07 Maj 2021

Kurti: Të kujdesemi për të varfërit, të sëmurët dhe per ata me nevoja të veçanta

Prishtinë, 15 prill - Kryeministri i Republikës së Kosovës, Albin Kurti, i shoqëruar nga Ministrja e Ekonomisë, Artane Rizvanolli, mori pjesë në fushatën “Thuaju jo qeseve të plastikës”, të organizuar nga HANDIKOS dhe The Balkan Forum.

Në këtë aktivitet simbolik edhe zyrtarisht janë prezantuar çantat e ripërdorshme të punuara tash e disa muaj nga personat me aftësi të kufizuara.

Kryeministri Kurti tha se është i bindur që Kosova, shteti ynë, si shtëpia e popullit tonë, duhet ta ketë një dysheme të fortë sociale dhe një kulm solid ambiental.

“Pra edhe duhet të kujdesemi për ata të cilët janë më të varfër, më të dobët, të sëmurë apo me nevoja të veçanta, por njëkohësisht edhe duhet ta kuptojmë që burimet natyrore janë të fundme dhe ato janë edhe mjedise jetësore, e jo vetëm lëndë e parë për teknologjinë”, tha kryeministri Kurti.

Duke vlerësuar këtë iniciativë, kryeministri Kurti tha se kemi nevojë për përgjegjësi institucionale dhe vetëdijesim shoqëror, dhe theksoi se ajo çka duhet të bëjnë është krijimi i një grupi punues, në të cilin marrin pjesë ministri të caktuara me komision parlamentar, por edhe shoqëria civile dhe bizneset, në mënyrë që ta bëjnë një paketë legjislative për mbrojtjen e ambientit, duke pasur parasysh edhe praktikat evropiane e shembujt nga vendet e përparuara, por njëkohësisht edhe situatën në të cilën ndodhet Kosova sot.

“Sigurisht se duhet ta synojmë zvogëlimin e plastikës, e në veçanti të qeseve, duke pasur një ndjeshmëri që mbase marketet e mëdha e bëjnë shumë më shpejtë e më kollaj sesa shitësit e vegjël”, u shpreh kryeministri Kurti, duke shtuar se kur e kemi vullnetin dhe dijen do të mund ta fillojmë një program të tillë, që nënkupton edhe zbatim të ligjeve edhe ligje të reja, pikërisht në këtë mandat të cilin porsa e kemi filluar.

 

 

 

Kalendari

Ngjarjet e datës 7 Maj 2021

- Ministrja e Drejtësisë, Albulena Haxhiu me rastin e përvjetorit të aprovimit të Konventës së Stambollit takohet me mbrojtësit e viktimave. (Pallati i Drejtësisë, ora 9:30)

- Lëvizja FOL organizon tryezë diskutimi me ç’rast publikon raportin “Realizimi i Planit të Punës së KPK-së dhe PSh-së për vitin 2020”. (Hotel Sirius, ora 10:00)
    
- Komisioni për të Drejtat e Njeriut, Barazi Gjinore, për Persona të Pagjetur dhe Peticione shqyrton Propozim-vendimit e Avokatit të Popullit lidhur me zgjedhjen e 5 zëvendësve të Avokatit të Popullit. (Ndërtesa e Kuvendit, salla N303, ora 10:00)
    
- Ministrja e Drejtësisë, Albulena Haxhiu me rastin e përvjetorit të aprovimit të Konventës së Stambollit viziton Qendrën për Mbrojtjen e Grave dhe Fëmijëve. (Strehimorja, Ulpianë, ora 10:45)
    
- KDI mban konferencë për medie ku do të shpalosën të gjeturat e hulumtimit mbi transparencën e komunave të Kosovës në prokurim publik, për vitin 2020. (Zyret e KDI-së, ora 11:00)
    
- Ministrja e Drejtësisë, Albulena Haxhiu me rastin e përvjetorit të aprovimit të Konventës së Stambollit takohet me Njësitin Kundër Dhunës në Familje-Policia e Kosovës. (Drejtoria e Përgjithshme e Policisë së Kosovës, ora 11:45)
    
- Ambasadori i BE-së në Kosovë, Tomas Szunyog, do ta ndajë çmimin “Evropiani i Vitit 2021”, i cili jepet për të gjashtën herë radhazi nga BE-ja. (Shtëpia e Evropës, ora 13:00)