Prishtinë, 12 gusht - Në Kuvendin e Kosovës, sot u mbajt mbledhja konstituive e Komisionit të përbashkët Parlamentar për Stabilizim-Asociim BE-Kosovë (KPSA), i Legjislaturës VIII.

Kryetari i Kuvendit të Republikës së Kosovës, Glauk Konjufca, me këtë rast, tha se procesi i integrimit Evropian është një proces unifikues i shoqërisë sonë dhe njëherësh orientim yni kolektiv i padiskutueshëm në këtë drejtim.

Ai po ashtu shprehu nevojën e përshpejtimit të zbatimit të obligimeve që burojnë nga Marrëveshja e Stabilizim Asociimit, duke kërkuar njëkohësisht unitet politik në këtë drejtim, pasi sipas tij, kjo nuk është një garë politike por nevojë që Kosova të bëjë hapa sa më të shpejtë drejt integrimit evropian.

Kryetari Konjufca tha se Kuvendi i Republikës së Kosovës do të mbikëqyrë gjithmonë pakot e reformave me prioritet të lartë, meqë janë të një rëndësie të madhe për vendin.

"Implementimi i këtij procesi nuk është i njëanshëm, por është një ndër proceset më të rëndësishme që ne realizojmë bashkë me Bashkimin Evropian. Kosova tashmë e ka Planin Kombëtar për Zbatimin e Stabilizim Asociimit (PKZMSA), si dhe dje Qeveria miratoi Planin e Veprimit të Agjendës për Reforma Evropiane II, e cila do të vijë për miratim në Kuvend."

"Gjithashtu Kuvendi tanimë është duke zbatuar Planin për Mbikëqyrjen e Procesit Integrues 2020-2021, si dhe aktualisht ka Njësinë për Koordinim të Integrimit Evropian e cila është tërësisht funksionale."

"Të gjitha këto dokumente dhe kapacitete institucionale e profesionale, që posedoni në Kuvend ju si Komision, u ftoj që t’i veni në përdorim për të ndërmarrë reformat e duhura për punë të suksesshme të këtij komisioni, si dhe iu ftoj për bashkëpunim në aktivitete të përbashkëta në procesin integrues të Kosovës në BE”, tha kryetari  Konjufca.

Kryesuesja e Komisionit të përbashkët Parlamentar për Stabilizim Asociim BE-Kosovë, Mimoza Kusari Lila, sipas Vendimit të Kryesisë së Kuvendit Nr. 08-V-046, të datës 13 korrik 2021, bëri të ditur se në përbërje të këtij komisioni janë 13 deputetë anëtarë dhe 13 deputetë zv/anëtarë nga të gjitha partitë parlamentare dhe se takimi i parë i përbashkët me anëtarët e tjerë të Parlamentit Evropian synohet që të mbahet këtë nëntor në Kosovë.

“Kemi punuar në disa aspekte duke besuar që do kemi një dinamikë të plotë të punës e që kërkon bashkëpunim”, tha Kusari-Lila.

Pikëpamjet e tyre rreth punës dhe agjendës së këtij komisioni i dhanë edhe anëtarët e tjerë të Komisionit Parlamentar për Stabilizim Asociim, duke u zotuar për bashkëpunim në mes të grupeve parlamentare.​