06 Dhjetor 2022

PDK-ja krijon fond për mbrojtjen e Limajt

Prishtinë, 28 maj - Partia Demokratike e Kosovës ka krijuar fond të posaçëm për mbrojtjen e nënkryetarit Fatmir Limaj, shkruan në botimin e sotshëm “Koha Ditore”. 

Zyrtarë të lartë të kësaj partie kanë konfirmuar se vendimi për krijimin e fondit është marrë para dy javësh në një mbledhje të mbyllur të Kryesisë së PDK-së.

Nait Hasani, njëri nga anëtarët e këtij organi drejtues të partisë, ka deklaruar të enjten se fondi tashmë është publik dhe se xhirollogaria e tij është hapur në Bankën e Re të Kosovës. “Mjetet e këtij fondi do të shfrytëzohen për të gjitha procedurat që kanë të bëjnë me mbrojtjen e ministrit Fatmir Limaj.

Fondi mbështetet në vullnetin e mirë të simpatizantëve, aktivistëve të partisë, por edhe të qytetarëve që e shohin të arsyeshme kontributin për këtë fond”, ka thënë Hasani në një bisedë telefonike.

Qëndrimi i Kryesisë së PDK-së, sipas tij, është që të mos caktohet shuma se sa duhet të kontribuohet në fond, por kjo të mbetet në vullnetin dhe mundësitë e secilit kontribuues.

Ndërkohë ministri i Transportit, Fatmir Limaj, i dyshuar për krim të organizuar së bashku me shefin e prokurorimit në këtë ministri, Nexhat Krasniqi, ka angazhuar një ekip të fuqishëm avokatësh ndërkombëtarë për t’u mbrojtur nga akuzat e Prokurorisë Speciale të Kosovës.

Gazeta amerikane “Greenwich Time” ka shkruar të enjten në portalin e saj se Limaj ka angazhuar tre avokatë nga Stamfordi i Shteteve të Bashkuara të Amerikës si pjesë e ekipit ligjor për mbrojtjen nga akuzat për korrupsion.

Limaj si mbrojtës ka zgjedhur që ta angazhojë edhe avokatin anglez me prejardhje nga Pakistani, Karim Khan, i cili e ka mbrojtur edhe në Tribunalin e Hagës për krime lufte, ku u shpall i pafajshëm.

Kryetari i OAK-së, Musa Dragusha, ka thënë se asnjëri prej këtyre emrave nuk ka aplikuar për licencë.

“Asnjë nga këta emra nuk ka kërkuar licencë. Natyrisht që nëse aplikojnë do t’u nënshtrohen testeve  vendëse”, ka thënë Dragusha.

Testi, sipas tij, ka të bëjë me  njohuritë e ligjeve në Kosovë dhe me ato të etikës.

Zëdhënësja e EULEX-it, Kristiina Herodes, ka deklaruar se hetimet po vazhdojnë, derisa ato i ka vlerësuar si shumë komplekse.

”Ky është një hetim kompleks dhe do të jenë të pasakta të paragjykohen rezultatet nëse do të ketë ndonjë arrestim apo jo. E njëjta gjë vlen edhe për afatin kohor kur hetimet do të përfundojnë dhe të përgatitet një aktakuzë”, ka thënë zëdhënësja Herodes

Kalendari

Ngjarjet e datës 6 dhjetor 2022

- Kryeministri i Republikës së Kosovës, Albin Kurti, pret në takim Përfaqësuesin e Posaçëm të Bashkimit Evropian për Dialogun Kosovë-Serbi, Miroslav Lajčák. (Ndërtesa e Qeverisë, ora 9:00)

- Agjencia e Statistikave të Kosovës mban nesër takim konsultativ me Kryetar dhe përfaqësues të Komunave në Kosovë. (Hotel International Prishtina në Veternik, ora 9:30)

- Mbahet mbledhja e Kryesisë së Kuvendit të Republikës së Kosovës. (Ndërtesa e Kuvendit, salla C 301, ora 9:30)

- Instituti i Kosovës për Drejtësi dhe Grupi për Studime Juridike dhe Politike organizojnë tryezën e rrumbullakët për reformën në Administratën Publike. (Hotel Sirius, ora 10:00)

- Komisioni për Arsim, Shkencë, Teknologji, Inovacion, KulturÑ‘, Rini dhe Sport shqyrton Projektligjin për Anti Dopingun. (Ndërtesa e Kuvendit, salla N225, ora 10:00)

- Komisioni për Shëndetësi dhe Mirëqenie Sociale takohet me Elvana Shala, ambasadore e vullnetit të mirë në Komisionin ndërkombëtar për të drejtat e njeriut ku do të diskutohet organizimi i kongresit botëror për personat me aftësi të kufizuara. (Ndërtesa e Kuvendit, salla N10, ora 10:00)

- Komisioni për Administratë Publike, Pushtet Lokal, Media dhe Zhvillim Rajonal shqyrton në parim i Projektligjin për zhvillimin rajonal të balancuar. (Ndërtesa e Kuvendit, salla N302, ora 10:00)   

- Qendra Kosovare për Zhvillim dhe Avokim mban konferencën për media në lansimin e fushatës “E Drejta për Ajër të Pastër - vrasësi i padukshëm NO2 -”. (Restorant “Rings” tek Sheshi ‘Nënë Tereza”, ora 11:00)

- Komisioni për Shëndetësi dhe Mirëqenie Sociale organizon tryezën e rrumbullakët lidhur me punën, të arriturat dhe sfidat e Qendrave për Punë Sociale’’. (Ndërtesa e Kuvendit, salla N10, ora 11:00)

- Komuna e Prishtinës inauguron veprën e artit në hapësira publike “Never Say Never” të artistit të mirënjohur bashkëkohor Alban Muja, e që po realizohet me mbështetje të Komunës së Prishtinës dhe MB Office. (Parku “Adem Demaçi”, ora 12:00)

- Zëvendëskryeministrit Besnik Bislimi raporton para Komisionit për Punë të Jashtme dhe Diasporë lidhur me dialogun dhe planin franko-gjerman. (Ndërtesa e Kuvendit, salla N10, ora 13:00)

 - Organizata jofitimprurëse Code organizon takimin lançues “Ora e Kodit” e cila është hyrje 1 orëshe në shkenca kompjuterike e krijuar për të shpjeguar “kodimin”. (Shkolla “Xhemail Mustafa” në Prishtinë, ora 13:00)

- Instituti i Kosovës për Drejtësi organizon tryezë të rrumbullakët, mbi publikimin e Raporteve: ‘‘Transparenca e Qeverisë’’ dhe ‘‘Transparenca në Ndërmarrjet Publike’’. (Hotel Sirius, ora 13:00)
 
- Komisioni për Mjedis, Ushqim, Bujqësi, Planifikim dhe Zhvillim shqyrton Projektligjin për Vlerësimin e ndikimit në mjedis, etj. (Ndërtesa e Kuvendit, salla N303, ora 13:00)

 

- Ministri i Financave, Punës dhe Transfereve, Hekuran Murati, së bashku me Ministrin e Bujqësisë, Pylltarisë dhe Zhvillimit Rural, Faton Peci, prezantojnë buxhetin për vitin 2023 para qytetarëve të Komunës së Podujevës. (Teatrin ”Avdush Hasani” në Podujevë, ora 17:30)