10 Dhjetor 2018

Ministri Pacolli pritet nga udhëheqësit më të lartë të shtetit të Iowa-s

Iowa, 12 janar - Zëvendëskryeministri i Parë dhe Ministri i Punëve të Jashtme, z. Behgjet Pacolli, në kuadër të vizitës së tij në Shtetet e Bashkuara të Amerikës, respektivisht në shtetin e Iowa-s është pritur në takime të ndara nga udhëheqësit më të lartë të këtij shteti, Universitete e shkolla profesionale, ndërkohë që ka marrë njohje të veçantë për vizitën e tij edhe nga Dhoma e Përfaqësuesve.
 
Kreu i Diplomacisë kosovare fillimisht është pritur nga Komiteti i Iowa-s për Marrëdhënie Ndërkombëtare, për të vazhduar më pas me Guvernatorën e këtij shteti, Kim Reynolds, Sekretarin e Shtetit, Paul Pate, Kryetaren e Dhomës së Përfaqësuesve, Linda Upmeyer dhe Sekretarin e Bujqësisë, Bill Northey.

Në të gjitha këto takime janë vlerësuar marrëdhëniet e shkëlqyera në mes dy shteteve simotra – Kosovës dhe Iowa-s, me zotimet e shprehura nga të dyja palët për zgjerimin dhe thellimin e mëtejmë të këtyre marrëdhënieve.
 

“Kemi biseduar për marrëdhëniet bilaterale në mes të dy shteteve tona simotra, planet e përbashkëta në fushën e ekonomisë, arsimit, bujqësisë si dhe disa veprimet strategjike në interes të Republikës së Kosovës dhe qytetarëve tanë."

"Ekzistojnë shumë mundësi përpara dhe përplot potenciale ende të pashfrytëzuara. Unë dua të shoh kompanitë multinacionale si John Deer apo Pionner edhe në Kosovë. Iowa duhet të shërbejë model për Kosovën në sektorin e bujqësisë."

"Është shteti më i njohur në ShBA për modernizimin dhe produktivitetin në bujqësi. Ne duhet të marrim si shembull përvojën e tyre në bujqësi. Presim investime dhe prezencë më të madhe të kompanive nga Iowa në Kosovë, që do të ndikonin në modernizimin dhe produktivitetin edhe të sektorit të bujqësisë në vendin tonë. Duhet të zgjerojmë më tutje bashkëpunimin edhe në fushën e arsimit”, ka thënë Zëvendës-Kryeministri dhe Ministri i Jashtëm Pacolli.

Në kuadër të vizitës së tij të parë në këtë shtet, Ministri i Jashtëm Pacolli ka vizituar dhe ka mbajtur fjalime edhe në Universitetet dhe Shkollat më të njohura profesionale të këtij shteti.

Kryediplomatit kosovar Pacolli i është bërë njohje e veçantë edhe në kuadër të mbajtjes së punimeve të Dhomës së Përfaqësuesve të këtij shteti.

Për këtë ceremoni solemne, ju lutem shikoni videon e bashkangjitur.  

 

Kalendari

Ngjarjet e datës 10 dhjetor 2018 - Ambasador i Shteteve të Bashkuara të Amerikës, Philip S. Kosnett së bashku me ambasadorët e Mbretërisë së Bashkuar, Italisë dhe Francës,  të ngarkuarin me punë të ambasadës gjermane, Kryesuesen e Zyrës së BE-së në Kosovë, si dhe një përfaqësues të organizatës Iniciativa për Progres do të flasin gjatë hapjes së Javës kundër korrupsionit në Kosovë. (Sirius Hotel, ora 9:30)

- Koalicioni i Organizatave për Mbrojtjen e Fëmijëve organizon konferencën për avancimin e shërbimeve shëndetësore dhe rehabilituese për fëmijë. (Hotel Sirius, ora 10:00)

- Mbahet konferenca e Forumit të Rinisë së LDK-së me temën “Pa-siguria Sociale dhe Ekonomike e të Rinjve në Kosovë”. (Hotel Sirius, ora 10:00)

- Ministria e Drejtësisë, Zyra e Koordinatorit Nacional kundër Dhunës në Familje, organizon konferencën “Qasja në drejtësi e viktimave të dhunës në familje dhe dhunës në baza gjinore”. (Hotel Emerald, ora 10:00)

- Kryeministri Ramush Haradinaj merr pjesë në Konferencën Rajonale "Qasja në drejtësi për viktimat e dhunës në familje dhe dhunës në baza gjinore". (Hotel Emerald, ora 10:00)

- Mbahen punimet e Forumit Kosovaro-Maqedonas të Sigurisë 2018, që organizohet nga Fondacioni “Konrad Adenauer Stiftung”, Kolegji AAB dhe Universiteti Kliement Ohridski, Fakulteti i Sigurisë, Shkup. (Kolegji AAB, ora 10:00)

- Klubi Dëshira organizon promovimin e programit të Ndërmarrjes Sociale Dëshira. (Hotel Prishtina, ora 10:00)

- Institucioni i Avokatit të Popullit në bashkëpunim me organizatat joqeveritare dhe shoqërinë civile të Kosovës organizojnë aktivitetin “Çohu për të Drejtat e Njeriut” për shënimin e 10  dhjetorit, Ditës Ndërkombëtare për të Drejtat e Njeriut.​  (Teatri Kombëtar të Kosovës, ora 10:30)

- Mbahet mbledhja e Komisionit për Zhvillim Ekonomik, Infrastrukturë, Tregti, Industri dhe Zhvillim Rajonal në të cilën do të behët shqyrtimi i Projektligjit për Ratifikimin e Marrëveshjes për Protokollin Shtesë 5 të Marrëveshjes për Amendimin dhe Aderimin në Marrëveshjen e Tregtisë së Lirë të Evropës Qendrore si dhe shqyrtimi i vendimit të Qeverisë për emërimin e anëtarëve të Bordit të Agjencisë Kosovare të Privatizimit. (Ndërtesa e Kuvendit, salla N 303, ora 11:00)

- Në kuadër të Javës Kundër Korrupsion, Demokraci Plus organizon debatin publik në lidhje me gjetjet e monitorimit të prokurimit publik në Komunën e Vushtrrisë. (Restaurant Holiday, ora 11:00)

- Muzeu i Kosovës për nder të ditës ndërkombëtare të drejtave të njeriut do të bëjë promovimin e katalogut me imazhe taktile dhe të përkthyer në Brail në bashkëpunim me shoqatat e të verbërve në Kosovë. (Muzeu i Kosovës, ora 11:00)

- Koalicioni i OJQ-ve “Java Kundër Korrupsionit 2018” organizon tryezën e diskutimit me temë “Parandalimi dhe luftimi i konfliktit të interesit në pushtetin gjyqësor”. (Hotel Sirius, ora 11:00)

- Koordinatori Nacional për Kulturë, Rini dhe Sport në Qeverinë e Republikës së Kosovës, Rexhep Hoti do të nënshkruajë marrëveshje bashkëpunimi me kryetarin e Komunës së Klinës Zenun Elezaj. (Objekti i Komunës së Klinës, ora 11:30)

- Institucioni i Avokatit të Popullit në bashkëpunim me organizatat joqeveritare dhe shoqërinë civile të Kosovës organizojnë marshin “Çohu për të Drejtat e Njeriut”, i cili fillon nga sheshi “Skënderbeu” deri te sheshi “Zahir Pajaziti”. (Sheshi “Skënderbeu”, ora 12:00)

 - Mbahet mbledhje e Komisionit për Arsim, Shkencë, Teknologji, Kulturë, Rini, Sporte, Inovacion dhe Ndërmarrësi në të cilën do të behët shqyrtimi në parim i Projektligjit për Arsimin e Lartë në Republikën e Kosovës(Ndërtesa e Kuvendit, salla N 303, ora 13:00)

- Koordinatori Nacional për Kulturë, Rini dhe Sport në Qeverinë e Republikës së Kosovës, Rexhep Hoti do të nënshkruajë marrëveshje me kryetarin e Komunës së Junikut Agron Kuçi. (Objekti i Komunës së Junikut, ora 13:30)

- Me rastin e 10 Dhjetorit, Ditës Ndërkombëtare të të Drejtave të Njeriut, Kolegji AAB në bashkëpunim me KMDLNJ organizojn tryezë që i kushtohet Adem Demaçit, fitues i Çmimit Saharov dhe çmimeve të tjera ndërkombëtare për të drejtat e njeriut. (Qendra Mediale e Kolegjit AAB, ora 14:00)

- Me rastin e 10 dhjetorit, Ditës ndërkombëtare të të Drejtave të Njeriut, Misioni i OSBE-së në Kosovë do të organizojë sot një ekspozitë me fotografi dhe poezi, vepra te artistëve të rinj që morën pjesë në konkursin e Misionit të titulluar “Të drejtat e njeriut përmes artit”.  (Lapidariumi i Muzeut të Kosovës, ora 15:00)

- Qendra Kinematografike e Kosovës në bashkëpunim me Shtëpinë e Kulturës në Bujanoc organizojn Javën e Filmit të Kosovës në Bujanoc. (Shtëpia e Kulturës në Bujanoc, ora 17:00)

- Mbahet ceremonia e dorëzimit të çmimit që shënon Ditën Ndërkombëtare Kundër Korrupsionit për të falenderuar publikisht kontributet e gazetarëve të guximshëm të cilët zbulojnë rastet e korrupsionit dhe për të rritur ndërgjegjësimin përmes tregimeve të tyre. (Grand Hotel, ora 17:30)