19 Korrik 2019

BB miraton projektin prej 22 milionë euro për bizneset e vogla në Kosovë

Washington, 15 maj - Bordi i Drejtorëve Ekzekutivë të Bankës Botërore ka miratuar Projektin e Fuqizimit të Sektorit Financiar në Kosovë, për të përmirësuar qasjen në financa për Ndërmarrjet Mikro, të Vogla dhe të Mesme (NMVM), duke përfshirë bizneset fillestare, sipërmarrësit e rinj dhe bizneset në pronësi të grave, duke forcuar kapacitetin financiar dhe teknik të Fondit Kosovar për Garanci Kreditore (FKGK).

Mbështetja financiare për projektin është 22.3 milionë euro e barasvlershme me 25 milionë dollarë.

“Banka Botërore ka kënaqësinë të mbështesë përpjekjet e autoriteteve të Kosovës për të rritur qasjen në financa me qëllimin përfundimtar të rritjes së krijimit të vendeve të punës në sektorin privat”, tha Marco Mantovanelli, Menaxher i Bankës Botërore për Kosovën.

Përmes Ministrisë së Financave, projekti do t’i ofrojë fonde FKGK-së për të dhënë garanci kreditore për ta mbështetur qasjen në financa për NMVM-të.

Meqë ky lloj i bizneseve dominon ekonominë reale dhe tregun e punës, përmirësimi i qasjes së tyre në financa do ta mbështetë krijimin e vendeve të punës dhe rritjen ekonomike.

Me fokus në segmentet e nën-shërbyera dhe produktive të ekonomisë, projekti ka potencialin për të ndikuar drejtpërsëdrejti në uljen e varfërisë, veçanërisht në radhët e të rinjve dhe grave.

Aktualisht, disa NMVM të pranueshme për kreditim nuk kanë qasje në financa për shkak të kërkesave të larta për kolateral, mungesës së historisë kreditore, apo mungesës së raportimit financiar.

Projekti do të fokusohet në këto ndërmarrje krahas përmirësimit të kushteve financiare për ndërmarrjet të cilat tashmë kanë qasje në financa. Gjithashtu, projekti ka për qëllim t’i konsolidojë fondet e sektorit privat për financimin e NMVM-ve duke ofruar mbështetje për skemën e garancisë së pjesshme.

Projekti do ta mbështetë FKGK-në për të zhvilluar produkte enkas për bizneset në pronësi të grave, bizneset fillestare dhe sipërmarrësit e rinj, dhe për ta zhvilluar kornizën e monitorimit dhe vlerësimit për ta përcjellë ndikimin financiar dhe ekonomik të përfituesve të FKGK-së.

Projekti financohet me kredi nga Shoqata Ndërkombëtare për Zhvillim (IDA) e Grupit të Bankës Botërore. Kreditë e IDA-s jepen me kushte koncesionare me interes shumë të ulët dhe periudha të gjata të kthimit.

Financimi i këtij projekti ka afat maturimi prej 30 vjet, duke përfshirë një grejs periudhë 5-vjeçare.

FKGK, që është institucion vendor, i pavarur dhe i qëndrueshëm, për garanci kreditore, do të jetë përgjegjës për zbatimin e projektit.

FKGK gëzon autonomi të plotë operative dhe administrative. Ky Fond ofron garanci kreditore për Institucionet Financiare të Regjistruara për hua të përzgjedhura për NMVM-të.

 

Kalendari

Ngjarjet e datës 19 korrik 2019 - Ekipi i Luftimit të Brigadës së Këmbësorisë së 44-të, Garda Kombëtare e Ushtrisë së New Jersey do të marrë komandën e MNBG-E nga Ekipi i Luftës së Brigadës së 29-të të Mbrojtjes së Këmbësorisë, Gardës Kombëtare të Ushtrisë së Hawaii ku menjëherë pas ceremonisë do të mbahet një konferencë shtypi. (Camp Bondsteel, ora 9:00)

- Klinika e Kirurgjisë Vaskulare, në bashkëpunim me Katedrën e Kirurgjisë dhe Fakultetin e Mjekësisë mbajnë mbledhje komemorative, me rastin e vdekjes së Prof.dr. Gazmend Shaqiri. (Amfiteatri i Dekanatit të Fakultetit të Mjekësisë, ora 9:00)

- Komisioni për Shëndetësi, Punë dhe Mirëqenie Sociale i Kuvendit të Kosovës do të mbajë dëgjim publik për Projektligjin e Punës. (Hotel Sirius, ora 10:00)

- Mbledhja e komisionit për Mbikëqyrjen e Financave Publike në të cilën do të behët shqyrtimi i raportit të Auditimit të Kompanisë Regjionale 'KRU Prishtina', të Ndërmarrjes Publike ,,Posta e Kosovës", etj. (Ndërtesa e Kuvendit, salla N 302, ora 11:00)

- Kryeministri Ramush Haradinaj pret në takim një delegacion prej 56 studentësh të programit Akademia Verore, nga 28 shtete të ndryshme. (Ndërtesa e Qeverisë, ora 12:00)

- Grupi i Aktivisteve protestojnë para policisë në Fushë Kosovë për të mos lejuar që përdhunimet e vrasjet të fshihen brenda mureve të Policise dhe Prokurorise që sipas tyre më së paku i mbrojnë. (Marrshimi nis nga lagja Meshari te pazari për të vazhduar drejt stacionit policor në Fushë Kosovë, ora 14:00)

- Mbahet mbledhja e rregullt e Qeverisë së Kosovës. (Ndërtesa e Qeverisë, ora 15:00)
 
- Matt Taylor, regjisor i “Rick & Morty Exquisite Corpse”, prezanton filmat e animuar në kuadër të Festivalit Ndërkombëtarë të Filmit të Animuar - Anibar. (Kinema “Jusuf Gërvalla” në Pejë, ora 14:00)

- Në kuadër të aktiviteteve "Ditët e Diasporës 2019" në përkujdesjen e Kryetarit të Komunës së Deçanit, Bashkim Ramosaj në Deçan behët hapja e Panairit Verorë 2019. (Qendra e qytetit të Deçanit, ora 16:00)
 
- Fondacioni Lumbardhi prezanton ekspozitën 'Kino e artistit' Vladimir Miladinović. (Kinema Lumbardhi, ora 19:30)

- Fondacioni Lumbardhi organizon koncertin e këngëtares kroate te pop dhe jazz, Vesna Pisaroviç Quartet: "The Great Yugoslav Songbook". (Kinema Lumbardhi, ora 21:00)