23 Maj 2022

Shënohet Dita Botërore e Metrologjisë

Prishtinë, 19 qershor - Agjencia e Metrologjisë së Kosovës, që funksionon nën ombrellën e Ministrisë së Tregtisë dhe Industrisë ka shënuar Ditën Botërore të Metrologjisë me disa aktivitete.

Ministri i Tregtisë dhe Industrisë, Vesel Krasniqi, në fjalimin e tij për këtë ditë ka thënë se Metrologjia është pjesë e infrastrukturës së cilësisë, së bashku me standardizimin dhe akreditimin, dhe si e tillë përbënë një hallkë të rëndësishme në funksionimin e kësaj infrastrukture.

Sipas ministrit ndikimi i metrologjisë në tregtinë dhe industrinë e një vendi është i jashtëzakonshëm, dhe llogaritet si një barometër për të vlerësuar gjendjen e zhvillimit të një vendi si dhe për vlerësimin e kapaciteteve të një vendi dhe mundësitë për të fuqizuar ekonominë.

“Ne jemi të vetëdijshëm se Agjencia e Metrologjisë së Kosovës ka nevojë të vazhdueshme për mbështetje në drejtim të fuqizimit të metrologjisë dhe të komplet infrastrukturës së cilësisë, si dhe në funksion të përmbushjes së obligimeve ligjore dhe kushtetuese, siç janë mbrojtja e konsumatorit, mbështetje prodhimeve vendore dhe kompanive shërbyese, si dhe krijimit të mundësisë për rritjen e eksporteve që Republika e Kosovës bënë drejt vendeve tjera”, tha ministri.

Ndërsa kryeshefi i Agjencisë së Metrologjisë, Ferki Fejza, tha se interes i posaçëm i është kushtuar avancimit të laboratorëve të AMK në ngritjen e standardeve të matjeve duke siguruar kalibrimet dhe ndër-krahasimet laboratorike me mbështetjen e projektit FMG 2 (Për Lëvizjen e Lirë të Mallrave), si dhe përgatitjet për fillimin e procesit të akreditimeve të laboratorëve që operojnë në kuadër të Departamentit të Metrologjisë Shkencore dhe Industriale, në kuadër të AMK.

“Gjatë kësaj kohe kemi realizuar një sërë takimesh dy palësh dhe shumëpalëshe me drejtorë të agjencive simotra në rajon dhe me vendet e BE-së, nga të cilët kemi marr mbështetje dhe kërkesa konkrete për bashkëpunim për ngritje të kapaciteteve dhe për shkëmbime përvojash. Në funksion të kësaj pritet së shpejti të nënshkruhen disa memorandume mirëkuptimi me disa nga vendet e rajonit dhe të BE, si dhe ripërtëritja e memorandumeve me Shqipërinë dhe Turqinë”, tha Fejza.

Në anën tjetër Endrit Shala, deputeti i Kuvendit të Kosovës dhe kryetar i Komisionit Parlamentar për Ekonomi, Punësim, Tregti dhe Industri tha se Agjencia e Metrologjisë është ndër hallkat më të rëndësishme të ekonomisë së një vendi.

“Metrologjia është njëra ndër hallkat më të rëndësishme të një vendi që për synim e ka zhvillimin ekonomik dhe fuqizimin e bizneseve. Po ashtu Metrologjia është agjencion që mbron të drejtat e konsumatorit dhe prodhuesit vendor. Si kryetar i komisionit parlamentar do t’iu mbështes për t’i shtyrë përpara punët që i keni dhe zotohem se do ta jap të gjithë kontributin tim në fuqizimin e infrastrukturë së cilësisë për harmonizimin e ligjeve me atë të BE-së”, tha deputeti Shala.
 

Kalendari

Ngjarjet e datës 24 maj 2022 - Koalicionit për Transparencë dhe Integritet i themeluar dhe mbështetur nga KFOS-i, do të organizojë tryezë me temën “Pazari me tema të diplomës” ku do të diskutohet lidhur me shit-blerjen e temave të diplomës. (Biblioteka Kombëtare Universitare e Kosovës, ora 9:30)

- Komisioni për Mbikëqyrjen e Financave Publike shqyrton raportin e auditimit të performancës “Prokurimi në Korporatën Energjetike të Kosovës” ku të ftuar janë edhe Kryesuesi i Brodit dhe Kryeshefi ekzekutiv i KEK-ut. (Ndërtesa e Kuvendit, salla C203, ora 10:00)

- Komisioni për të Drejtat dhe Interesat e Komuniteteve dhe Kthim shqyrton raportin e Projektligjit për mbrojtjen e ajrit dhe Projektligjin për Akcizën në Produktet e Duhanit. (Ndërtesa e Kuvendit, salla N302, ora 10:00)

- Komisioni për Mjedis, Ushqim, Bujqësi, Planifikim dhe Zhvillim mban dëgjim publik për Projektligjin për Produktet Biocide. (Ndërtesa e Kuvendit, salla N506, ora 10:00)

- Iniciativa për Zhvillimin e Bujqësisë së Kosovës organizon ceremoninë e shpërndarjes së pajisjeve bujqësore, projekt i financuar nga Zyra e Bashkimit Evropian në Kosovë. (Stadiumi i Qytetit në Shtime, ora 10:00)

- Komisioni për Shëndetësi dhe Mirëqenie Sociale shqyrton Projektligjin për ndryshimin dhe plotësimin e Ligjit për Inspektoratin Sanitar të Kosovës dhe Projektligjin për ndryshimin dhe plotësimin e Ligjit për Inspektoratin Shëndetësor. (Ndërtesa e Kuvendit, salla N303, ora 10:00)

- Osman Buleshkaj, konsulent i GIZ prezanton Sistemin e Arsimit Parauniversitar në Kosovë, para Komisioni për Arsim, Shkencë, Teknologji, Inovacion, KulturÑ‘, Rini dhe Sport. (Ndërtesa e Kuvendit, salla N204, ora 10:00)

- OJQ Aktiv prezanton publikimin “Rekomandime për kornizën e politikave mbi zbatimin e Ligjit për përdorimin e gjuhëve”. (Hotel Sirius, ora 11:00)

- Mbahet debati me temën “Liritë e mediave dhe pozita ekonomike e gazetarëve në Kosovë”. (Qendra Mediale në Çagllavicë, ora 11:00)

- Komisioni për Ekonomi, Industri, Ndërmarrësi dhe Tregti voton raportin vjetor të Komisionit të Pavarur për Miniera dhe Minerale për vitin 2021. (Ndërtesa e Kuvendit, salla N10, ora 11:00)

- Përfaqësuesit e Zyrës së BE-së, të IADK-së dhe të Komunës së Shtimes vizitojnë Florije Bislimin, njëra nga përfitueset e projektit “Mbështetja në punësimin e të rinjve dhe grave në zonat rurale përmes zhvillimit të bujqësisë”. (Fshari Godanc në Shtime, ora 11:40)

- Kryetari i Komunës, Alban Hyseni, do të marrë pjesë në takimin e organizuar nga Rrjeti i Biznesit të Globit. (Vali Ranch në Gjilan, ora 18:30)