12 Gusht 2020

Gjilani, marrëveshje me korporatën gjermane për vendosjen e 200 kontejnerëve

Gjilan, 15 Korrik - Kryetari i Komunës së Gjilanit, Lutfi Haziri, ka nënshkruar sot marrëveshjen me korporatën gjermane,"Solar Outdoor Media G.M.B.H", për vendosjen e 200 kontejnerëve të avancuar për mbeturina në pjesë urbane të qytetit, në vlerë prej rreth 400 mijë euro, që është në interes të mbrojtjes së ambientit dhe interes publik.

Pas nënshkrimit të aneks-marrëveshjes, kryetari Haziri ka thënë se kjo ka të bëjë me shtyrjen e afateve kohore të implementimit të marrëveshjes fillestare, për shkak të pandemisë Covid-19, e cila ka bërë që “Solar Outdoor Media Kosovo-L.L.C”, të jetë e ndikuar nga masat e marra në nivel europian për parandalimin dhe luftimin e pandemisë.

“Kjo situatë ka pamundësuar prodhimin si dhe transportimin me kohë të kontejnerëve, prandaj sipas tij aneks-marrëveshja është për shtyrje të këtij afati”, ka thënë Haziri.

Zbatimi i kësaj marrëveshje sipas planit të dakorduar për vendosjen e tyre do të fillojë në muajin shtator të këtij viti dhe projekti sipas dinamikës zgjas deri në shtator të vitit 2021.

Komuna e Gjilanit mirëpret investitorët e huaj dhe punon vazhdimisht në krijimin e kushteve më të mira për investime duke krijuar kështu ura lidhëse me partnerët dhe donatorët e shumtë nga vende të ndryshme. 

Kalendari

Ngjarjet e datës 13 Gusht 2020

- Komandanti i Forcës së Sigurisë së Kosovës, Gjenerallejtënant Rrahman Rama raporton para Komisionit për Çështje të Sigurisë dhe Mbrojtjes. (Ndërtesa e Kuvendit, salla N10, ora 9:00)

- Vazhdimi i seancës plenare të Kuvendit të Republikës së Kosovës. (Salla e Kuvendit, ora 10:00)

- Ministrja e Kulturës, Rinisë dhe Sportit, Vlora Dumoshi, viziton Komunën e Deçanit. (Objekti i Komunës se Deçanit, ora 10:00)

- Ministri i Infrastrukturës, Arban Abrashi, do të nënshkruaj memorandum bashkëpunimi për financimin e projekteve infrastrukturore me kryetarin e komunës së Istogut, Haki Rugova. (Komuna e Istogut, ora 10:00)

- Policia e Kosovës organizon ceremoninë e prerjes së shiritit të objektit të Stacionit Policor për Mbikëqyrje të Kufirit në Radavc ku pjesëmarrës do të jenë Drejtori i Përgjithshëm i PK-së, përfaqësues të ICITAP-it Amerikan dhe personalitete të larta vendore, përfshirë epror të PK-së. (Radavc, rruga Vitomiricë - Kullë, ora 11:00)                                              

- Drejtoria e Shëndetësisë e Komunës së Prizrenit do të bëjë hapjen e pjesës së renovuar të QKMF-së, ku do të punojë ndërrimi i tretë ku i pranishëm do të jetë kryetari i Komunës së Prizrenit, Mytaher Haskuka dhe drejtoresha e DSH-së, Narqize Arënliu Hoxhaj. (QKMF në Prizren, ora 12:00)