20 Maj 2022

Aeroporti i Prishtinës pa kushte për udhëtarët me aftësi të kufizuara

Prishtinë, 14 maj - Handikos ka deklaruar se Aeroporti Ndërkombëtar i Prishtinës ‘’Adem Jashari’’, i cili konsiderohet si më i madhi në rajon e më gjerë, duke mundësuar fluturime për  një numër të lartë të udhëtarëve, nuk plotëson edhe kushtet e standardet për personat me aftësi të kufizuara.  

"Problem kyç, tash e sa kohë mbetet mungesa e karrocave të cilat shërbejnë për bartjen e udhëtarëve me aftësi të kufizuara brenda aeroplanit, por edhe mungesën e atyre nëpër ambientet e aeroportit", thekson Handikos.

Këto karroca do mundësonin një komoditet dhe qasje të lehtë edhe për personat me aftësi të kufizuara, sikurse për gjithë të tjerët.  

Kushtet e tilla i plotësojnë të gjitha aeroportet tjera në çdo vend, përfshirë edhe ato në rajon.

"Sipas informacioneve tona, shumë prej qytetarëve të Kosovës që jetojnë në diasporë, në veçanti ata që janë përdorues të karrocës, hasin në sfida për ardhjen e tyre përmes aeroportit për këtë shkak, apo edhe nuk mund të vijnë fare", thuhet me tej në reagimin e Handikos.

Handikos, me qëllim të lehtësimit dhe ofrimit të shërbimeve sa më efikase në Aeroportin e Prishtinës për udhëtarët me aftësi të kufizuara, para disa vitesh, u pati siguruar një numër të konsiderueshëm të karrocave, ndonëse nuk është obligim i organizatës. Përkundër përkrahjes tonë në këtë aspekt, dëshpërues është fakti që ato tani thuajse janë të papërdorshme dhe jo funksionale.

"Lidhur me këtë, disa herë kemi adresuar kërkesa apo sqarime, në veçanti mungesën e tyre brenda aeroplanit, por nuk janë marrë fare në konsideratë", pohon Handikos.

Handikos fton Ministrinë e Infrastrukturës, stafin kompetent të Aeroportit të Prishtinës, që sa më parë të krijojnë qasje dhe mundësi të barabarta për gjithë udhëtarët, të sigurojnë karrocat ashtu siç edhe kanë marrë obligim duke u bazuar në kalendarin e aktiviteteve, i cili ndërlidhet me shpalljen e vitit 2022 - Vit i Personave me Aftësi të Kufizuara në Kosovë.   

Në fotografi është një model se si duket një karrocë standarde e cila shërben për bartjen e personave me aftësi të kufizuara brenda aeroplanit.

Kalendari

Ngjarjet e datës 20 maj 2022

- Për herë të parë në Kosovë organizohet Dita Internacionale të Burimeve Njerëzore. (Amfiteatri i Fakultetit Ekonomik,  ora 9:30)

 - Komisioni për Ekonomi, Industri, Ndërmarrësi dhe Tregti diskuton rreth performances së përgjithshme të Kosovës në fushën e energjisë elektrike ne raport me kërkesat e Komunitetit të Energjisë. (Ndërtesa e Kuvendit, salla N10, ora 11:00)

- Presidentja e Republikës së Kosovës, znj.Vjosa Osmani Sadriu, Ministri i Mbrojtjes, Armend Mehaj marrin pjesë në ceremonisë së betimit  të ushtarëve të rijnë  FSK-së. (Kazerma e Komandës dhe Doktrinës në Ferizaj, ora 10:00)

- Kryetari i Kuvendit të Republikës së Kosovës, Glauk Konjufca, pret në takim ambasadoren e Greqisë, Heleni Vakali. (Kabineti i kryetarit, ora 10:00)

- Kryetari i Kuvendit të Republikës së Kosovës, Glauk Konjufca, pret në takim Komisionin e Venecias për Vetting. (Kabineti i kryetarit, ora 11:15 - Mediat mund të marrin pamje në fillim të takimeve)

- Në shënim të përvjetorit të masakrës së Dubravës, Ministrja e Drejtësisë, Albulena Haxhiu së bashku me studente nga Universiteti i Prishtinës, zhvillon një vizitë në Dubravë. (Dubravë, ora 11:30)

- Bashkimi i Sindikatave të Pavarura të Kosovës organizon protestë. (Sheshi Zahir Pajaziti, ora 13:00)

- Në kuadër të Ditëve të Gjuhës Gjermane organizohet piknik me poezi. (Pakru i qytetit të Prishtinës, ora 15:00)

- Në vazhdën e aktivitete për promovimin e lëvizjes së lirë nëpër Kryeqytet, Komuna e Prishtinës në bashkëpunim me “Qendra Marrëdhënie” në Tiranë, organizojnë aktivitetin “Festë n ‘ Rrugë” për të përjetuar së bashku lirimin e rrugëve afër shkollave për të mirën e fëmijëve tanë dhe gjithë komunitetit përreth. (Rruga “Zejnel Salihu”, përball Shkollës Fillore “Elena Gjika”, ora 17:00)

- Mbahet koncerti përmbylles i Ditëve të Gjuhës Gjermane. (Amfiteatri i Biblotekës Universitare, ora 19:00)