12 Gusht 2022

Nga viti 2023 Venecia do të vendosë tarifë të hyrjes në qytet për turistët

Venecia, 2 korrik - Duke filluar nga viti i ardhshëm, vizitorët në udhëtimet ditore do të duhet të paguajnë 10 euro për hyrje në qytetin italian Venecia, një nga mrekullitë e botës që prej kohësh është rënduar nga turizmi i tepruar.

Masa, e shpallur dje nga këshilli i qytetit Venecia, do të fillojë më 16 janar të vitit 2023.

Turistët që qëndrojnë gjatë natës, fëmijët nën 6-vjeç, pronarët e shtëpive të pushimit, njerëzit që qëndrojnë me vendasit, studentët, udhëtarët dhe disa kategori të tjera do të përjashtohen nga ky detyrim.

Simone Venturini, këshilltar i qytetit për turizmin, sistemin e ri e quajti “mënyrë të vetme” për të kontrolluar turizmin masiv.

“Është një hap i rëndësishëm, është një fazë kyçe dhe ne jemi të parët në botë që e bëjmë këtë”, tha Venturini.

Tarifat e hyrjes në Venecia do të ndryshojnë nga 3 deri në 10 euro, varësisht asaj sa është i ngarkuar qyteti. Këshilli i qytetit mbetet të vendosë për pragun e mbipopullimit që do të përcaktojnë çmimet që turistët duhet të paguajnë.

Venturini gjithashtu njoftoi rritje të çmimeve për transportin publik dhe atraksionet turistike. Nga 1 shtatori, një biletë për të traget ujor do të rritet nga 7,50 euro në 9,50 euro, ndërsa hyrja në muzetë e Shën Markut do të rritet nga 25 në 30 euro.

Ai këmbëngul se nuk bëhet fjalë për mbylljen e qytetit krejtësisht gjatë periudhave jashtëzakonisht të ngarkuara, respektivisht gjatë karnavaleve në muajin shkurt.

“Qyteti mbetet gjithmonë i hapur, por nëse arrijmë pragun, ju mund të vini përsëri nëse dëshironi, por do të paguani pak më shumë”, tha ai.

Rezervimi do të bëhet online dhe një ekip prej 15-20 inspektorësh do të patrullojnë rrugicat, urat dhe sheshet e qytetit për të kërkuar shkelësit, të cilët do të përballen me gjoba që ndryshojnë nga 50 deri në 300 euro.

Vendasit tashmë prej kohësh po përpiqen të dekurajojnë të ashtuquajturit “turistët në vrap” të cilët qëndrojnë në qytet vetëm disa orë. Këshilli fillimisht prezantoi planet për t’i detyruar ata të paguajnë për hyrje në qytetit në vitin 2019, por zbatimi i masave u vonua për shkak të pandemisë COVID-19.

Turizmi është industria kryesore e qytetit Venecia, por fluksi i vazhdueshëm i vizitorëve fajësohet se e bën qytetin gjithnjë e më të shtrenjtë dhe më pak mikpritës për banorët, një fakt që reflektohet në rënien e numrit të banorëve, aktualisht në 50 mijë krahasuar me rreth 76 mijë banorë 30 vite më parë.

Kalendari

Ngjarjet e datës 12 gusht 2022

 - Kryeministri i Republikës së Kosovës, Albin Kurti, bashkë me ministrin e Financave, Punës dhe Transfereve, Hekuran Murati, vizitojnë Doganën e Kosovës. (Drejtoria e Doganës, ora 8:30)

- Kuvendi nëpërmjet Grupit të Deputetëve të Rinj shënon Ditën Ndërkombëtare të Rinisë. (Salla plenare, ora 10:00)

- Komuna e Rahovecit organizon takimet B2B në kuadër të aktiviteteve të Muajit të Mërgimtarëve. (Restaurant Ura e Shenjtë, ora 10:00)

- Nisma e të Rinjve për të Drejtat e Njeriut – Kosovë ((YIHR KS) shënon Ditën Ndërkombëtare të Rinisë me një aksion rrugor me slloganin “Kur bohet mirë?!” (Sheshi “Nënë Tereza”, ora 12:00)

- Avokati i familjes Dehari, Tomë Gashi, mban konferencë për medie në lidhje me rastin e vdekjes së aktivistit të VV-së, Astrit Dehari. (Zyrat e Tomë Gashit, mbi Kino ABC, ora 12:00)

- Kryeministri i Republikës së Kosovës, Albin Kurti, bashkë me ministrin e Financave, Punës dhe Transfereve, Hekuran Murati, vizitojnë kompaninë “Rroni Fer” Sh.P.K. (Magjistralja Gjakovë-Prizren_kilometri i dytë, Objekti i ish-ndërmarrjes “Metaliku”, Gjakovë, ora 14:30)

- Qendra për Këshillim, Shërbime Sociale dhe Hulumtime organizon Festivalin e Rinisë për nder të Ditës së Rinisë. (Lagjja Taukbashqe, ora 18:00)

- Mbahet edicioni i parë i festivalit “MAL FEST”, i cili synon të jetë tradicional dhe objektiv e ka rininë dhe mërgatën e Komunës së Malishevës. Festivali organizohet nga Komuna e Malishevës në bashkëpunim me  organizatën “Values for Better Future”.(parku i qytetit në Malishevë, ora 19:00)

- Në kuadër të Akademisë Verore ‘’Arbën Xhaferi"  mbahet panel diskutimi me deputetët e rinjë të Kuvendit të Kosovës lidhur me rolin dhe rëndesin e të rinjëve në politikë. (Akademia për Siguri Publike të Kosovës, ora 19:30)