09 Dhjetor 2022

Përfundon Samiti Dixhital për Ballkanin Perëndimor

Prishtinë, 23 shtator - Në ditën e dytë të Samitit Dixhital për Ballkanin Perëndimor, i cili është mbajtur në Prishtinë, kanë mbajtur fjalën e tyre hyrëse Ministrja e Ekonomisë e Kosovës, Artane Rizvanolli, deputeti i Parlamentit Evropian, Lukas Mandl, Zëvendëspresidenti për Politika dhe Partneritet në Bankën Evropiane për Rindërtim dhe Zhvillim, Mark Bowman ku kanë folur për lidhjet që promovojnë diplomacinë dixhitale me Ballkanin Perëndimor (WB6) dhe Bashkimin Evropian si dhe prioritetet dixhitale në kuadër të Strategjisë së Bankës 2021-2023.

Po ashtu në ditën e dytë, në sesionin  me temën “Si të sjellim infrastrukturën më të avancuar në Ballkanin Perëndimor”?, folës ishin Artane Rizvanolli, Ministre e Ekonomisë të Kosovës, Admirim Aliti, Ministër i Shoqërisë Informatike dhe Administratës në Maqedoninë e Veriut, Enkelejda Muçaj, Zëvendësministre e Infrastrukturës dhe Energjisë në Republikën e Shqipërisë, Marash Dukaj, Ministër i Administratës Publike në Mal të Zi dhe anëtarë të Parlamentit Evropian, përfaqësues të Bankës Botërore, përfaqësues të bizneseve nga Kosova dhe vendet e rajonit.

Gjatë dy ditëve të Samitit Dixhital për Ballkanin Perëndimor “Prishtina 2022”, morën pjesë rreth 1300 pjesëmarrës, janë mbajtur 11 panele me më shumë se 60 folës, ekspertë të ndryshëm nga sektori i Teknologjisë së Informacionit dhe Komunikimeve (TIK), biznese të ndryshme, përfaqësues të qeverive, përfaqësues nga Komisioni Evropian, nga shtetet e Ballkanit Perëndimor, nga Bashkimi Evropian, përfaqësues nga Banka Botërore dhe më gjerë.

Në panelet e mbajtura ndër të tjera është diskutuar rreth prioriteteve që shtetet e rajonit kanë në fushën e dixhitalizimit, duke sjell në Ballkanin Perëndimor infrastrukturën më të avancuar dixhitale, duke nxitur zhvillimin dhe inovacionin, shtrirjen e rrjetit 5G dhe në veçanti nxitjen e zhvillimit të ekonomisë dixhitale, e cila shihet si një mundësi e mirë për rritjen e vendeve të punës, në kryerjen e shërbimeve të ndryshme dhe rritjen e tregtisë përmes formave dixhitale.

Në ditën e parë të Samitit “Dixhital Prishtina 2022” janë mbajtur 4 gara regjionale në kodim, lojëra kompjuterike dhe robotikë nga shkollat dixhitale të Kosovës si Ipko Foundation, Shkolla Digjitale, jCoders dhe Bonevet me pjesëmarrës të Ballkanit Perëndimor.

Sesioni hapës i ditës së dytë të këtij samiti, B2B ka regjistruar gjithsej 291 pjesëmarrës, përfaqësues të bizneseve nga Ballkani Perëndimor, Evropa, Turqia, Bullgaria duke realizuar në total 821 takime biznes me biznes për të eksploruar mundësitë e bashkëpunimit në mes tyre në projekte, produkte dhe iniciativa të përbashkëta.  

Si rezultat i këtyre takimeve janë arritur 17 marrëveshje të bashkëpunimit me bizneset vendëse, 7 të tjera janë në fazën e negocimit dhe të tjerët janë dakorduar për të zhvilluar kontakte në të ardhmen.

Bizneset pjesëmarrëse në B2B vijnë nga sektori i TIK-ut, kryesisht të fokusuar në zhvillim të softwerëve, zhvillimi i aplikacioneve të ndryshme, marketingu dixhital dhe kompani të cilat ofrojnë shërbime mbështetëse për klientë ndërkombëtarë.

Sesioni i B2B është bashkorganizuar nga Prishtina REA.

Dita e dytë ka shënuar përfundimin e punimeve të edicionit të pestë të Samitit Dixhital për Ballkanin Perëndimor “Prishtina 2022”i cili është mbajtur në Prishtinë me datë 21 dhe 22 shtator.

 

 

Kalendari

Ngjarjet e datës 9 dhjetor 2022 - Kryeministri i Republikës së Kosovës, Albin Kurti, presidentja Vjosa Osmani-Sadriu dhe kryetari i Kuvendit, Glauk Konjufca, marrin pjesë në dëgjimin publik për Projektligjin për Liritë Fetare. (Ndërtesa e Qeverisë, ora 9:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit shqyrton Raportit për Projektligjin Agjencinë Kosovare për Krahasim dhe Verifikim të Pronës, Projektligjin për Bujqësi dhe Zhvillim Rural, etj. (Ndërtesa e Kuvendit, salla N302, ora 9:30)

- Komisioni për të Drejtat dhe Interesat e Komuniteteve dhe Kthim shqyrton Projektligjin për parandalimin dhe kontrollin e integruar të ndotjes, me raport amendamente të Komisionit funksional për Mjedis, Ushqim, Bujqësi, Planifikim dhe Zhvillim, etj. (Ndërtesa e Kuvendit, salla N10, ora 9:45)

- Instituti i Kosovës për Drejtësi organizon konferencë për media, ku do të publikohet raporti me titull “Qeverisja me duar të pastërta”, raport ky mbi deputetët, ministrat dhe kryetarët e komunave, të cilët kanë probleme me ligjin. (Hotel Sirius, ora 10:00)

- Gjykata Kushtetuese organizon “Ditën e Gjykatës së Hapur” në shënim e Ditës Ndërkombëtare të të Drejtave të Njeriut. (Gjykata Kushtetuese, ora 10:00)

- Për të shënuar 9 dhjetorin, Ditën Ndërkombëtare kundër Korrupsionit, Koalicioni i Organizatave të Shoqërisë Civile dhe Mediave, do të mbajnë një konferencë me temën “Fuqizimi i Kapaciteteve të Shoqërisë Civile për luftimin e korrupsionit”. (Hotel Sirius, ora 10:00)

- Kuvendi i Republikës së Kosovës vazhdon seancën plenare. (Kuvendi i Kosovës, ora 10:00)

- Ministrja e Drejtësisë, Albulena Haxhiu bashkëbisedon me studentët e Kolegjit AAB për temën mbi dhunën në bazë gjinore. (Kolegji AAB, ora 10:30)

- Rreth 60 punëtor teknik dhe ata te sigurimit fizik qe punojnë në Qendrat e Mjekësisë Familjare disa shkolla te Prishtinës  do te protestojnë me kërkesën për rritje të pagave. (Para komunës se Prishtinës, ora 11:00)

- Këshilli Rinor Kosovar organizon Kuvendin Zgjedhor të Këshillit të Nxënësve të Kosovës në nivel vendi. (Amfiteatri i Ministrisë së Drejtësisë, ora 13:00)

- Instituti i Kosovës për Drejtësi organizon aktivitet me studentët e Klinikës Ligjore të IKD– së, ku do të bëhet prezantimi i shpalljes së simuluar të një aktgjykimi të një rasti të korrupsionit. (Sheshi Skënderbeu në Prishtinë, ora 13:30)

- Lidhja Demokratike e Kosovës mban konferencë për medie. (Selia qendrore e LDK-së, ora 13:30)

- Ministrja e Drejtësisë, Albulena Haxhiu merr pjesë në një tryezë me gratë në Komunën e Mitrovicës. (Restaurantin "Va Piano", ora 15:00)

- Me rastin e 5 vjetorit të ndarjes nga jeta të artistit, Blerim Peci, Komuna e Mitrovicës, në bashkëpunim me artistë, familjarë e miq të ish të ndjerit organizojnë takimin përkujtimor për të ndarë së bashku kujtime të bukura e të pashlyeshme për të. (Qendra e Kulturës "Rexhep Mitrovica", ora 17:00)

- Ministrja e Drejtësisë, Albulena Haxhiu merr pjesë në shfaqjen e filmit "Zgjoi". (Kino Armata, ora 17:00)