25 Qershor 2018

Austria do të vazhdojë të mbështes edhe më tej arsimin në Kosovë

Prishtinë, 12 tetor - Ministri i Arsimit, Shkencës dhe Teknologjisë, Shyqiri Bytyqi priti sot ambasadorin e Austrisë në Kosovë, Gernot Pfandler, me të cilin bisedoi për zhvillimet në arsim, planet për të përmirësuar gjendjen në të gjitha nivelet, si dhe nevojën për mbështetjen e partnerëve në realizimin e synimeve për ngritje të cilësisë.

Ministri Bytyqi falënderoi shtetin austriak për ndihmën që i ka dhënë Kosovës, duke e ndihmuar arsimin, në kohën kur vendi ynë, e sidomos fusha e arsimit po kalonte kohë të vështira.

“E vlerësoj lartë angazhimin e Austrisë në stabilizimin e gjendjes në arsim dhe jemi të hapur për bashkëpunim të mëtutjeshëm”, tha ministri Bytyqi, pasi që theksoi faktin se Austria ka qenë një nga partnerët më të rëndësishëm në arsim, duke e ndihmuar ngritjen dhe përparimin në këtë sektor , sidomos në fushën e arsimit të lartë, përmes projekteve të mëdha.

Ndërsa, pasi që foli për synimet e Ministrisë për ngritjen e cilësisë në arsim, ministri Bytyqi kërkoi përkrahjen e mëtutjeshme të shtetit austriak.

Ambasadori i Austrisë në Kosovë, Gernot Pfandler ka uruar ministrin për detyrën e re, ndërsa ka theksuar se sektori i arsimit është thelbësor për Kosovën dhe në këtë aspekt, MAShT ka përgjegjësinë që të ofrojë arsimim cilësor.

Në këtë drejtim, ambasadori Pfandler, përmendi fokusimin e Austrisë në mbështetje të arsimit të lartë dhe theksoi se shteti i tij do të vazhdojë të mbështes edhe më tej arsimin në Kosovë dhe shtoi se arsimi është shtylla e bashkëpunimit në mes dy vendeve tona . 

Kalendari

Ngjarjet e datës 25 Qershor 2018  - Iniciativa për Drejtësi dhe Barazi Inject, organizon tryezën me temë 'Si ta parandalojmë dhunën ekonomike?', ku edhe do të prezantohet Iniciativa për Ndryshimin e Ligjit për Familjen, gjegjësisht saktësimi i dispozitave ligjore në lidhje me ndarjen e pasurisë së përbashkët bashkëshortore. (Hotel Sirius, ora 9:00)

- Komuna e Gjilanit dhe organizata “Let’s Do It Kosova' te mbështetur nga Ministria e Mjedisit dhe Planifikimit Hapësinor organizojn aksion pastrimi në kuadër të fushatës “Ta Pastrojmë Kosovën” në Gjilani. (Para teatrit të Gjilanit, ora 10:00)

- Mbahet ceremonia e diplomimit të kadetëve të Forcës  së Sigurisë së Kosovës. (Kazerma 'Skënderbeu’, në Komandën e Doktrinës dhe Stërvitjes,  në Ferizaj, ora 11:00)

- Zyra e Bashkimit Evropian dhe Ministria e Integrimit Evropian organizojn takimin iniciues për nisjen e programimit të programeve kombëtare për Kosovën, IPA 2019 dhe IPA 2020, të financuara nga Bashkimi Evropian. (Ndërtesa e Qeverisë, salla P-38, ora 11:00)

- Komisioni për Buxhet dhe Financa mban dëgjim publik lidhur me Projektligjin nr.06/L-072 për Institucionet Mikrofinanciare dhe Institucionet Financiare Jobankare. (Ndërtesa e Kuvendit, salla C 203, ora 11:30)

- Kryeministri i Republikës së Kosovës, Ramush Haradinaj e viziton Komunën e Klinës ku do te takohet me Kryetarin Komunës, drejtorët dhe asamblistët. (Objekti i Komunës se Klinës, ora 14:00)

- Kryeministri i Republikës së Kosovës, Ramush Haradinaj takohet me familjarë  të dëshmorëve, biznese lokale, persona nga fusha e artit, sportit, muzikës, OJQ, etj, të Komunës së Klinës. (Objekti i Komunës se Klinës, ora 15:00)