07 Dhjetor 2021

Universitetet publike më pak transparente ndaj publikut

Prishtinë, 19 tetor - 4 prej 7 universiteteve publike në Kosovë kanë pësuar rënie të transparencës formale apo publikimit të dokumenteve dhe informacioneve të nevojshme për publikun. 

Në këtë hulumtim apo matje, ORCA ka grumbulluar të dhëna mbi ekzistencën e njëzet e shtatë (27) dokumenteve dhe informacioneve të cilat janë publikuar ose do të duhej të publikoheshin nga ana e shtatë universiteteve publike, të cilat përbëjnë informacionin më bazik rreth funksionimit të tyre.

Këtë matje ORCA e ka bërë 5 herë brenda 3 viteve të fundit, dhe megjithëse ka pasur përmirësime në matjet e kaluara, këtë vit janë vetëm dy universitete që janë përmirësuar, ndërsa tjerat janë më pak transparente se në matjet e kaluara. 

Kjo është për shkak të neglizhencës dhe mosinteresimit të universiteteve, por gjithashtu edhe për shkak të ndërrimit të vazhdueshëm të uebfaqeve të tyre. 

Universiteti i Prishtinës ka qenë i vetmi universitet matjen e kaluar që ka pasur të gjitha dokumentet e publikuara, ndërsa tash ka vetëm 25 nga 27. 

Universiteti më jo transparent vazhdon të jetë Universiteti i Ferizajit, me vetëm 15 dokumente të publikuara. 

Gjithmonë ka qenë shqetësuese mungesa e dokumenteve të publikuara, por fakti që janë përmirësuar në të kaluarën, dhe tash ka rënie të transparencës, bën të qartë faktin që universitetet janë qëllimisht jo-transparente ndaj publikut. 

Linku i raportit: http://orca-ks.org/wp-content/uploads/2021/10/Mosinformimi-i-Publikut-3.pdf 

Kalendari

Ngjarjet e datës 7 dhjetor 2021

- Zyra e Rregullatorit për Energji organizon konferencën për integrimin e tregut të energjisë elektrike. (Hotel “Swiss Diamond”, ora 9:00)

-  Komisioni për Administratë Publike, Pushtet Lokal, Media dhe Zhvillim Rajonal shqyrton në parim i Projektligjit për ndryshimin dhe plotësimin e ligjeve që kanë të bëjnë me racionalizimin dhe vendosjen e vijave llogaridhënëse të Agjencive të Pavarura. (Ndërtesa e Kuvendit, salla N506, ora 10:00)

- Mbahet ceremonia inauguruese e pranim dorëzimit të detyrës së Kryetarit të Prishtinës ku edhe do të bëhet betimi dhe nënshkrimi i deklaratës solemne për marrjen e detyrës së Kryetarit të ri të Komunës së Prishtinës, Përparim Rama si dhe betimi i anëtarëve të ri të Kuvendit të Komunës së Prishtinës. (Salla e Kuvendit të Komunës së Prishtinës, ora 10:00)

- Ministri i Kulturës, Rinisë dhe Sportit, Hajrulla Çeku raporton para Komisionit për Arsim, Shkencë, Teknologji, Inovacion, KulturÑ‘, Rini dhe Sport. (Ndërtesa e Kuvendit, salla N303, ora 10:00)

- Lëvizja FOL në partneritet me Misionin e Bashkimit Evropian për Sundimin e Ligjit në Kosovë bën lansimin e Raportit “Pajisjet elektronike: fokusi në parandalimin e rasteve të dhunës në familje”. (Hotel Emerald, ora 10:00)

-  Komisioni për Buxhet, Punë dhe Transfere shqyrton Projektligjit mbi Ndarjet Buxhetore për Buxhetin e Republikës së Kosovës për vitin 2022. (Ndërtesa e Kuvendit, salla C203, ora 10:00)

- Komuna e Rahovecit organizon shënimin e Ditës së Bibliotekës Komunale “Sulejman Krasniqi”. (Salla e Kuvendit të Komunës së Rahovecit, ora 11:00)

- Me rastin e Ditës së Bibliotekës Komunale “Sulejman Krasniqi” udhëheqes të Komunës së Rahovecit vizitojn shkollën e mesme të lartë  "Heronjtë e Kosovës" në Hoçë të Vogel. (Fshati Hoçë, ora 11:00)

- Qendra për Informim, Kritikë dhe Aksion së bashku me disa organizata të tjera feministe organizon aksion simbolik lidhur me aktgjykimin seksist të Gjykatës Themelore në Gjilan që shfajësoi pesë burra të akuzuar për përdhunim në grup të një vajze 19 vjeçare në vitin 2012. (Para Këshillit Gjyqësor të Kosovës, ora 12:00)

- Komisioni për Ekonomi, Industri, Ndërmarrësi dhe Tregti mban dëgjim publik për Pakon e projektligjeve të pronësisë industriale si Projektligji për topografitë e gjysmëpërçuesve; Projektligji për dizajnin industrial, si dhe projektligji për patentat. (Ndërtesa e Kuvendit, salla N10, ora 13:00)

- Komisioni për Bujqësi, Pylltari, zhvillim Rural, Mjedis e planifikim hapësinor dhe Infrastrukturë shqyrton Projektligjin për Odat e Arkitektëve dhe Inxhinierëve në fushën e ndërtimit dhe  planin e performancës për vitin 2022 nga Agjencia për menaxhimin e komplekseve memoriale të Kosovës (Ndërtesa e Kuvendit, salla N302, ora 13:00)
 

- Komisioni Qendror i Zgjedhjeve mban mbledhjen e radhës. (Selia e KQZ-së, ora 13:30)