03 Gusht 2021

Presidenti Pacolli premton luftimin e grupeve kriminale në veri

Mitrovicë, 26 shkurt - Presidenti i Republikës së Kosovës, Behgjet Pacolli  i shoqëruar nga ministri i Punëve të Brendshme, Bajram Rexhepi qëndroi sot për vizitë ku edhe e kaloi në këmbë urën, e cila që nga paslufta është kthyer në një simbol të ndarjes së qytetit.

Ai vizitoi zonën e njohur si “Tre Rrokaqiejt” pjesën veriore të Mitrovicës, si dhe qëndroi për një kohë në shtëpinë e Ministrit Bajram Rexhepi në Suhadoll.

Vizita e Presidentit Behgjet Pacolli është vizita e parë e një presidenti të Kosovë në këtë pjesë të qytetit.

"Të gjitha bandat, kriminelët, që e pengojnë jetën normale në këtë anë ne do t’i luftojmë me vendosmëri. Ju them se në të ardhmen, askush nuk guxon ta çojë gishtin drejt asnjë banori, pa marrë parasysh i cilës etni është. Ju jeni pjesë e Kosovës dhe keni gjithë mbështetjen dhe përkushtimin e institucioneve të Kosovës”, theksoi Presidenti Pacolli gjatë një bashkëbisedimi me banorët e zonës së “Tre Rrokaqiejve”.

Ministri i Punëve të Brendshme, Bajram Rexhepi theksoi se termet pjesa veriore dhe jugore e qytetit janë terme gjeografike në kokat e disa njerëzve por “gradualisht, me një punë të përbashkët, krejt territori i Kosovës do të jetë unik, do të vlejnë ligjet e Kosovës”.

Më tej, ministri Rexhepi shpjegoi idetë e Presidentit Pacolli për këtë pjesë të qytetit, që përfshijnë sundimin e ligjit dhe zhvillimin ekonomik.

“Në rend të parë sundimi i rendit dhe ligjit dhe zhvillimi ekonomik dhe këto do të jenë si synime strategjike në të ardhmen që të bëhet integrimi i mirëfilltë edhe i qytetarëve, jo vetëm integrimi administrativ”, theksoi ministri Rexhepi.

Në vijim, Presidenti Pacolli u përgjigj në pyetjet e gazetarëve. I pyetur nëse në bisedimet me Serbinë a do të flitet për çështjen e kësaj pjese të Kosovës, Presidenti Pacolli u përgjigj:

“Sot është një ditë shumë e bukur, flasim për hallet e qytetarëve të Mitrovicës. Grupi për bisedime është në formim e sipër dhe ata kanë agjendën e vet, një agjendë e mbështetur nga miqtë tanë ndërkombëtarë, nga Qeveria e Kosovës dhe normalisht edhe nga Presidenca dhe t’i lëmë që ata të veprojnë me agjendën e vet”.

President, ju u thatë banorëve që do t’i luftoni grupet kriminale që janë në këtë pjesë të Kosovës, si do ta bëni këtë, ishte pyetja tjetër, duke u përgjigjur në të cilën Presidenti Pacolli tha:

“Unë po ju premtoj se në këtë mandat, në mandatin pesëvjeçar, bashkë me njerëzit e Qeverisë së Kosovës, bashkë me njerëzit e Kosovës, njerëzit që ia duan të mirën Kosovës, e duan Kosovën, ne edhe në këtë anë do të kthejmë rendin dhe ligjin. Ligji do të jetë mbi të gjithë dhe kjo pjesë, qytetarët e kësaj pjese, do të ndihen si pjesë plotësisht përbërëse e Kosovës”.

Ndërsa i pyetur cila është ndjenja e tij, duke qenë Presidenti i parë që kalon Urën e Ibrit në këmbë dhe vjen në këtë pjesë, Presidenti Pacolli u përgjigj:

“Për mua ishte hera e parë si president i Kosovës që ta kaloj urën, përpara unë kam kaluar këtë urë dhe po ju premtoj se edhe shumë herë të tjera ne do të vijmë në këtë pjesë të Kosovës. Këta qytetarë këtu e meritojnë këtë dhe ne do të jemi pjesë e halleve të këtyre qytetarëve këtu”.

Kalendari

Ngjarjet e datës 3 Gusht 2021

- Kuvendi i Republikës së Kosovës vazhdon seancën plenare në të cilën mbahet debat parlamentar lidhur me punën njëqind ditore të Qeverisë së Republikës së Kosovës. (Kuvendi i Kosovës, ora 10:00)

- Ministria e Kulturës, Rinisë dhe Sportit dhe Zyra e UNICEF-it në Kosovë shënojnë hapjen e Muajit të Rinisë me mundësi të punës praktike për 900 të rinj. (Parku i Gërmisë tek fusha e basketbollit, pranë Qendrës Rekreative, ora 10:00)

-  Komisioni për Mbikëqyrjen e Financave Publike shqyrton raportin e auditimit për pasqyrat financiare vjetore të Kompanisë “Telekomi i Kosovës” me të ftuar Kryeshefin ekzekutiv dhe Kryesuesin e Bordit. (Ndërtesa e Kuvendit, salla N506, ora 10:00)

- ATRC në bashkepunim me CSGD organizojnë tryezën e diksutimit në të cilën do të shpalosen rezultatet e raportit të “Hate O Meter” i cili është hulumtim mbi Gjuhën e Urrejtjes në Mediat Kosovare . (Hotel Sirius, ora 10:00)

- Ministri i Kulturës, Rinisë dhe Sportit, Hajrulla Çeku raporton para Komisionit për Arsim, Shkencë, Teknologji, Inovacion, KulturÑ‘, Rini dhe Sport. (Ndërtesa e Kuvendit, salla N204, ora 11:00)

- Kryetari i PDK-së Dega në Prizren, Shaqir Totaj mban konferencën e radhës për media. (Sheshi Shatërvan, ora 11:00)

- Mbahet mbledhja e Kryesisë së Kuvendit të Republikës së Kosovës. (Ndërtesa e Kuvendit, salla C 301, ora 14:00)