23 Prill 2018

Prezantohen aktet nënligjore të licencimit të mësimdhënësve

Prishtinë, 20 prill - Ministria e Arsimit, Shkencës dhe Teknologjisë, ka prezantuar sot pakon e akteve nënligjore, e cila ka për qëllim rregullimin e fushës së licencimit të mësimdhënësve, avancimit në karrierë, zhvillimit profesional të tyre, procesin e vlerësimit të performancës, funksionalizimin e Këshillit Shtetëror për Licencim të Mësimdhënësve, si dhe procedurat e aprovimit të programeve të trajnimit për mësimdhënës.

Ministri i Arsimit, Shkencës dhe Teknologjisë, z. Arsim Bajrami, me këtë rast, tha se përmes kësaj pakete, Qeveria e Kosovës, përkatësisht Ministria e Arsimit po e rregullon profesionin e mësimdhënësit si profesion me interes të veçantë publik.

“Këto katër udhëzime administrative ofrojnë një kornizë të shkëlqyeshme të ndërtimit të karrierës për mësimdhënës gjatë gjithë jetës”, tha Ministri, ndërsa theksoi se rruga për përmirësimin e sistemit arsimor janë mësimdhënësit e motivuar, të përkushtuar, të cilët do të ndërrojnë komplet sistemin arsimor.

“Kjo kornizë ofron gjithçka që duhet të bëj një shtet për të bërë profesionin e mësimdhënësit një profesion atraktiv, të kërkuar në tregun e punës, por edhe llogaridhënës”, tha ministri Bajrami.

Në këtë drejtim, ministri Bajrami theksoi nevojën e implementimit të këtyre Udhëzimeve Administrative, të cilat do të fillojnë të zbatohen menjëherë. Prandaj, ai kërkoi partneritetin e komunave që të informojnë mësimdhënësit me rregullat e reja, si punëdhënës të tyre.

Ndërsa, z. Selim Mehmeti, kryetar i Këshillit Shtetëror për Licencim të Mësimdhënësve bëri një prezantim më të detajuar të këtyre dokumenteve që rregullojnë fushën e licencimit dhe zhvillimit të mësimdhënësve në karrierë.

 

 

 

Kalendari

Ngjarjet e datës 24 Prill 2018 - Ministria e Shëndetësisë dhe Instituti Kombëtar i Shëndetësisë Publike me përkrahjen e UNICEF-it shënojn fillimin e Javës së Imunizimit 2018. (Ndërtesa e Ministrisë se Shëndetësisë, salla 128, ora 10:00)

- Komisioni për Punë të Brendshme, Siguri dhe Mbikëqyrjen e Forcës së Sigurisë së Kosovës diskuton rreth raportit të Komisionit Evropian për Kosovën për vitin 2018. (Ndërtesa e Kuvendit, salla N 302, ora 11:00)

Mbahet mbledhja e Komisionit për Bujqësi, Pylltari, Zhvillim Rural, Mjedis e Planifikim Hapësinor në të cilën do të bëhët shqyrtimi i strategjisë shtetërore për ujëra në Kosovë 2017-2036 si dhe shqyrtimi i raportit vjetor për vitin 2017 nga Autoriteti rregullator për ujëra.  (Ndërtesa e Kuvendit, salla N 303, ora 11:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë Kundër Korrupsionit, do të shqyrtojë raportin për  Projektligjin për Kryeqytetin e Republikës së Kosovës - Prishtinën, Projektligjin për Ndërmjetësim si dhe do te shqyrtoj raportin vjetor te punës së Agjencisë për Ndihmë Juridike Falas. (Ndërtesa e Kuvendit, salla N-10, ora 13:00) 

- InterPersonnel Kosova -  Shkollë e gjuhëve të huaja, organizon prezantimin e programit të saj “Migrim dhe punësim legal” të  infermierëve dhe punëtorëve sezonal në Gjermani dhe në vendet e tjera të Bashkimit Europian. (Objekti i IPK-së, ora 14:00)

- Grupi për Studime Juridike dhe Politike organizon tryezën e diskutimit me temë “Në Kërkim të Konsensusit - Dialogu Kosovë-Serbi dhe perspektiva zgjeruese e Bashkimit Evropian”. (Hotel Swiss Diamond, ora 10:30)