21 Maj 2019

Miratohet vendimi për hartimin e Programit për Reforma Ekonomike

Prishtinë, 12 qershor - Në mbledhjen e sotme të Qeverisë së Republikës së Kosovës është miratuar Projektligji për Kompetencat e zgjeruara për Konfiskimin e Pasurisë, përmes të cilit përcaktohen kompetencat e zgjeruara për konfiskimin e pasurisë atëherë kur procedurat e detajuara në Kodin e Procedurës Penale të Republikës së Kosovës nuk janë të mjaftueshme si dhe është miratuar edhe Projektligji për Dhomën e Posaçme të Gjykatës Supreme për Çështjet në Lidhje me Agjencinë Kosovare të Privatizimit, qëllimi i të cilit është përcaktimi i juridiksionit, kompetencave, organizimi dhe funksionimi, rregullat për funksionimin e saj si dhe emërimin e gjyqtarëve në këtë gjykatë.

Një lajm tejet i rëndësishëm për Komunën e Prizrenit që i hap rrugë zhvillimit të planit urbanistik është edhe miratimi i kërkesës së kësaj Komune për dhënien në shfrytëzim të pronës së paluajtshme të ish Sekretariatit Federativ për Mbrojtje Popullore, me qëllim të realizimit të Planit Rregullues Urban për shpalljen e Zonës së Veçantë Industri të Lehtë “Parku i Biznesit”, Zona Kadastrale Lubizhdë. Krijimi i kësaj zone industriale ka për qëllim ofrimin e saj në shfrytëzim për investitorët vendor dhe të jashtëm, e cila do të ndikojë në zhvillimin ekonomik lokal në Komunën e Prizrenit.

Po ashtu, është shqyrtuar dhe miratuar vendimi për hartimin e Programit për Reforma Ekonomike 2019-2021. Qeveria e Kosovës përgatitë Programin për Reforma Ekonomike 2019-2021, si pjesë e dialogut ndërmjet BE-së dhe Republikës së Kosovës në kuadër të qeverisjes ekonomike. Ky program mbulon periudhën afatmesme tri vjeçare 2019-2021 dhe bazohet në kornizën makro-fiskale, prioritetet e reformave strukturore dhe masat përkatëse që janë pjesë e Programit të Qeverisë 2017-2021 dhe Strategjisë Kombëtare për Zhvillim 2016-2021.

Projektligji për Mbrojtjen e Fëmijës, është miratuar në mbledhjen e sotme të Qeverisë, i cili ka për qëllim mbrojtjen e fëmijës, nëpërmjet plotësimit të kuadrit ligjor e institucional, në zbatim të Kushtetutës së Republikës së Kosovës, të Konventës së Kombeve të Bashkuara mbi të Drejtat e Fëmijës, të akteve ndërkombëtare që veprojnë në këtë fushë, si dhe të legjislacionit në fuqi.

Kabineti qeveritar ka shqyrtuar dhe miratuar Planin Vjetor të Statistikave Zyrtare për vitin 2019, përmes të cilit synohet realizimi i objektivave nga Programi i Statistikave Zyrtare, bazuar në resurset njerëzore dhe financiare në dispozicion si dhe krijimi i një sistemi të qëndrueshëm statistikor, në rritjen dhe përmirësimin e kualitetit të statistikave zyrtare, në përputhje me metodologjinë ndërkombëtare (Eurostat), duke ofruar statistika cilësore, relevante, të besueshme, në kohë dhe të sakta, që i përmbushin nevojat e të gjithë shfrytëzuesve vendorë  dhe ndërkombëtarë.

Qeveria në mbledhjen e sotme ka marrë vendim për ndarjen e mjeteve financiare në vlerë prej 20 mijë euro, për ekspeditën e Flutura - Uta Ibrahimi, në Himalaje, për periudhën 14 Gusht-15 Tetor 2018, e cila përfaqëson Kosovën.

Projektligji për Mbrojtjen e Sinjalizuesve ka marrë aprovimin e kabinetit qeveritar, i cili përcakton rregullat për sinjalizimin, procedurën e sinjalizimit, të drejtat e sinjalizuesve dhe detyrimet e institucioneve publike dhe subjekteve private në lidhje me sinjalizimin.

Me propozimin e Ministrisë së Inovacionit dhe Ndërmarrësisë, u miratua edhe vendimi për të kërkuar nga Presidenti i Republikës së Kosovës dhënien e autorizimit për nënshkrimin e Marrëveshjes së bashkëfinancimit në mes të Qeverisë së Republikës së Kosovës dhe Agjencionit Gjerman për Bashkëpunim Ndërkombëtar GIZ për Projektin CETEP.

Po sot, aprovimin e kabinetit qeveritar e ka marrë propozimi për ndryshimin dhe plotësimin e Programit Legjislativ të vitit 2018 të Qeverisë së Republikës së Kosovës si dhe është miratuar vendimi për ndryshimin dhe plotësimin e vendimit të Qeverisë nr. 02/59 të datës 17 nëntor 2015, ndërkaq u shfuqizua vendimi i Qeverisë nr. 01/27 i datës 1 shkurt 2018 për pezullimin e vendimit të Qeverisë nr. 04/20 të datës 20 dhjetor 2017.

Kabineti qeveritar, po sot ka shqyrtuar dhe miratuar Udhëzimet e politikave nga Konkluzionet e Përbashkëta të Dialogut Ekonomik dhe Financiar ndërmjet BE-së, Ballkanit Perëndimor dhe Turqisë.

Qeveria e Kosovës ka miratuar vendimin për emërimin e anëtarëve të Këshillit Kosovar për Raporti Financiar, për një periudhë tri vjeçare.

Vendimi Përfundimtar për shpronësim për interes publik të pronave të cilat preken nga realizimi i Projektit “Ndërtimi i Rrugës Rajonale R 129 Kërpimeh-Mitrovicë, Zona Kadastrale Revuq dhe Pakashticë e Poshtme, Komuna Podujevë, si dhe vendimi Përfundimtar për shpronësim për interes publik të pronave të cilat preken nga Ndërtimi i Rrugës Nacionale N9 Prishtinë-Pejë, Segmenti Balincë-Pejë, Zona Kadastrale Balincë, Komuna Malishevë, kanë marrë aprovimin e kabinetit qeveritar.

Poashtu, në mbledhjen e sotme Qeveria është informuar për Raportin mbi zbatimin e Programit Kombëtar për Zbatimin e MSA-së gjatë tre mujorit të parë 2018.

Qeveria e Kosovës ka marrë vendim për vazhdimin e mandatit të Sekretarit të Përgjithshëm të Zyrës së Kryeministrit, z. Fitim Krasniqi.

Në përfundim të mbledhjes së sotme të Qeverisë, Kryeministri Ramush Haradinaj kërkoi nga ministri i Financave, Bedri Hamza, sqarim lidhur me Ligjin për TVSH-në veçanërisht për librin. Ministri Hamza lidhur me këtë tha se Ligji për TVSH-në është në procedurë dhe pritet që gjatë këtij muaji të procedohet në Qeveri dhe pastaj të procedohet në Kuvend, përmes të cilit adresohet edhe çështja e TVSH-së për librin dhe lirimin e tij nga kjo taksë.

Në fund të takimit Kryeministri Haradinaj kërkoi nga të gjithë ministrat të përgatisin raporte të detajuara për punët në dikasteret përkatëse dhe gjatë muajit korrik t’i dorëzohen Kuvendit të Kosovës. 

Kalendari

Ngjarjet e datës 21 maj 2019 - Komisioni Qendror i Zgjedhjeve mban mbledhjen e radhës. (Selia e KQZ-së, ora 9:00)

- Komiteti për Politik dhe Financa i Komunës së Rahovecit mban mbledhjen e pestë të rregullt në të cilen shqyrton Qarkoren e parë buxhetore të Ministrisë së Financave. (Salla e mbledhjeve të Kuvendit të Komunës së Rahovecit, ora 10:00)

- Ministri i Punës dhe Mirëqenies Sociale, Skender Reqica dhe Avokati i Popullit raportojnë para komisionit për të Drejtat e Njeriut, Barazi Gjinore, për Persona të Pagjetur dhe Peticione lidhur me çështjen e statusit të personave të plagosur në Kosovë, para periudhës së luftës. (Ndërtesa e Kuvendit, salla N 302, ora 10:00)

- Forumi Ekonomik Mbarëkombëtar, në mbështetje të Klubit të Prodhuesve të Kosovës, Dhomës së Tregtisë dhe Industrisë në Tiranë, Odës Ekonomike të Kosovës dhe Bashkimit të Prodhuesve Shqiptarë organizon konferencën “Mundësitë dhe sfidat e marrëdhënieve tregtare Kosovë- Shqipëri”, konferencë kjo e cila do të adresojë problemet dhe barrierat tregtare që prodhuesit e dy të dy vendeve janë duke i hasur. (Hotel Tirana International në Tiranë, ora 10:30)

- “Let’s Do It” organizon aksion për pastrimin e deponisë më të madhe në Rajonin e Pejës, në fshatin Dydesh. (Fshati Dydesh, ora 10:30)

-  Projekti “Mbështetja e Komunikimit të Procesit të Integrimit Evropian”, I financuar nga Zyra e Bashkimit Evropian në Kosovë, në bashkëpunim me Ministrinë e Integrimit Evropian, organizon panel diskutimime temën: Prodhimi vendor dhe tregu i BE-së. (Ndërtesa e Kuvendit Komunal të Kamenicës, ora 10:30)

- Mbahet seancë e veçantë e Kuvendit të Republikës së Kosovës në të cilën do të përkujtohet 20 vjetori i Masakrës në Burgun e Dubravës. (Kuvendi i Kosovës, ora 11:00)

- Ministri i Mjedisit dhe Planifikimit Hapësinor, Fatmir Matoshi do të pres në takim kryetarët e komunave: Prizren, Podujevë, Shtërpc, Obiliq dhe Novobërdë, me të cilët do të nënshkruajë Memorandume të Bashkëpunimit për realizimin e disa projekteve mjedisore të cilat financohen nga Ministria e Mjedisit dhe Planifikimit Hapësinor. (Kabineti i Ministrit Matoshi, ish objekti Rilindja, kati 17, ora 11:00)

- Kryetari i komunës së Istogut, Haki Rugova pret në takim zëvendës ambasadorin bullgar në Kosovë ku do të bëje nënshkrimin e një marrëveshjeje për financimin e një projekti në qerdhën “Gëzimi Ynë” në Istog. (Zyra e krytarit Rugova, ora 11:30)

- Mbahet mbledhja e komisionit për Zhvillim Ekonomik, Infrastrukturë, Tregti, Industri dhe Zhvillim Rajonal në të cilën do të votohet vendimi i Qeverisë me të cilin autorizohet Komisioni Qeveritar për Privatizimin e Ndërmarrjes Publike "Telekomi i Kosovës". (Ndërtesa e Kuvendit, salla N 10, ora 12:00)

- Universiteti “Kadri Zeka” në Gjilan organizon promovimin e katër librave të profesorëve  të Fakultetit të Edukimit ne UKZ: “Poetika e këngës epike historike”  autore Nevrije Bislimi-Ismaili, “As engjëlli, as djall” autor  Merxhan Avdyli, “Kurrikula dhe të menduarit kritik” autor Mensur Neziri dhe libri “Kërkime në leksikun e Pjetër Bogdanit” i autorit Faton Krasniqi. (Salla A34 në Universitetin “Kadri Zeka” në Gjilan, ora 12:00)

- Mbahet mbledhja e komisionit për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit në të cilën do të shqyrtohet raportit vjetor i Komisionit Qëndror të Zgjedhjeve për vitin 2018, etj. (Ndërtesa e Kuvendit, salla C 203, ora 13:00)

- Kryetari i Komunës së Prizrenit Mytaher Haskuka do të bëjë përurimin e parkut dhe këndit të lojërave për fëmijë. (Prapa Shtëpisë së Bardhë në Prizren, ora 13:00) 

- Mbahet mbledhja e komisionit për Bujqësi, Pylltari, Zhvillim Rural, Mjedis e Planifikim Hapësinor në të cilën do të shqyrtohet Projektligjit për mbrojtjen e ajrit nga ndotja. (Ndërtesa e Kuvendit, salla N 303, ora 13:00)

- Ministri i Infrastrukturës dhe Transportit Pal Lekaj merrë pjesë në përurimin e urës së fshatit Topanicë, komuna e Kamenicës. (Fshati Topanicë, rruga Crep - Kamenicë, kilometri i parë, ora 15:00)

- Mbahet Akademi përkujtimore në nderim të 20 vjetorit të rënies së dëshmorëve Kemal Thaqi e Ekrem Gudaqi dhe martirëve të rënë më 21 maj të vitit 1999, Hanife Jaha, Selvije Krivanjeva, Hanife Gudaqi, Ramush Jaha, Baki Bela, Ibush Rrushi, Ramadan Dashi, Fahri Mani, Bahrije Elezi, Sevdije Guri, Hamdi Dashi, Brahim Dashi dhe Fitim Gudaqi. (Shtëpia e Kulturës “Xheladin Kurtaj” në Kaçanik 16:00)