17 Korrik 2018

Europol: Kërcënimet terroriste ende të larta me gjithë humbjet e IS-it në terren

Bruksel, 22 qershor - Agjencia policore evropiane Europol, tha në raportin e fundit mbi terrorizimin se nuk ka pasur kthim të madh të luftëtarëve evropian që shkuan për të luftuar përkrah grupit militant Shteti Islamik në Lindjen e Mesme, por ata kanë frymëzuar sulme brenda kontinentit.

Në raport thuhet se 68 veta kanë humbur jetën në vitin 2017 nga sulmet terroriste që lanë pas vetes edhe 844 të plagosur.

Sipas raportit, "nëntë shtete anëtare të Bashkimit Evropian raportuan 205 sulme të dështuara dhe të jetësuara në vitin 2017, që paraqiste një rritje prej 45 për qind në krahasim me vitin 2016. Gjatë vitit 2017 janë arrestuar 975 individë nën dyshimet për lidhje me terrorizmin.

Manuel Navarrete, shef i Qendrës kundër terrorizimit në EUROPOL, tha se "kërcënim kryesor janë luftëtarët e kthyer, ndonëse numri i të kthyerve është i vogël".

Sipas tij, viteve të fundit janë nxitur sulme të "ujqërve të vetmuar" që përdorin një thikë apo një makinë. Ato ishin më pak vdekjeprurëse, por më të vështira për t'u ndjekur nga policia, tha ai.

Nga më shumë se 5 mijë evropianç, pjesa më e madhe nga Britania, Gjermania e Belgjika, që u bashkuan më ISIS-in në Siri dhe Irak, rreth 1 mijë e 500 janë kthyer dhe 1 mijë janë vrarë. Ka pak të dhëna për fatin e të tjerëve thuhet në raport.

Asnjë nga vendet e Ballkanit Perëndimor nuk ka raportuar për akte terroriste në truallin e tyre gjatë vitit 2017.

Kosova ka raportuar rënie të propagandës dhe nuk ka pasur raste të mbështetjes financiare apo logjistike për grupet terroriste, ndonëse vendi është i shqetësuar lidhur me kthimin e luftëtarëve të huaj.

Në vitin 2017 autoritetet e Kosovës hapën 54 raste nën dyshimet për përfshirje në veprimtaritë terroriste në Irak dhe Siri.

Këto përfshijnë raste në të cilat nuk ka pasur dëshmi për përfshirjen e shtetasve të saj në luftimet në zonat e konfliktit.

Arrestimet e bëra në Kosovë bazoheshin kryesisht në dyshimet për përfshirje në aktivitetet propagandistike, thuhet në raportin e EUROPOL-it.

Kalendari

Ngjarjet e datës 17 Korrik 2018 - Përkujtohet 20 vjetori i rëniës se dëshmorëve të Ushtrisë Çlirimtare të Kosovës, Bashkim Kerolli dhe Adem Ademi. Te vendi i quajtur Rrasa e Zogut të kufiri Shqipëri - Kosovë, ora 10:00 - nisja behet nga fshati Polac, ora 8:00) 

- Mbahet mbledhja e Komisionit për Administratë Publike, Qeverisje Lokale dhe Media në të cilën do të shqyrtohet projektligji për lirinë e asociimit në Organizata Joqeveritare. (Ndërtesa e Kuvendit, salla N 225, ora 10:00)

- Mbahet ceremonia e inaugurimit te impiantit të trajtimit të ujërave të zeza në fshatin Mramor. (Bregu lindor i Liqenit të Badocit pranë fshatit Mramor, ora 10:00)

- Kryeministri Ramush Haradinaj pret në takim përfaqësues të projektit të GIZ-it gjerman dhe nxënës nënshkrues të peticionit për ngritjen e kapaciteteve në arsim. (Ndërtesa e Qeverisë, ora 10:30)

- Mbahet mbledhja e Komisionit për Zhvillim Ekonomik, Infrastrukturë, Tregti, Industri dhe Zhvillim Rajonal në të cilën do të shqyrtohet projektligji për Produkte të Ndërtimi. (Ndërtesa e Kuvendit, salla N 10, ora 11:00)

- Oda Ekonomike e Kosvës organizon takim me delegacionin e organizatës prestigjioze “The Heritage Foundation”. (Objekti i Odës Ekonomike të Kosovës, ora 14:00)

- Zyra e Bashkimit Evropian në Kosovë/BE, së bashku me Këshillin Gjyqësor të Kosovës, do të fillojë zyrtarisht procesin e digjitalizimit të shënimeve të dënimeve të vjetra në tërë Kosovën. (Hotel Swiss Diamond, ora 14:00)

- Kryeministri Ramush Haradinaj merr pjesë në mbledhjen e Qeverisë së Republikës së Kosovës. (Ndërtesa e Qeverisë, ora 14:00)

- Kryeministri Ramush Haradinaj merr pjesë në ceremoninë e nënshkrimit, me rastin e blerjes së automjeteve multi funksionale ushtarake të lëvizshmërisë së lartë nga Qeveria e Kosovës për Forcën e Sigurisë së Kosovës. (Kazerma Adem Jashari në Prishtinë, ora 16:00)