03 Qershor 2020

UNDP dorëzon pajisje dhe artikuj mbrojtës, donacion nga Austria, MFT-së

Prishtinë, 20 maj - Programi i Kombeve të Bashkuara për Zhvillim (UNDP) në Kosovë, si reagim të menjëhershëm ndaj COVID-19 dhe në përputhje me mandatin për të zhdukur varfërinë dhe për të zvogëluar pabarazitë, siguroi sot laptopë dhe artikuj mbrojtës për Divizionin e Ndihmës Sociale (DNS) në Ministrinë e Financave dhe Transfereve (MFT).

Pajisjet do t'i mundësojnë Qendrës për Punë Sociale (QPS) të vazhdojnë punën e tyre në mënyrë më efektive edhe tani, gjatë kufizimeve të lëvizjes.

Z. Besnik Bislimi Ministër i Financave dhe Transfereve, Sh.T. Christoph Weidinger, Ambasadori i Austrisë në Kosovë, Znj. Maria Suokko, Përfaqësuesja e Përhershme e UNDP-së, zyrtarë të MFT-së dhe UNDP-së ishin të pranishëm në dorëzimin që u zhvillua në hapësirat jashtë Ministrisë së Financave dhe Transfereve.

Ky donacion është pjesë e projektit rajonal Promovimi i Zgjidhjeve Gjithëpërfshirëse të Tregut të Punës në Ballkanin Perëndimor (ILMS II) i financuar nga Agjensia Austriake e Zhvillimit (ADA). Projekti synon të lehtësojë punën e Divizionit dhe Qendrave për Punë Sociale në implementimin e Pakos Emergjente Fiskale të Qeverisë në përgjigje të COVID-19.

Divizioni i Ndihmës Sociale është përgjegjës për zbatimin e masës 15 të Pakos Emergjente Fiskale të Qeverisë, e cila përcakton pagesën prej 130 Euro në muaj për muajt prill, maj dhe qershor për qytetarët që jetojnë në kushte të rënduara sociale, të deklaruar si të papunë dhe që nuk janë përfitues të të ardhurave mujore nga sektori publik ose privat dhe ofrimi i shërbimeve të tjera sociale për qytetarët e Kosovës.

Roli i QPS-ve është edhe më i rëndësishëm tani, gjatë pandemisë, pasi ato ofrojnë shërbime për njerëzit më të prekur në Kosovë, përfituesit e ndihmës sociale.

Aktualisht në Kosovë ekzistojnë 24689 familje që marrin ndihmë sociale dhe me numrin e shtuar të ofrimit të shërbimeve për përfituesit të masës 15, është me shumë rëndësi që këto shërbime të dorëzohen në mënyrë të duhur dhe në kohë.

Mjetet e teknologjisë informative do t'u japin zyrtarëve mundësi të punës së pandërprerë edhe nga shtëpia,do të lehtësojnë komunikimin me klientët duke përmirësuar kështu cilësinë dhe afatin kohor të ofrimit të shërbimeve.

Ministri Bislimi gjatë pranimit të këtij donacioni tha: “Ne në Ministrinë e Financave dhe Transfereve  kemi punuar me staf të reduktuar dhe jemi përpjekur të përmbushim të gjitha përgjegjësitë tona, me theks të veçantë ato që kanë të bëjnë me zbatimin e Pakos Emergjente Fiskale.

 Kjo kohë ka ndikuar që të reflektojmë dhe kuptojmë se kemi shumë miq pranë vetes. Andaj, jam i nderuar që sot si Ministër i Financave dhe Transfereve, të falënderoj UNDP-në dhe miqtë tanë, qytetarët dhe qeverinë e Austrisë, për këtë donacion me vlerë të lartë dhe të domosdoshëm. Ky donacion i është dedikuar lehtësimit të zbatimit të masave të Pakos Fiskale Emergjente për të prekurit. Shpresojmë që bashkëpunimi me UNDP-në do të vazhdojë dhe do të realizojmë edhe projekte të tjera të përbashkëta në të ardhmen”.

 

“UNDP është e përkushtuar që edhe  gjatë pandemisë të mbështesë institucionet e Kosovës që të vazhdojnë me ofrimin e shërbimeve në mënyrë sa më efikase. Veçanërisht më të goditurit rëndë - nga aspekti social dhe ekonomik - nga efektet e pandemisë, duhet të marrin mbështetjen e nevojshme. Ne i jemi mirënjohës ADA-së për mbështetjen financiare dhe partneritetin që na mundësoi të shpërndajmë sot këto pajisje, si pjesë e bashkëpunimit tonë rajonal në mbështetje të zgjidhjeve gjithëpërfshirëse të tregut të punës ", tha Maria Suokko, Përfaqësuesja e Përhershme e UNDP-së.

 

Sh.T. Christoph Weidinger, ambasadori austriak në Kosovë, shprehu kënaqësinë e tij që merr pjesë në këtë ngjarje të dorëzimit: "Është kënaqësi për mua të jem sot këtu dhe të vrojtoj ndihmën e dorëzuar nga vendi im përmes Agjencisë Austriake për Zhvillim - ADA, duke e ditur që ky donacion do t'u ndihmojë drejtpërdrejt njerëzve të cilët ndihmojnë kosovarët më të prekur. Së bashku me partnerët tanë, ne mbështesim përpjekjet për të luftuar pandeminë COVID-19," tha Ambasadori Weidinger.

Donacioni i sotëm përfshin: 12 Laptopë për të lehtësuar punën e DNS-së; 500 maska mbrojtëse KN95; 500 sanitizatorë për duar 500 ml; 200 pako dorëzash mbrojtëse dhe 82 Kartela për telefona mobil prej 20 € për punëtorët kyç që të ju lehtësojë komunikimin me klientët gjatë ofrimit të shërbimeve dhe zbatimit të masave emergjente të qeverisë.

Që nga shpërthimi i COVID-19, UNDP në Kosovë, si Agjenci kyçe e Ekipit të OKB-së në Kosovë (UNKT), është duke mbështetur qytetarët dhe institucionet e Kosovës që të përgatiten, t'i përgjigjen dhe të rimarrin veten nga pandemia duke u përqëndruar veçanërisht në më të prekurit.

"Ne kemi zhvendosur me nguti fokusin, duke reaguar me shpejtësi dhe efikasitet dhe duke riorientuar programin tonë për të ndihmuar përpjekjet e Kosovës për të ndaluar përhapjen e virusit, mbrojtjen e njerëzve nga pandemia dhe ndikimet negative gjatë  shpërthimit dhe për të ndihmuar në ripërtëritjen ekonomike dhe sociale në muajt në vazhdim", theksoi Weidinger.

Kalendari

Ngjarjet e datës 3 Qershor 2020

- Mbahet mbledhja e Komisionit për Mbikëqyrjen e Agjencisë së Kosovës për Inteligjencë ku raporton Drejtorit te AKI-së Kreshnik Gashi lidhur me gjendjen e sigurisë gjate periudhës se pandemisë dhe situatën aktuale. (Kuvendi i Kosovës, salla N10, ora 10:00) 

- Mbahet mbledhja e Qeverisë së Republikës së Kosovës. (Ndërtesa e qeverisë, ora 10:00)

- Kuvendi i Kosovës mban seancë për votimin  për votimin e Qeverisë. (Kuvendi i Kosovës, ora 11:00)

- Në kuadër të Javës së Gjelbër, Komuna e Prishtinës do të vendos vazo dekorative gjelberuese në sheshin Bill Klinton. (Shshi Bill Klinton, ora 11:00)
  
- Komiteti Olimpik i Kosovës nënshkruan kontratën për Bursën Olimpike Tokyo 2020 me mundësin, Egzon Shala. (Zyret e KOK-ut në Shtëpinë e Sportit, 13:00)