22 Maj 2018

Fillon Muaji i Kosovës në Japoni

Tokio, 11 maj - Ambasada e Republikës së Kosovës në Tokio me përkrahje dhe në bashkëpunim me Agjencinë Japoneze për Bashkëpunim Ndërkombëtar (JICA) organizojnë “Muajin e Kosovës në Japoni” nga 3 maji deri më 2 qershor 2018, në JICA Global Plaza.

Në kuadër të këtij muaji organizohen disa aktivitete për të shënuar 10 vjetorin e Pavarësisë së Republikës së Kosovës.

Ky muaj do të lancohet me një ekspozitë të veçantë të titulluar “Preke një pjesë të kulturës kosovare”.

Kjo ekspozitë përmban veshje tradicionale, çiftelinë, plisin, artefakte, dhe produkte tjera autentike nga Kosova së bashku me video që fokusojnë kulturën, ushqimin dhe atraksionet turistike.

Në kënd fëmijët gjithashtu mund të ngjyrosin flamurin e Kosovës në fletat dhe me ngjyrat e ofruara. Kjo ekspozitë do të hapet nga 3 maji deri më 2 qershor 2018.

Një ekspozitë e fotografive e titulluar “Kosova e bukur” do të jetë e hapur nga 15 deri më 28 maj ku janë eksponuar 30 fotografi nga artistë kosovar që shfaqin të vjetrën dhe të renë, kalatë, qytetet, rrugët, artistët, veshjet, traditat, festivalet dhe jetën e përditshme në Kosovë.

Dy seminare do të ofrohen nga japonezë të cilët kanë përvoja dhe njohuri të shumta për Kosovën. Seminari i parë, më 9 maj, titullohet “Kosova, një destinacion gastronomik!” i cili fokusohet në ushqimin autentik, pijet vendore dhe atraksionet turistike, pasuar nga një degustim i verërave kosovare.

Prezantuesit do të jenë z. Akira Yokochi, ish zyrtar i UNMIK-ut në qytetin e Prizrenit, dhe znj. Yumi Yasuda, ish-eksperte e JICA-së në Ministrinë e Integrimeve Europiane të Kosovës.

Seminari i dytë, më 17 maj fokusohet në kulturë dhe turizëm me prezantim nga Prof. Keiichi Kubo nga Universiteti Waseda.

Të dy seminaret hapen me fjalë mirëseardhje nga ambasadori i Republikës së Kosovës si dhe nga zyrtarë të lartë të Ministrisë së Punëve të Jashtme të Japonisë dhe Agjencisë Japoneze për Bashkëpunim Ndërkombëtar (JICA).

Përgjatë këtij muaji, ushqimi kosovar do të shërbehet në J Café në JICA (nga 7 maj deri më 2 qershor) gjatë drekës, me meny që përfshin speca të mbushur, pire me mish dhe qebapa.

Kjo është një mundësi e mirë për ata të interesuar në shijimin e praktikave të gatimit dhe traditave me stil karakteristik kosovar. Secili që vjen për drekë mund të merr me vete një kartolinë me receta të shtypura gatimi që të përgatisë ushqimin kosovar edhe në shtëpi. ​ 

Kalendari

Ngjarjet e datës 22 Maj 2018 - Ministri i Arsimit, Shkencës dhe Teknologjisë, Shyqiri Bytyqi, do të vizitojë komunën e Kaçanikut, ku do të takohet me kryetarin e Komunës, Besim Ilazi. (Zyra e kryetarit Ilazi, ora 9:00)

- Ministri i Arsimit, Shkencës dhe Teknologjisë, Shyqiri Bytyqi, do të vizitojë shkollën fillore dhe të mesme të ulët “Jusuf Gërvalla” në Biqec. (Objekti i shkollës në Biqec, ora 9:45)

- Instituti për Politika Zhvillimore organizon tryezën ”Sistemi Pensional në Kosovë: sfidat dhe mundësitë”. (Hotel Sirius, ora 10:00)

- Në kuadër të kampanjës “Drejtësia dhe biznesi” Ministri i Drejtësisë, Abelard Tahiri, së bashku me përfaqësues nga KIESA dhe Oda Ekonomike Amerikane, do të takojnë bizneset nga rajoni i Mitrovicës. (Hotel Palace në Mitrovicë, ora 10:00)

- Mbahet mbledhja e Komisionit për Mbikëqyrjen e Financave Publike në të cilen do të behët shqyrtimi i raportit të Auditimit për PVF-të e Autoritetit të Aviacionit Civil, shqyrtimi i raportit të Auditimit për PVF-të e Organit Shqyrtues të Prokurimit, etj. (Ndërtesa e Kuvendit, salla N 303, ora 10:00)

- Komisioni për të Drejtat e Njeriut, Barazi, Gjinore, Persona të Pagjetur dhe Peticione, nesër, më 22 maj 2018, viziton Burgun e Dubravës, me rastin e shënimit të përvjetorit të masakrës së vitit 1999. (Dubravë​, ora 10:15)

- Ministri i Arsimit, Shkencës dhe Teknologjisë, Shyqiri Bytyqi, do të vizitojë shkollën e mesme “Feriz Guri dhe Vëllezërit Qaka”. (Objekti i shkollës, ora 10:30)

- Oda Ekonomike e Kosovës publikon studimin “Bottleneck” me qëllim identifikimin e barrierave që pengojnë të bërit biznes në vendin tonë. (Oda Ekonomike e Kosovës, ora 11:00)

- Nënshkruhet memorandum bashkëpunimi mes MKRS-së dhe OJQ George Williams Youth Association in Kosovo me qëllim financimi në projektin “Qendra e edukimit jo-formal për rini” me lokacion në fshatin Pjetërshan në komunën e Gjakovës. (Ministria e Kultures, Rinise dhe Sportit, ora 11:00)

- Mbahet mbledhja e Komisionit për Zhvillim Ekonomik, Infrastrukturë, Tregti, Industri dhe Zhvillim Rajonal në të cilen do të behët shqyrtimi i Raportit vjetor të Komisionit të Pavarur për Miniera dhe Minerale, shqyrtimi i Projektligjit për Masat Mbrojtëse në Importe, etj. (Ndërtesa e Kuvendit, salla N204, ora 11:00)

- Me rastin e shënimit të 19-vjetorit të masakrës së Dubravës bëhen homazhe në nderim të burgosurve të vrarë në burgun e Dubravës nga forcat paramilitare serbe. (Dubravë, ora 11:00)

- Kryetari i Gjilanit, Lutfi Haziri, pret në takim futbollistët e FC Drita, të cilët të dielën u shpallën kampion. (Zyra e Kryetarit, objekti i ish-gjykatës, ora 12:00)

- Ambasadori i Republikës së Shqipërisë në  Kosovë, Qemal Minxhozi viziton komunën e Dragashit, ku do të pritet nga kryetari i komunës, z. Shaban Shabani (Komuna e Dragashit, ora 12:30)

-  Ministri për Punë dhe Mirëqenie Sociale, Skender Reçica dhe Ministri për Komunitete dhe Kthim, Dalibor Jetviq raportojn para Komisionit për të Drejtat, Interesat e Komuniteteve dhe për Kthim lidhur me implementimin e projektit për ndërtimin e shtëpive për komunitetin joshumicë. (Ndërtesa e Kuvendit, salla N 303, ora 13:00)

- Ministrja e Mjedisit dhe Planifikimit Hapësinor Albena Reshitaj do të vizitojë komunën e Vitisë, ku bashkë me kryetarin e komunës do të nënshkruajnë një memorandum bashkëpunimi për realizimin e një projekti në fushën e mjedisit. (Objekti i komunës së Vitisë, ora 13:00)

- Zëvendëskryeministri i Kosovës, Fatmir Limaj bashkë me shefen e Zyrës së BE-së në Kosovë, Natalyia Apostolova dhe Ambasadorin e Republikës së Shqipërisë në Kosovë, Qemal Minxhozi, marrin pjesë më inaugurimin e rrugës Krushevë-Shishtavec, e financuar nga BE.. (Krushevë, Komuna Dragashit, ora 15:00)

- Shefja e Zyrës së BE-së në Kosovë, Natalia Apostolova së bashku me autoritetet e Kosovës do të përurojnë rrugën e ndërtuar rishtas midis Krushevës dhe Shishtavecit, që lidh Kosovën dhe Shqipërinë, të financuar nga Bashkimi Evropian. (Vendkalimi kufitar mes fshtarave Krushevë dhe Shishtavec Komuna e Dragashit, ora 15:00)

- Drejtori i misionit të USAID-it Xhejms Houp do të flasë me rastin e ceremonisë zyrtare që do të shënojë partneritetin me Cacttus Education. (Cacttus Education, rr. Bashkim Fehmiu. Arberia 3, BC2/11, nr. 4,  ora 16:45)

- Dega e OVL te UÇK-së në Kaçanik në bashkëpunim me SHIL, SHFD, institucionet komunale organizon orë përkujtimore me rastin e 19 të rënies heroike të dëshmorëve: Danush Kurtaj, Mejdi Dalloshi, Tefik Raka, Avdylgafurr Luma dhe Suad Brava, të rënë në Masakrën e Dubravës së Istogut me 22 maj ’99. (Shtëpia e Kulturës “Xheladin Kurtaj” në Kaçanik, ora 17:00)

- Bëhen homazhe me rastin e 19 të rënies heroike të dëshmorëve të rënë në Masakrën e Dubravës së Istogut me 22 maj ’99. (Varrezat e dëshmorëve dhe martirëve, ora 18:30)