31 Korrik 2021

Mosnjohja e pavarësisë së Kosovës është rrezik për sigurinë e BE-së

Prishtinë, 21 korrik - Komisioni për Punë të Jashtme dhe Diasporë i Kuvendit të Republikës së Kosovës ka diskutuar sot lidhur me pesë shtetet e Bashkimit Evropain që nuk e kanë njohur pavarësinë e Kosovës.

Kryetari i komisionit, Haki Abazi tha se procesi i hapur i dialogut ka krijuar justifikimin e 5 shteteve anëtare të BE-së që të shtyjnë njohjen e Kosovës.

Mosnjohja e Kosovës nga 5 vende të Bashkimit Evropian sipas tij paraqet rrezik për sigurinë vet BE-së.

Anëtarët e Komisionit kërkuan unitet politik dhe plan strategjik kombëtar në përfaqësimin e Kosovës jashtë vendit.

"Gjithçka që ka të bëjë me njohjen duhet të jetë prioritet. Çka po marr unë përsipër është që të bisedoj me ministren për të parë se çfarë është bërë në të kaluarën në këtë drejtim. Kjo nuk po bëhet për kritikë për të kaluarën."

"Çka mund të ndaj me komisionin është që mosnjohja e pavarësisë së Kosovës është rrezikim i ombrellës së sigurisë së Bashkimit Evropian. Aspirata jonë është që të marrim ulësen në OKB", tha ai.

Deputetja e AAK-së Time Kadrija tha se mosnjohja e shtetit të Kosovës nga 5 vende të BE-së është pengesë për Kosovën.

Ajo ngriti edhe çështjen e lëvizjes së lirë, duke thënë se është e padrejtë që Kosova nuk ka liberalizim të vizave, teksa theksoi se vendet tjera po marrin statusin e kandidatit.

"Ne duhet me e pas një qasje të përbashkët. Kosova i ka plotësu të gjitha kushtet. Nuk duhet të bëhen gabime si ai i ministres së Punëve të Jashtme, sepse ne përkundër përkatësisë politike përfaqësojmë shtetin tonë në takime jashtë vendit. Zyrtarë të politikave të jashtme me shku me bë këso gabime për mua është e papranueshme."

"Njohja e pavarësisë së Kosovës duhet të jetë kërkesë, edhe liberalizimi i vizave edhe njohja. Për fat të keq vitin e kaluar kemi qenë hendikep për shkak të pandemisë. Tek këto vende është shumë më lehtë të depërtosh përmes diplomacisë parlamentare sesa përmes qeverisë. Do të ishte mirë të organizojmë takime bilaterale menjëherë pas pushimit. Takimet e komisioneve parlamentare kanë influencë", tha ajo.

Deputetja Ariana Musliu-Shoshi tha se duhet të hartohet një plan strategjik kombëtar për përfaqësimin e Kosovës në diplomacinë e jashtme.

Ajo shtoi se përmes grupeve të miqësisë mund të organizohen takime bilaterale në mënyrë që të përfaqësues të vendeve që nuk e kanë njohur vendin të njihen më mirë me atë që është Kosova.

Në këtë mbledhje u diskutua edhe për 56 grupet e miqësisë, për çka kryetari i komisionit Haki Abazi tha se i kanë dërguar emrat vetëm AAK dhe Lëvizja Vetëvendosje.

Me këtë rast, komisioni zgjedhi grupin punues për plotësim- ndryshimin e rregullores së punës, për të cilën u tha se është e vjetruar.

Kalendari

Ngjarjet e datës 1 Gusht 2021

- Nën organizimin e Presidentes së Republikës së Kosovës, Vjosa Osmani mbahet ceremonia e dorëzimit të medaljes post-mortem për Beau Biden më ç'rast me një fjalë rasti do t’iu drejtohet Presidentja Osmani, gjithashtu përmes një video-mesazhi edhe Presidenti i Shteteve të Bashkuara të Amerikës, Joe Biden, si dhe me një fjalë rasti ambasadori i Shteteve të Bashkuara në Kosovë Philip S. Kosnett. (Oborri në hyrje të objektit të Kuvendit ora 18:30 - Mediat duhet të jenë të pranishme në Presidencë, ora 17:45)