11 Dhjetor 2018

Agjencia për Zhvillimin e Bujqësisë fillon vlerësimin e 1642 projekteve bujqësore

Prishtinë, 7 qershor - Agjencia për Zhvillimin e Bujqësisë, e cila funksionon në kuadër të Ministrisë së Bujqësisë, Pylltarisë dhe Zhvillimit Rural ka filluar procesin e vlerësimit të 1,642 projekteve bujqësore të fermerëve dhe agrobizneseve vendore, të cilat presin mbështetje përmes masave mbështetëse të Programit për Bujqësi dhe Zhvillim Rural të vitit 2018.

Me rastin e fillimit të këtij procesi, ministri i MBPZHR-së, Nenad Rikalo bashkë me U.d e Kryeshefit Ekzekutiv të AZHB-së, Ekrem Gjokaj, kanë mbajtur një konferencë për media, me ç‘rast edhe kanë treguar se Ministria e Bujqësisë, përveç se ka rritur buxhetin për Programin për Bujqësinë dhe Zhvillimin Rural të vitit 2018, e ka rritur edhe transparencën në procesin e vlerësimit të projekteve bujqësore, si dhe ka krijuar lehtësira në disa kritere për aplikim për fermerët.

Ministri i Bujqësisë, Nenad Rikalo, ka thënë se për Programin për Bujqësi dhe Zhvillim 2018, si dhe për masat tjera për investime në infrastrukturën rurale dhe për investimet në zonat e thella rurale, MBPZHR-ja ka planifikuar një buxhet prej 27 milionë euro.

“Mund të ju them se prej fillimit të hartimit të Programit për Bujqësi dhe Zhvillim Rural 2018 jemi u munduar që të përfshijmë sa më shumë akter në përpilimin e tij, duke krijuar në këtë mënyrë edhe shumë lehtësira për fermerët, të cilët aplikojnë për të përfituar grante investive."

"Po ashtu në këtë proces një punë shumë të mirë e ka bërë edhe Departamenti për Politika të Zhvillimit Rural. Prandaj, duke pasur parasysh gjitha këto, besoj që implementimi i këtij programi do të jap rezultate konkrete në zhvillimin ekonomik të vendit”, theksoi ministri Rikalo.

Ai po ashtu, ka treguar se procesi për implementimin e këtij programi, që nga fillimi deri në mbarim do të jetë i hapur dhe transparent dhe për këtë shtoi se do të përkushtohen maksimalisht në çdo kohë.

Gjithashtu, ministri Rikalo ka njoftuar se krahas këtyre programeve aktuale, tashmë janë afër nënshkrimit të një marrëveshje me USAID-in për financimin e projekteve të përbashkëta bujqësore për sektorin e pemëve të imta dhe sektorin e bimëve mjekësore dhe aromatike, e që sipas tij ky do të jetë një program shumë atraktiv dhe i kapshëm për fermerët e vendit.

Në anën tjetër, U.d i Kryeshefit Ekzekutiv të AZHB-së, Ekrem Gjokaj, ka njoftuar se organi implementues i Programit për Bujqësi dhe Zhvillim Rural, i ka ndërmarrë të gjitha masat që gjatë tërë kohës të ketë një vlerësim të drejtë dhe transparent.

“Ky vit dallon prej viteve tjera, jo vetëm, për shkak të ndërrimit të strukturës organizative, por edhe mënyrës së përgatitjes së Programit për Bujqësi dhe Zhvillim Rural, pasi në të jemi munduar të përfshijmë të gjitha kërkesat që i kemi marrë nga fermerët."

"Po ashtu ne do të jemi të hapur gjatë gjithë kohës në shërbim të fermerëve dhe palëve tjera me interes duke përfshirë edhe shoqërinë civile, ku kjo po dëshmohet edhe sot ku po demonstrojmë edhe fillimin e procesit të vlerësimit të aplikacioneve të granteve live para mediave dhe shoqërisë civile, gjë që nuk është bërë më parë”, ka thënë Gjokaj.

Programi i këtij viti, sipas tij do të shkojë në favor të zhvillimit bujqësor të vendit, gjë që do të ndikojë edhe në zhvillimin ekonomik të vendit.

Me këtë rast, ekipi vlerësues i projekteve të zhvillimit rural, para të pranishmëve në konferencën për media, kanë demonstruar në mënyrë të detajuar dhe transparente procesin  e vlerësimit të aplikacioneve.

 

Kalendari

Ngjarjet e datës 11 dhjetor 2018 - Organi Shqyrtues i Prokurimit fillon me transmetim të drejtpërdrejtë “live stream” të sesioneve të tij, një hap ky në drejtim të një qasjeje më transparente nga ana e këtij institucioni. (Zyra e Organit Shqyrtues të Prokurimit, ish-Banka e Lubjanës, kati i 5-të, ora 10:00)

- Koalicioni i OJQ-ve “Java Kundër Korrupsionit 2018” do të mbajë tryezën e diskutimit me temë “Zbatimi i Ligjit për Parandalimin e Konfliktit të Interesit në ushtrimin e funksionit publik në pushtetin legjislativ”. (Hotel Sirius, ora 10:00)

- Shoqata “Miqtë e Amerikës” dhe Komuna e Gjakoves hapin Librin e Zisë, në nderim të Presidentit George H.W. BUSH. (Pallati i Kulturës "Asim Vokshi" në Gjakovë, ora 10:00)

- Në kuadër të Fushatës “Ta Pastrojmë Kosovën” do të organizohet aksion pastrimi në Komunën e Rahovecit. (Rruga kryesore në fshatin Zaqisht të Rahovecit, ora 10:00)

- Shefi i Zyrës së BE-së, Nataliya Apostolova, do të diskutojë me nxënësit e shkollave të mesme me temë "Të mbështesë ndryshimin kulturor: roli i gjeneratave të reja për formësimin e vlerave të së nesërmes".  (Kafiteria Dit' e Nat', ora 10:00)

- Kompania vendore 'Produktet Natyrale të Kosovës' organizon ceremoninë e inaugurimit të linjës së re me teknologji të avancuar për përpunimin e farave të kungullit. (Fabrika 'Produktet Natyrale të Kosovës' në fshatin Loxhë në Pejë, ora 11:00)

- Sindikata e Pavarur e Sektorit Privat të Kosovës të mbajë konferencë për shtyp lidhur me gjendjen e punëtorëve të sektorit privat. (Zyret te BSPK, së ora 11:00)

- Instituti Demokraci për Zhvillim organizon ngjarjen vjetore të shpërblimeve në kuadër të projektit “Leja prindërore për barazi gjinore” që financohet nga Qendra Ndërkombëtare Olof Palme dhe mbështetet nga Qeveria Suedeze. (Libraria Dukagjini, ora 11:00)

- Mbahet tryeza në të cilën do të diskutohet për pakon ligjore kundër korrupsionit, si dhe për punën e institucioneve të drejtësisë në luftën ndaj krimit të organizuar dhe korrupsionit. (Ndërtesa e Kuvendit, salla C-405, ora 11:00)

- Asociacioni i Arkitektektëve të Kosovës dhe Komunës së Gjilanit bën prezantimin e “Bienales së Arkitekturës 2018”, ku do të marrin pjesë edhe përfaqësuesit e Komunës së Gjilanit dhe arkitektët në nivel Kosove dhe ata regjional. (Gjilan, ora 13:00)

- Instituti për Politika Zhvillimore organizon konferencën për shtyp me temë “Standardizimi i produkteve vendore: Shpërndarja dhe shitja e standardeve. (Resource Center Kosovo, në lagjen Pejton, në zyre të Forumit për Iniciativa Qytetare, ora 13:00)

- Koalicioni i OJQ-ve “Java Kundër Korrupsionit 2018” do të organizoj tryezen e diskutimit me temë “Zbatimi i Ligjit për Parandalimin e Konfliktit të Interesit në ushtrimin e funksionit publik në pushtetin ekzekutiv”. (Hotel Sirius, ora 14:00)

- Mbahet mbledhja e rregullt e Qeverisë së Republikës së Kosovës. (Ndërtesa e Qeverisë, ora 14:00)

- Partia Socialdemokrate mban konferencë për media lidhur me çështjen e dialogut me Serbinë, për të cilën do të flasin nënkryetarët Visar Ymeri dhe Dukagjin Gorani. (Zyrat e PSD-së, në lagjen "Arbëria", ora 14:00)

- Ministria e Administrimit të Pushtetit Lokal në prag të përfundimit të vitit 2018, organizon ngjarjen vjetore për shënimin e të arriturave në vetëqeverisjen lokale në Kosovë si dhe të prezantojë orientimet për vitin e ardhshëm. (Sheshi 21, ora 18:00)