17 Shkurt 2019

D4D përmbyll projektin 'Pjesëmarrja e rinisë - Vendos për demokraci'

Prishtinë, 31 janar - Instituti Demokraci për Zhvillim (D4D) organizon konferencën përmbyllëse të projektit dhe lansimin e manifestit “Pjesëmarrja e rinisë: Vendos për demokraci”.  

Fjalimi hapës do të mbahet nga Ferid Murseli, Menaxher i projektit, Instituti D4D, prezantimi i manifestit të të rinjve do të bëhet nga Blerinë Ukshini, Instituti D4D.

Nga komunat përfaqësues do të jenë: Lutfi Haziri, Kryetar i Komunës së Gjilanit; Eshref Memaj, Nënkryetar i Komunës së Prizrenit; Yll Rugova, Drejtor i drejtorisë për Kulturë, rini dhe sport, Komuna e Prishtinës;  Engelbert Zefaj, Drejtor i drejtorisë për Kulturë, rini dhe sport, Komuna e Pejës dhe Tafil Peci, Drejtor i drejtorisë për Kulturë, rini dhe sport, Komuna e Mitrovicës.

Gjatë vitit 2017, D4D ka mbajtur konsultime me të rinjtë nga Komuna e Gjilanit, Mitrovicës, Pejës, Prishtinës dhe Prizrenit, me qëllim të identifikimit të nevojave dhe prioriteteve të tyre kryesore brenda komunave ku jetojnë.

Konsultimet, diskutimet, takimet e njëpasnjëshme, rezultuan në manifestin e të rinjve si kontratë sociale mes të rinjve dhe të zgjedhurve të tyre.

Ky manifest thekson prioritetet kryesore dhe nevojat që duhen të adresohen nga komunat dhe të zgjedhurit gjatë këtij mandati.

Paralelisht me takimet e të rinjve, D4D ka takuar edhe zyrtarë të lartë të partive politike për të avokuar për përfshirjen e temave të këtij manifesti në platformat dhe programet e partive politike.

Në konferencë do të prezantohet manifesti i të rinjve, i përpiluar në kuadër të këtij projekti, i cili përmban identifikimin e problemeve me të cilat ballafaqohen të rinjtë në komunat, si dhe të diskutohet më gjerësisht për këto probleme me përfaqësues nga komunat përkatëse.

Ky projekt është përkrahur nga National Endowment for Democracy –NED.

Kalendari

Ngjarjet e datës 17 shkurt 2019 - Qeveria e Kosovës mban mbledhje festive për nder të 11-vjetorit të Pavarësisë. (Ndërtesa e Qeverisë, ora 8:00)

- Ngritja solemne e Flamurit të Republikës së Kosovës për nder të 11-vjetorit të Pavarësisë në të cilën marrin pjesë presidenti Hashim Thaçi, kreu i Kuvendit, Kadri Veseli dhe kryeministri Ramush Haradinaj. (Hapësira mes ndërtesës së Kuvendit dhe Qeverisë, ora 8:30) 

- Presidenti Thaçi, kryeparlamentari Veseli dhe kryeministri Haradinaj vendosin kurora lulesh te shtatorja e ish-presidentit Ibrahim Rugova. (Sheshi “Ibrahim Rugova”, para Kuvendit, ora 8:45) 

- Presidenti Thaçi, kryeparlamentari Veseli dhe kryeministri Haradinaj vendosin kurora lulesh në Kompleksin Memorial “Adem Jashari” në Prekaz. (Prekaz, ora 9:40)

- Në 11 vjetorin e shpalljes së pavarësisë të Kosovës, anëtarë të kryesisë së LDK-së bashkë më struktura të saj, bëjnë homazhe te varri i Presidentit Historik të Kosovës, Dr. Ibrahim Rugova. (Velani, ora 10:00)

- Komuna e Gjilanit organizon homazhe  te varrezat e dëshmorëve. (Gjilan, ora 10:00)

- Federata e Ping-Pongut e Kosovës (FPPK) organizon turneun “Dita e Pavarësisë”.  (ShMU “Tefik Çanga”, Ferizaj, ora 10:00)

- “Star Kids” do të performojnë në sheshin “Skënderbeu” për nder të Pavarësisë. (Sheshi “Skënderbeu” në Prishtinë, ora 10:00)

- Kuvendi i Kosovës mban seancë solemne për nder të 11-vjetorit të Pavarësisë. (Kuvendi i Kosovës, ora 10:45) 

- Komuna e Gjilanit organizon akademi solemne dhe program artistik nga Shkolla e Muzikës në Gjilan. (Teatri i Qytetit, ora 11:00)

- Trupat e Forcës së Sigurisë së Kosovë parakalojnë me rastin e 11-vjetorit të Pavarësisë së Kosovës. (Prej Sheshit “Nënë Tereza” deri te Sheshi “Ibrahim Rugova”, ora 12:20)

- Me rastin e 11-vjetorit të Pavarësisë së Kosovës organizohet koktej për të gjithë të ftuarit në Parakalimin e Trupave të FSK-së. (Hotel “Swiss Diamond”, ora 13:00)

- Dega e Lidhjes Demokratike të Kosovë në Gjilan bën përurimin e bustit të ish-presidentit Ibrahim Rugova (Gjilan, ora 13:00)

- Përfaqësues të organizatave studentore organizojnë një “protestë artistike” në lidhje me vonesën e liberalizimit për qytetarët e Kosovës. (Sheshi “Zahir Pajaziti”, ora 13:00) 

- Komuna e Vushtrrisë organizon manifestimin qendror për shënimin e 11-vjetorit të Pavarësisë. (Kalaja e Qytetit, Vushtrri, ora 13:00)

- Kryeministri Ramush Haradinaj pret në takim deputetët nga Mbretëria e Bashkuar, John Grogan dhe Martin Vickers. (Ndërtesa e Qeverisë, ora 14:00)

- Shoqata e Gastronomëve të Prishtinës, në bashkëpunim me Qeverinë e Kosovës, organizon një event simbolik për Pavarësi. (Sheshi “Skënderbeu”, ora 14:00) 

- Kryetari i Kuvendit të Kosovës, Kadri Veseli, dhe ministri i Kulturë, Rinisë dhe Sportit, Kujtim Gashi, përurojnë Palestrën Sportive në Shtime. (Shtime, ora 15:00)

- Kryeministri Ramush Haradinaj pret në takim delegacionin 17-anëtarësh nga Shtetet  e Bashkuara të Amerikës, të kryesuar nga Senatori James Inhofe. (Ndërtesa e Qeverisë, ora 15:00) 

- Komuna e Lipjanit organizon koncert festiv për 11-Vjetorin e Pavarësisë. (Qendra e Kulturës “Tahir Sinani”, Lipjan, ora 15:00)

- Ansambli Kombëtar i Këngëve dhe Valleve “Shota” mban koncert festiv për Pavarësi. (Sheshi “Zahir Pajaziti”, Prishtinë, 18:00)

- Për 11-vjetorin e Pavarësisë së Kosovës bëhet ndezja e organizuar e fishekzjarrëve. (Sheshi “Zahir Pajaziti”, Prishtinë, ora 18:30)

- Me rastin e 11-vjetorit të Pavarësisë së Kosovës organizohet pritja shtetërore nën përkujdesjen kryeministrit Ramush Haradinaj. (Hotel “Venus”, magjistralja Prishtinë-Ferizaj, ora 19:30)

- Mbahet koncerti festiv për nder të 11-vjetorit të Pavarësisë së Kosovës. (Sheshi “Zahir Pajaziti”, Prishtinë, ora 20:00)