04 Tetor 2022

Pandemia COVID19 afekton konsumin dhe importet

Prishtinë, 17 prill - Sot nga një forum virtual i organizuar nga Oda Ekonomike Amerikane në Kosovë mbi gjendjen e konsumit pas ndikimit të pandemisë u konstatua se COVID19 ka ndikuar domosdoshmërisht në rënien drastike të importit për 40%, dhe në rënien e dukshme të konsumit tek qytetarët, e cila ndikon jo vetëm bizneset por edhe të hyrat shtetërore.
 
Bashkim Arif, Drejtor i Drejtorisë Operative dhe Kufirit në Doganën e Kosovës, theksoi se sa i përket trendit të importit, statistikat brenda Doganës tregojnë se në periudhën krahasuese të javëve të para të prillit 2020, me ato të 2019 rezulton një trend rënës i importeve në përgjithësi.

Ndërkaq,  nëse merren parasysh produktet esenciale, të cilat janë pjesë e marrëveshjes së korridorit të gjelbër për tregti të lirë krijuar së fundmi në rajon me koordinim nga CEFTA, trendi është rritës.

Arifi u shpreh se importi i produkteve esenciale, me theks të veçantë tek gruri dhe mielli ka qenë enorm gjatë kësaj kohe.

Sipas tij, partnerë kryesor të Kosovës në kontekstin e importeve janë Turqia dhe Gjermania, ndërsa Serbia qëndron në vendin e 12-të.

Për më tepër, Arifaj përmendi se Dogana e Kosovës ka përdorur metodat më optimale në mënyrë që furnizimi sidomos me mallra esenciale të jetë i qëndrueshëm.

Hakif Gashi, Pronar në Meridian Corporation potencoi se si pasojë e indikatorëve të ndryshëm që janë shfaqur pas paraqitjes së pandemisë, statistikat dëshmojnë një rënie të dukshme të konsumit.

Ai theksoi se paniku dhe pasiguritë dita ditës po vazhdojnë të tkurrin konsumin e përditshëm të qytetarëve, ndërsa mbyllja e aktiviteteve të shumëta ekonomike dhe rrjedhimisht rritja e papunësisë, po i orientojnë blerjet kryesisht në produkte esenciale.

Sipas Gashit, nëse flitet në përqindje, konsumi ka rënë afërsisht 50% për produktet ushqimore, ndërsa 70% për produktet e luksit.

Gashi tha se injektimet e parasë në ekonomi janë kyçe në këtë kohë, dhe ato nuk duhet të fokusohen vetëm në mbijetesë, por në motivim për konsum normal.

Dardan Shala, Kryeshef Ekzekutiv në M&Sillosi përmendi panikën e qytetarëve për furnizim me produkte esenciale, e me theks të shtuar me miell në ditët e para të kësaj krize, gjersa theksoi se ajo kohë ishte mjaft sfiduese për industrinë e prodhimit të miellit.

Sipas tij, problemet e ndryshme që u shfaqën kishin të bënin inicialisht me varësinë nga importi, e rrjedhimisht me njoftimin për heqjen e taksës nga Serbia, i cili e kushtëzoi këtë industri të mbante stoqe sa më të vogla.

Gjatë kohës kur kërkesa ishte enorme, Shala potencoi se të hyrat ishin të mëdha për këtë industri, mirëpo njejtë ishin edhe kostot e sigurimit të atyre sasive përderisa u ngrit çmimi për lëndën e parë, ambalazhimin dhe transportimin.

Sipas Shalës, si rrjedhojë e krijimit të rezervave shumë të mëdha nga qytetarët, kjo industri tash do të ballafaqohet me sfida të reja për gjenerim të të hyrave.

Tutje, Shala u bëri thirrje institucioneve për të marrë vendime në harmonizim të plotë me komunitetin e biznesit, ashtu që bizneset të mund të kontribuojnë në buxhetin dhe stabilitetin ekonomik të vendit.

Ky forum virtual i Odës Ekonomike Amerikane në Kosovë u mundësua nga Banka Evropiane për Rindërtim dhe Zhvillim.

Kalendari

Ngjarjet e datës 4 tetor 2022 - Komisioni për Punë të Jashtme dhe Diasporë takohet me delegacionin e administratës së Parlamentit të Republikës së Austrisë. (Ndërtesa e Kuvendit, salla C203, ora 8:30)

- Misioni i Organizatës për Siguri dhe Bashkëpunim në Evropë organizon ceremoninë zyrtare të nënshkrimit të Memorandumit të Mirëkuptimit ndërmjet komunave të rajonit, Prishtinës, Obiliqit, Lipjanit, Podujevës dhe Fushë Kosovës dhe Qendrës për Mbrojtjen e Grave dhe Fëmijëve në Prishtinë. (Hotel Amazona, ora 10:00)

- Instituti Demokratik i Kosovës organizon tryezën e diskutimit gjatë të cilës do të shpalosën të gjeturat nga analiza e procedurave të prokurimit publik lidhur me shpenzimet publike të realizuara nga Ministria e Shëndetësisë dhe Shërbimi Spitalor Klinik Universitar gjatë periudhës 2020 – 2022. (Restorant Boho, ora 10:00)  

- Komisioni për Mbikëqyrjen e Financave Publike shqyrton raportin e Auditorit të Përgjithshëm për Raportn Vjetor Financiar të Buxhetit të Republikës së Kosovës për vitin 2021. (Ndërtesa e Kuvendit, salla N302, ora 11:00)

- Në kuadër të aktiviteteve kulturore artistike brenda institucioneve korrektuese, nesër në Qendrën Korrektuese për Femra në Lipjan, do të shfaqet Filmi “ Sffaragette”. (Qendra Korrektuese për Femra Lipjan, ora 11:00)

- Me rastin e 4 Tetorit, “Ditës Botërore për Mbrojtjen e Kafshëve”,  Ministria e Mjedisit, Planifikimit Hapësinor dhe Infrastrukturës në bashkë organizim me Agjencia e Ushqimit dhe Veterinarisë, OJQ-në Fondacioni për Mbrojtjen e të Drejtave të Kafshëve si dhe Fondacioni për mbrojtjen e kafshëve Vier Pfoten Kosova do të shënojmë këtë ditë në Pyllin e Arinjve Prishtina. (Fshati Mramor, afër liqenit të Badovcit, ora 11:00)
 
- Qendra Kryesore e Mjekësisë Familjare në Rahovec, përgjatë gjithë muajit tetor, si muaji i ndërgjegjësimit për kancerin e gjirit, çdo ditë pune ofron shërbimin e mamografisë falas për të gjithë. (Rahovec, ora 11:00)

- Ministri i Financave, Punës dhe Transfereve, Hekuran Murati së bashku me Ministren e Financave dhe Ekonomisë të Shqipërisë, Delina Ibrahimaj, Drejtorin e Përgjithshëm të Doganave të Kosovës Agron Llugaliu dhe Doganës së Shqipërisë Genti Gazheli do të inspektojnë punët në hapësirat e përbashkëta të Portit të Durrësit. (Porti i Durrësit, ora 12:00)

- Kryetari i Kuvendit të Republikës së Kosovës, Glauk Konjufca, pret në takim ambasadorin e Francës, Olivier Guerot. (Kabineti i kryetarit, ora 12:00 - Mediat mund të marrin pamje në fillim të takimit!)

- Komisioni për Ekonomi, Industri, Ndërmarrësi dhe Tregti shqyrton në parim i Projektligjit për Sigurinë e përgjithshme të produkteve si dhe formon grupin e punës për mbikëqyrjen e zbatimit të Ligjit për komunikimet elektronike. (Ndërtesa e Kuvendit, salla N10, ora 12:00)

- Komisioni Qendror i Zgjedhjeve mban mbledhjen e radhës. (Selia e KQZ=së, ora 13:30)