17 Tetor 2021

Shqipëria iu shpreh mirënjohje pakufi turistëve nga Kosova

Prishtinë, 5 tetor - Ministri i Tregtisë dhe Industrisë i Republikës së Kosovës, Vesel Krasniqi mori pjesë në ceremoninë e organizuar nga ministri i Turizmit dhe Mjedisit i Shqipërisë, Blendi Klosi dhe ambasadori i Shqipërisë në Kosovë, Qemal Minxhozi, e cila u mbajt në shenjë falënderimi për bashkëpunimin e ndërsjellë ndërmjet dy vendeve në fushën e turizmit.

Ministri Krasniqi theksoi se bashkëpunimi me Tiranën ka ndodhur qysh pas luftës, sidomos në zhvillimin e turizmit.

“Ne, të dy qeveritë, tash e 6 vite duke filluar intensivisht me marrëveshje të ndryshme për t`i larguar barrierat që i kemi pasur të dyja vendet andej dhe këndej bjeshkës."

"Për ta forcuar edhe më tutje këtë bashkëpunim dhe për t`i larguar këto barriera, tani së fundi, kemi vlerësuar nga të dyja anët se është sektori i turizmit.” , potencoi ministri Krasniqi.

Ai tha se duke parë interesin e dyanshëm, fillimisht është hapur sezoni veror turistik në Shqipëri me moton “Pusho shqip”.

“Jo vetëm që kemi pushuar shqip, jemi ushqyer shqip, sepse kështu na bashkon kultura dhe historia”, u shpreh Krasniqi duke ftuar qytetarët nga Shqipëria për të pushuar në bjeshkët e Kosovës.

Ndërkaq, nikoqiri i ceremonisë, “Pusho shqip”, ministri i Turizmit dhe Mjedisit i Shqipërisë, Blendi Klosi, vlerësoi lart kontributin e qytetarëve të Kosovës për zhvillimin e turizmit në Shqipëri, me theks të veçantë kohën e pandemisë.

“E kemi shtëpinë e përbashkët për miliona turistë që vizitojnë anët tona të kufirit. Atëherë kur kishim nevojë për turizëm ishte Kosova. E filluam me Durrësin në veri e në jug. Edhe ky vit është shumë i vështirë, flukset e vizitorëve ishin të pranishëm gjatë gjithë verës. Duhet t’u them faleminderit dhe mirënjohjen e pakufi”, theksoi ministri Klosi.

I pranishëm në këtë ceremoni ishte edhe zëvendëskryeministri Besnik Tahiri, i cili tha se Kosova dhe Shqipëria kanë një bashkëpunim të rrallë në fushën e turizmit.

Të pranishëm në ceremoni ishin edhe kryetar bashkish nga Shqipëria, si dhe disa kryetar të komunave të Kosovës.

Kalendari

Ngjarjet e datës 18 Tetor 2021

 - Ministri i Financave, Punës dhe Transfereve dhe Auditorja e Përgjithshme e ZKA-së raportojnë para Komisionit për Mbikëqyrjen e Financave Publike lidhur me shqyrtimin e Raportit Vjetor të Auditimit për vitin 2020. (Ndërtesa e Kuvendit, salla N10, ora 10:00)

- Fondacioni Kosovar Trashëgimia Kulturore pa Kufij, CHwB Kosova organizon Ilucidare Playground: “Guralec: Moving Rocks” dhe Konferencën “Përtej mureve dhe bindjeve”. Kinema Jusuf Gërvalla në Pejë