02 Dhjetor 2020

Filloi konferenca e parë ndërkombëtare mbi Produktet Pyjore

Prishtinë, 23 shtator - E organizuar nga Ministria e Bujqësisë, Pylltarisë dhe Zhvillimit Rural, në bashkëpunim me Fakultetin e Shkencave Teknike të Aplikuara në Ferizaj dhe Universitetin e Shkencave të Aplikuara në Salzburg, përkatësisht Fakultetin e Teknologjisë dhe Konstruksioneve të Drurit, në objektin e Fakultetit e Filozofisë, filloi Konferenca e Parë Ndërkombëtare mbi Produktet Pyjore, Bioenergjinë dhe Mjedisin.

Në fjalën e rastit, ministri i MBPZHR-së z.Blerand Stavileci, tha se ndër komponentët më me rëndësi në zhvillimin e mëtutjeshëm të këtij sektori janë pikërisht edhe organizimet dhe bashkëpunimet e tilla, ngase nëpërmjet organizimeve të ngjashme bëhen edhe shkëmbime të përvojave dhe ngritet vetëdijesimi në masë.

“Organizimet me karakter të tillë ndërkombëtar kontribuojnë në zgjerimin dhe thellimin e njohurive dhe në mënyrë shkencore shtjellojnë edhe çështje të veçanta që kërkojnë zgjidhje racionale në të mirë të të gjithëve, si për njeriun dhe mjedisin në të cilën jeton, ashtu edhe për shfrytëzimin efiçient të resurseve pyjore”.

Duke shtuar më tej se, prezenca e profesorëve nga universitetet më me renome e bënë këtë konferencë një burim të vërtetë dijesh e njohurish për ligjet e zhvillimit të natyrës e të shoqërisë, të cilat janë formësuar kronologjikisht duke vëzhguar botën reale, jetën dhe zhvillimin ekonomik të shoqërive.

Po ashtu, ministri Stavileci tha se janë identifikuar faktorët krucial lidhur me fushat prioritare për ndërhyrje, të cilët do të determinojnë edhe prospektet e ardhshme zhvillimore të sektorit.

“Në shkurt të këtij viti, nga Qeveria e Kosovës është miratuar Strategjia për Zhvillimin e Pylltarisë 2010-2020, e cila shënon një moment të rëndësishëm dhe është në koherencë me objektivat për zhvillimin e qëndrueshëm ekonomik, social dhe mjedisor të Kosovës. Hapat e parë, si delegimi i kompetencave nga organet qendrore në ato lokale për menaxhimin me pyje veç kanë filluar të jenë rezultateve. Prandaj, jam plotësisht i bindur se zbatimi i kësaj strategjie do të na dërgoj në një gjendje, ku resurset pyjore do të menaxhohen dhe shfrytëzohen sipas konventave dhe deklaratave ndërkombëtare për shfrytëzim të qëndrueshëm të pyjeve”.

Ndërkaq, për rektorin i UP-së z.Mujë Rugova, mbajtja e kësaj konference në shtetin e Kosovës ka një rëndësi të veqantë jo vetem në aspektin ekonomik, por edhe në të gjitha aspektet, e në veqanti ngase përfshihet aspekti i mbrojtjes së mjedisit. “Ne si shtet kemi trashëguar një erozion të fuqishëm të shkatërrimit të pyjeve dhe pas lufte, jemi duke u përballur me prerje masive të pyjeve, të cilat jo vetëm që e zvogëlojnë potencialin drusor të Kosovës, por e varfërojnë fuqishëm paraqitjen e ujit nga burimet e perhershme”. Konferencat e tilla, sipas rektorit Rugova, ndikojnë në ndryshimin e qasjes ndaj kësaj dukurie negative.

Gjatë kësaj konference u shtjelluan tema të shumta, si: Resurset pyjore, qëndrueshmëria dhe zhvillimi ekonomik, të cilën e prezentoi Dr. Unal Asan nga Universiteti i Stambollit në Turqi. Pastaj, zinxhiri furnizues i produkteve pyjore u trajtua nga Dr. Gernot Standfest nga Universiteti i Shkencave të Aplikuara në Salzburg të Austrisë, prodhimi i energjisë termo dhe ndikimi i saj në mjedis u prezentua nga Dr. Marco Fioravanti nga Universiteti i Firencës në Itali, etj. Tema të ndryshme u shtjelluan edhe nga profesor të Fakultetit të Shkencave Pyjore të Universitetit të Bujqësisë në Tiranë, si dhe profesor të Universitetit të Prishtinës.

Konferenca do të zgjasë deri të premtën në orën 15:30 dhe gjatë kësaj dite do të vizitohet edhe ndërmarrja “Lin Projekt”, fabrika për përpunimin e drurit “Elnor”, si dhe zona pyjore “Blinaja” në komunën e Lipjanit.

Po ashtu, në po të njejtën ditë ministri Stavileci morri pjesë edhe në manifestimin tradicional “Dita e Mollës” në fshatin Kovragë të komunës së Burimit.

Duke iu drejtuar të pranishmëve, ministri Stavileci tha se bashkarisht kemi filluar një etapë të re, si në zhvillimin e sektorit të hortikulturës, ashtu edhe të sektorëve të tjerë. ”Vendi ynë ka potencial të fuqishëm në bujqësi, veçanërisht në prodhimtarinë e pemëve, perimeve dhe në prodhimtarinë e vreshtave, dhe Ministria e Bujqësisë vetëm gjatë këtij viti ka miratuar rreth 500 projekte për mbështetjen e këtyre prodhimtarive”.

Së bashku jemi duke hapëruar drejt realizimit të objektivave tona, shtoi ministri Stavileci, pas subvencionimit për ngritjen e rreth 15 hektarëve me pemishte të reja në nivel të shoqatës, ju kishit problemin e ruajtes së mollëve dhe këtë problem ua zgjodhi organizata Intercooperation, me të cilën tani jemi duke bërë dizajnimin e një plani më të mirë për ruajtjen e prodhimeve që juve do t’u krijonte mundësi edhe më të mira për rritje dhe ruajtje të prodhimtarisë, si dhe t’ua zgjaste edhe më shumë periudhen e shitjes.

Ndërsa, kryetar i KK-së së Burimit z.Haki Rugova, tha se e gëzon fakti që ka organizime të tilla, ku manifestohet rezultati i një punë intensive dhe shprehu gatishmërinë e mëtutjeshme për t’i mbështetur në këtë veprimtari.

Të pranishëm në këtë manifestim ishin edhe përfaqësuesit e kompanisë “Elkos Group”, të cilët nënshkruan edhe një kontratë për blerjen e mollëve nga Shoqata e Pemëtarëve të Kovragës “Pema”.

Ministria e Bujqësisë është duke e implementuar programin e granteve investuese për nënsektorët e hortikulturës, përkatësisht pemtarinë, perimtarinë dhe vreshtarinë dhe shuma e projekteve të miratuara deri me tani arrinë vlerën 2.587.177€, e cila nga ana e Ministrisë së Bujqësisë do të mbështetet në masën prej 50%.

Kalendari

Ngjarjet e datës 2 Dhjetor 2020

- Sindikata e Infermierëve të Kosovës do të zhvilloj një takim me Minsitrin e Shëndetësisë, Armend Zemaj lidhur me kërkesat për rritje të pagesës së ndërrimeve të natës për infermier, pagesë të orëve shtesë dhe punës gjatë vikendeve si dhe për pagesë të rrezikshmerisë në punë. (Ndërtesa e Ministrisë, ora 8:30)

-  Komisioni Hetimor Parlamentar lidhur me procesin e privatizimit në Kosovë cakton datat e intervistave për dëshmitarë. (Ndërtesa e Kuvendit, salla N303, ora 9:00)

- Kryetari i Komunës së Prizrenit, Mytaher Haskuka dhe drejtoresha e Drejtorisë Komunale e Arsimit, Xhemile Thaçi - Vezgishi, do të marrin pjesë në përurimin e fillimit të punimeve për ndërtimin e aneksit të objektit shkollor “Naim Frashëri” në fshatin Vlashnje. (Vlashnje, ora 10:00 - Nisja nga Shtëpia e Bardhë, ora 9:30)

- Gjykata Kushtetuese e Republikës së Kosovës do të mbajë seancë dëgjimore publike në të cilën do të shqyrtohet kërkesa KO95/20, që për objekt të shqyrtimit ka: “Vlerësimin e kushtetutshmërisë së Vendimit të Kuvendit të Republikës së Kosovës Nr.  07/V-15, të miratuar më 3 qershor 2020, përkitazi me zgjedhjen e Qeverisë së Kosovës”. (http://gjk-ks.org/live-streaming/, ora 10:00)

- Lëvizja FOL organizon diskutim online ku do të publikohet raporti “Dështimet e Kuvendit në Funksionalizimin e Agjencisë për Informim dhe Privatësi”. (Diskutimi mbahet online përmes platformës ZOOM, ora 10:00)

- Komisioni për Buxhet dhe Transfere shqyrton raportin vjetor financiar i Këshillit Gjyqësor të Kosovës, Këshillit Prokurorial të Kosovës, Komisionit Qendror të Zgjedhjeve dhe Komisionit për Ndihmë Shtetërore si dhe Raportit të Ndihmës Shtetërore. (Ndërtesa e Kuvendit, salla C203, ora 10:00)

- Me rastin e 76 vjetorit të lindjes së ish-Presidentit Historik të Kosovës Dr. Ibrahim Rugova, kryesia e LDK-së bën homazhe te varri i tij. (Velani, ora 10:30)

- Organizata për Rritjen e Cilësisë në Arsim publikon raportin "Integriteti akademik, publikimi shkencor dhe justifikimi i titujve akademikë në Universitetin e Gjakovës". (Zyra e ORCA-s afër Librarisë Buzuku, ora 11:00)

- Kryeministri Avdullah Hoti merr pjesë në ceremoninë e inaugurimit të Kompleksit Memorial ‘’Dr. Ibrahim Rugova’’. (Istog, ora 12:00)

- Baleti Kombëtar i Kosovës mban konferencë për media me rastin e Premierës së shfaqjes “Sisters”. (Teatri Kombëtar i Kosovës, ora 13:00)

- Partia Demokratike e Kosovës mban konferencë për media në të cilen do të flasë shefi i Grupit Parlamentar, njëkohësisht, anëtari i Kryesisë, Bedri Hamza. (Zyret e Selisë Qendrore, ora 13:30)  

-  Komisioni Hetimor Parlamentar në lidhje me menaxhimin e pandemisë së virusit COVID-I9 nga ana e Qeverisë së Republikës së Kosovës interviston drejtoreshën e Barnatores Qëndrore në SHSKUK-së, Gezime Pllana. (Ndertesa e Kuvendit, salla N303, ora 14:00)

- Mbahet ceremonia e nënshkrimit të marrëveshjeve të bashkëfinancimit në lidhje me “Thirrjen publike për subvencionim të NMVM-ve me pronësi të grave ndërmarrëse”, ku prezent do të jetë edhe ministri Vesel Krasniqi. (objekti i MTI-së, ora 14:00)

- Me rastin e fushatës "16 ditë aktivizëm për dhunën ndaj gruas", në bashkëpunim me UNDP-në do të bëhet ndriçimi i Shtëpisë së Bardhë ku do të jetë i pranishëm edhe kryetari i Komunës, Mytaher Haskuka dhe përfaqësuesja e Përhershme e UNDP-së në Kosovë, Maria Suokko. (Shtëpia e Bardhë në Pirzren, ora 16:00)