23 Prill 2018

Shënohet dita botërore e librit dhe e të drejtës së autorit

Prishtinë, 21 prill - Biblioteka Kombëtare e Kosovës “Pjetër Bogdani”, më 21 prill, ka organizuar veprimtari kulturore për Ditën Botërore të Librit dhe të të Drejtës së Autorit, ditë kjo e cila festohet më 23 prill.

Të pranishëm në këtë aktivitet ishin ministri për Kulturë, Rini dhe Sport, Kujtim Shala, kryetari i Shoqatës së Botuesve të Kosovës, Daut Demaku, shkrimtari Adem Gashi, Agim Vatovci, presidenti i Shoqatës së Personave me Nevoja të Veçanta, përfaqësues të kulturës, shkrimtarë, mësues, studentë, nxënës të shkollave të mesme dhe të shkollave fillore.

Udhëheqësja e Departamentit të Arsimimit në Bibliotekën Kombëtare të Kosovës “Pjetër Bogdani”, znj. Ramize Bajraktari, në fjalën e saj për Ditën Botërore të Librit dhe të të Drejtës së Autorit, theksoi nevojën e hartimit dhe të implementimit të politikave të qarta dhe afatgjata për librin nga qeverisja lokale e qendrore si dhe nga institucionet që merren me arsim, shkencë, dhe kulturë.

Në këtë aktivitet kulturor, kryetari i Shoqatës së Botuesve të Kosovës, z. Daut Demaku, kërkoi angazhimin e institucioneve dhe medieve në ngritjen e vetëdijes për rëndësinë e librit. Duke iu drejtuar të pranishmëve, sidomos nxënësve dhe të rinjve, z. Demaku foli për vlerën e librit, motivimin e leximit, si dhe për letërsinë.

Në emër të shkrimtarëve, z. Adem Gashi, foli për lidhjen e librit me qytetërimin, duke përmendur diturinë, artin, kulturën, moralin dhe religjionin, si përbërës të librit.

Në këtë veprimtari - Ajete Zogaj, Rudina Tahiraj, Rozafa Tahiraj dhe Gresë Maliqi, interpretuan disa pjesë nga krijimtaria letrare shqipe e Arif Demollit dhe e Dritëro Agollit, si dhe nga letërsia e huaj - nga vepra letrare e Uilliam Shekspirit dhe e Miguel de Servantesit.

Veprimtaria për Ditën Botërore të Librit është mbyllur me dhënien e librave dhuratë për nxënës të shkollave fillore dhe të mesme të Prishtinës, për lexuesit e Bibliotekës “Hivzi Sylejmani”, si dhe për studentë të Universitetit të Prishtinës – lexues në Bibliotekën Kombëtare të Kosovës.
 

Kalendari

Ngjarjet e datës 24 Prill 2018 - Ministria e Shëndetësisë dhe Instituti Kombëtar i Shëndetësisë Publike me përkrahjen e UNICEF-it shënojn fillimin e Javës së Imunizimit 2018. (Ndërtesa e Ministrisë se Shëndetësisë, salla 128, ora 10:00)

- Komisioni për Punë të Brendshme, Siguri dhe Mbikëqyrjen e Forcës së Sigurisë së Kosovës diskuton rreth raportit të Komisionit Evropian për Kosovën për vitin 2018. (Ndërtesa e Kuvendit, salla N 302, ora 11:00)

Mbahet mbledhja e Komisionit për Bujqësi, Pylltari, Zhvillim Rural, Mjedis e Planifikim Hapësinor në të cilën do të bëhët shqyrtimi i strategjisë shtetërore për ujëra në Kosovë 2017-2036 si dhe shqyrtimi i raportit vjetor për vitin 2017 nga Autoriteti rregullator për ujëra.  (Ndërtesa e Kuvendit, salla N 303, ora 11:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë Kundër Korrupsionit, do të shqyrtojë raportin për  Projektligjin për Kryeqytetin e Republikës së Kosovës - Prishtinën, Projektligjin për Ndërmjetësim si dhe do te shqyrtoj raportin vjetor te punës së Agjencisë për Ndihmë Juridike Falas. (Ndërtesa e Kuvendit, salla N-10, ora 13:00) 

- InterPersonnel Kosova -  Shkollë e gjuhëve të huaja, organizon prezantimin e programit të saj “Migrim dhe punësim legal” të  infermierëve dhe punëtorëve sezonal në Gjermani dhe në vendet e tjera të Bashkimit Europian. (Objekti i IPK-së, ora 14:00)

- Grupi për Studime Juridike dhe Politike organizon tryezën e diskutimit me temë “Në Kërkim të Konsensusit - Dialogu Kosovë-Serbi dhe perspektiva zgjeruese e Bashkimit Evropian”. (Hotel Swiss Diamond, ora 10:30)