c'rast avokati mbrojtës do te jep deklaratë për mediet pas seancës. (Gjykata Themelore në Prishtinë, ora 9:30)

- Guvernatori i Bankës Qendrore të Republikës së Kosovës, Fehmi Mehmeti do të mbaj një takim virtual me presidentin e Gjykatës Ndërkombëtare të Arbitrazhit Alexis Mourre dhe Drejtoreshën e Komisionit të Arbitrazhit për Evropë, Laetitia de Montalivet. (Takim virtual, ora 10:00)

- Kryetari i Komunës së Prizrenit, Mytaher Haskuka dhe drejtoresha e Drejtorisë së Kulturës, Rinisë dhe Sportit, Emilja Redzepi, do të bëjnë nënshkrimin e kontratave me përfituesit e thirrjes për përkrahjen e OJQ-ve dhe individëve në fushën e kulturës, rinisë dhe sportit. (Shtëpia e Bardhë në Prizren, ora 10:00)

- Qendra për Këshillim, Shërbime Sociale, dhe Hulumtime organizon aktivitetin “Tuneli i Fundit” në përkujtim të grave të vrara si pasojë e dhunës në familje në pesë vitet e fundit në Kosovë, dita e dytë. (Përballë ndërtesës së Kuvendit të Kosovës, ora 10:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit shqyrton shkresën e Artan Qerkinit përfaqësues i Malcolm Simmons, ish kryetar i Asamblesë së Gjyqtarëve të EULEX-it, “Përgjigje në ftesën për të dëshmuar para Komisionit për Legjislacion” si dhe njoftohet me shkresën e Përfaqësuesit Special të Bashkimit Evropian, Tomas Szunyong, për emërimin e Karin Hernmark Ahliny, Ambasador i Suedisë, anëtar i Bordit  Mbikëqyrës  të Agjencisë Kosovare për Verifikim dhe Krahasim të Pronës. (Ndërtesa e Kuvendit, salla N506, ora 10:15)

- Komisioni Hetimor Parlamentar mbi procesin e licencimit, operimit, mbikëqyrjes dhe aplikimit për lejet e hidrocentraleve në Republikën e Kosovës interviston Ministrin e Ministrisë së Infrastrukturës Arban Abrashin. (Ndërtesa e Kuvendit, salla N204, ora 11:00)

- Mbahet seanca e jashtëzakonshme e Kuvendit te Kosovës në të cilën do të behët shqyrtimi i dytë i Projektligjit për Rimëkëmbjen Ekonomike - COVID-19. (Ndërtesa e Kuvendit, ora 11:00)

- Organizata Etea dhe Aleanca Franceze në Prishtinë me mbështetjen e Ambasadës Franceze do të mbajnë takimin e parë të huazimit të librave. (Tek objekti i Aleancës Franceze, ora 11:00)

- Autoriteti Kosovar i Konkurrencës (AKK) mban konferencë për medie lidhur me një hetim ndaj ndërmarrjeve që operojnë në tregun e energjisë elektrike. (Ish-objekti i Bankës së Lubjanës, ora 11:15)

- Kryetari i Delegacionit të Kosovës, Ibrahim Makolli dhe ai i delegacionit të Serbisë Veljko Odalovic do të mbajnë konferencë për media lidhur me varrezën masive në Kizhevak të Serbisë. (Lokacioni i varrezës masive në Kizhevak  të Serbisë, ora 12:00)

- Shpallet aktgjykimi ndaj të akuzuarit N. M., i cili akuzohet nga Prokuroria Themelore e Gjilanit, për veprën penale “vrasje e rëndë” pasi qe në  fshatin Berivojcë, komuna e Kamenicës, i pandehuri dyshohet që pas mosmarrëveshjeve familjare, me një mjet të fortë - shufër metalike, godet bashkëshorten e tij në kokë dhe pjesë të tjera të trupit, me ç’rast të ndjerës i ka shkaktuar plagë të cilat kanë qenë vdekjeprurëse. (Gjykata Themelore Gjilan, ora 13:00)

- Komisioni Hetimor Parlamentar mbi procesin e licencimit, operimit, mbikëqyrjes dhe aplikimit për lejet e hidrocentraleve në Republikën e Kosovës interviston drejtoren e Insitutit Hidrometeorologjik të Kosovës Letafete Latifi. (Ndërtesa e Kuvendit, salla N204, ora 13:00)

- Komisioni Hetimor Parlamentar lidhur me procesin e privatizimit në Kosovë plotëson listën e dëshmitarëve. (Ndërtesa e Kuvendit, salla N10, ora 13:00)

- Qendra për Raste Gjyqësore Strategjike mban konferencë për media me rastin e dorëzimit të padisë për konflikt administrativ kundër vendimeve të Ministrisë së Ekonomisë dhe Ambientit dhe Zyrës së Rregullatorit për Energji”. (Para Pallatit të Drejtësisë, ndërtesa A, ora 14:00)

- Ministrja e Punëve të Jashtme dhe Diasporës e Republikës së Kosovës, Meliza Haradinaj-Stublla pret në takim ministrin në detyrë për Evropën dhe Punët e Jashtme i Republikës së Shqipërisë, Gent Cakaj ku pjesë e takimit do të jenë edhe përfaqësuesit e shqiptarëve të Luginës së Preshevës. (Objekti i MPJD-së, ora 14:00)