09 Mars 2021

Hapet Qendra e Frankofonisë në Pejë

Pejë, 9 mars - Anibar dhe Ambasada Franceze në Kosovë organizojnë sot hapjen e Qendrës Frankofone për herë të parë në hapësirat e Kinemasë “Jusuf Gërvalla” në Pejë. 

Ne ceremoninë e hapjes së kësaj qendre në Pejë do të marrë pjesë edhe ambasadorja e Francës në Kosovë shkelqësia e saj, znj. Marie Christine Butel.

Kjo qendër hapet falë bashkëpunimit të Anibar dhe Ambasadës Franceze në Kosovë brenda hapësirave të Akademisë së Animacionit në Pejë, respektivisht brenda Kinemasë “Jusuf Gërvalla”.

Përmes Qendrës Frankofone pritet të dizajnohen programe edukative prej të cilave do të mund të përfitojnë të gjithë banorët e qytetit të Pejës. 

Hapja e kësaj qendre vjen si rezultat i bashkëpunimit të vazhdueshëm dhe disa vjeçar tashmë të Anibar dhe Ambasadës Franceze në Kosovë, e cila në vazhdimësi ka përkrahur edhe Festivalin Ndërkombëtarë të Filmit të Animuar që organizojmë dhe një sërë aktivitetesh tjera kulturore të mbajtura në Kinema “Jusuf Gërvalla”. 

Ky bashkëpunim ka shërbyer edhe si urë lidhëse me organizata tjera kulturore franceze, dhe ka ndikuar në rritjen e cilësisë së programeve kulturore, por edhe në përmirësimin e edukimit të gjeneratës së re të animatorëve në Kosovë. 

Këtë vit shënohet 50 vjetori i themelimit të Organizatës Ndërkombëtare të Frankofonisë, ndërsa po këtë vit shënohet edhe 6 vjetori i anëtarësimit të Kosovës në këtë organizatë.

 

Kalendari

Ngjarjet e datës 9 Mars 2021 - Institucioni i Avokatit të Popullit organizon një tryezë diskutimi në lidhje me publikimin e dy raporteve me rekomandime në të cilën do të merr pjesë edhe Presidentja Vjosa Osmani. (Hotel International Prishtina në Veternik, ora 9:30)

- Oda e Mjekëve ndan mirënjohje përkujtimore për mjekët që janë ndarë nga jeta gjatë vitit 2020 dhe  institucionet shëndetësore mbështetëse të rajonit të Prishtinës, për kontributin e dhënë në luftën kundër pandemisë. (Qendra e Telemjekësisë në QKUK, ora 10:00)

- Programi për Drejtësi Komerciale në bashkëpunim me Innovation Centre Kosovo, organizojnë diskutim rreth ngritjes të vetëdijes për bizneset fillestare të sapo themeluara dhe sipërmarrësit e rinj me fokus në drejtësinë komerciale, pjesa e sistemit të drejtësisë që siguron çasjen e bizneseve në drejtësi. (Innovation Centre Kosovo -https://www.facebook.com/ickosovo, ora 10:00)

- Mbahet ceremonia e zbarkimit të kontingjentit të Forcës së Sigurisë të Kosovës në misionin e parë paqësorë jashtë vendit në të cilën do të merr pjesë Presidentja Vjosa Osmani dhe Kryeministri në detyrë, Avdullah Hoti. (Salla e sporteve në kazermën ''Adem Jashari'', ora 10:45)   

- Partia Liberale Egjiptiane dorëzon ankesë në Gjykatën Supreme për anulimin edhe të pesë vendvotimeve tjera. (Gjykata Supreme e Kosovës, ora 11:00)