20 Tetor 2021

Kryetari Konjufca priti në takim ambasadorin e Italisë, Antonello De Riu

Prishtinë, 13 tetor - Kryetari i Kuvendit të Republikës së Kosovës, Glauk Konjufca, priti sot në një takim njohës ambasadorin e Republikës së Italisë në Kosovë, Antonello De Riu.

Me këtë rast, kryetari Konjufca e përgëzoi ambasadorin De Riu për detyrën e re dhe shprehu mirënjohje për mbështetjen koherente e të gjithanshme të Republikës së Italisë ndaj shtetit tonë, duke nënvizuar njëherësh edhe rëndësinë e bashkëpunimit të mëtejmë bilateral. Po ashtu kryetari Konjufca e njoftoi ambasadorin italian rreth angazhimeve të Kuvendit për miratimin e ligjeve dhe harmonizimin e tyre me ato të BE-së.

Duke i vlerësuar si të shkëlqyeshme marrëdhëniet ndërmjet Republikës së Kosovës dhe Republikës së Italisë, ambasadori De Riu e falënderoi kryetarin Konjufca për mikpritjen dhe shprehu gatishmërinë për thellimin e bashkëpunimit në mes dy vendeve tona.

 

Kalendari

Ngjarjet e datës 20 Tetor 2021  - Kryeministri Albin Kurti dhe ministrja e Ekonomisë Artane Rizvanolli, vizitojnë ndërmarrjen “Trepça”. (Zyra e menaxhmentit të “Trepçës”, Parku Industrial, ora 8:00)

- Komisioni për Buxhet, Punë dhe Transfere shqyrton Raportin Vjetor Financiar te Bankës Qendrore, Fondit të Kursimeve Pensionale, raportin e Qeverisë për Buxhetin e së Kosovës dhe Agjencisë për Krahasim dhe Verifikim të Pronës. (Ndërtesa e Kuvendit, salla C203, ora 10:00)

- Mbahet mbledhja e dhjetë e Komiteti për Politik dhe Financa e Komunës së Rahovecit. (Salla e mbledhjeve të Kuvendit Komunal të Rahovecit, ora 10:00)

- Lëvizja FOL vazhdon serinë e debateve FOL Hapur me Ministren e Ekonomisë Artane Rizvanolli. (Hotel Opera në Prishtinë, ora 11:00)

- Rektori i Universitetit të Prishtinës Naser Sahiti dhe Dimitrija Sekovski, përfaqësues i SKAT Consulting nënshkruajnë marrëveshje bashkëpunimi për implementimin e programit studimor Master në Menaxhimin e Integruar të Resurseve Ujore në Kosovë. (Rektorati i UP-së, ora 11:00)

- Koalicioni ad-hoc i organizatave të shoqërisë civile dhe aktivistëve mjedisor ju ftojnë në konferencën për media, ku do të njoftoheni me zhvillimet e fundit që ndërlidhen me paditë për shpifje të ushtruara kundër aktivistëve Shpresa Loshajt dhe Adriatik Gacaferi, nga kompania Kelkos si dhe operimet e kësaj kompanie në Deçan. (Para objektit të Qeverisë ish-Rilinjda, ora 13:00)

- Baleti Kombëtar i Kosovës mban konferencë për medie me rastin e Premierës së shfaqjes “Tanzminiaturen” & “Tangata” me koreografi nga Ricardo Fernando.  (Teatri Kombëtar i Kosovës, ora 13:00)