19 Tetor 2021

Hoxhaj: Shtetet dhe kufijtë kapituj të mbyllur në Ballkan

Prishtinë, 3 korrik 2011 – Gazeta e përditshme bullgare “Dnevnik” dhe Agjencia e Lajme e Sofjes “Novinite” kanë botuar dy intervista ekskluzive me Ministrin e Punëve të Jashtme të Republikës së Kosovës, Enver Hoxhaj.   

Në këto dy intervista të gjata, Ministri Hoxhaj ka folur për zhvillimet e fundit në dhe rreth Kosovës, për progresin e shtetit në proceset e brendshme shtetndërtuese, forcimin e vazhdueshëm të subjektivitetit ndërkombëtar dhe për avancimin e proceseve integruese të Kosovës në mekanizmat euroatlantik.

Në intervistën për “Dnevnik”, Ministri i Punëve të Jashtme i Kosovës, fillimisht ka shprehur përkushtimin e Republikës së Kosovës për të forcuar marrëdhëniet me vendet e rajonit, përfshirë edhe Bullgarinë, sidomos në avancimin e bashkëpunimit në ekonomi, arsim, tregti, kulturë.

Hoxhaj ka thënë se për Kosovën është e rëndësishme puna e bërë nga Bullgaria në të kaluarën për t'u bashkuar me BE-në, duke shtuar se Bullgaria është shembull shumë i rëndësishëm për Kosovën në procesin e përgatitjes së vendit për integrim në BE.

Lidhur me perspektivën integruese të Kosovës, Hoxhaj ka thënë se së pari, Kosova duhet të marrë një udhërrëfyes për viza, në mënyrë që të fillojë plotësimi i kritereve për këtë proces.

“Së dyti është shumë e rëndësishme që të ketë një marrëdhënie kontraktuale me Komisionin Evropian, sepse në këtë mënyrë mund të marrim përkrahje për zhvillimin ekonomik dhe tregtar”, ka thënë Hoxhaj, duke shtuar se tashmë duhet të merren hapat e nevojshëm në përputhje me shtatë masat e propozuara nga KE në vitin 2009, në lidhje me të ardhmen evropiane të Kosovës.

Rreth procesit të normalizimit të marrëdhënieve të Kosovës me Serbinë, Hoxhaj ka thënë se Serbia duhet të fillojë të pranojë realitetin se Kosova është një vend i pavarur. “Është shumë e rëndësishme që të ketë marrëdhënie normale dhe të mos përdoret fjalori që ka përdorur ndonjëherë Beogradi. Të shmangen ofertat që vijnë nga Boris Tadic, në lidhje me ndarjen e territorit të Kosovës, për të krijuar shtete mono-etnike më të mëdha të Serbisë dhe të Shqipërisë në rajon. Është e vërtetë e rëndësishme që kjo retorikë të jetë harruar”, ka thënë Ministri Hoxhaj.

Në intervistën për “Dnevnik”, Hoxhaj ka rikonfirmuar aspiratën gjithëpopullore të qytetarëve të Kosovës për integrim në mekanizmat evropianë, duke argumentuar edhe faktin se mosnjohja e Kosovës nga pesë shtete të BE-së, është e lidhur me politikën e brendshme të tyre.

Në këtë intervistë, Hoxhaj ka folur edhe për perspektivat zhvillimore ekonomike të Kosovës, duke theksuar synimin e Qeverisë së Kosovës që në të ardhmen të investohet më shumë në sektorin e energjisë, bujqësisë, minierave, krijimin e  një ekonomie të bazuar në shërbime dhe kualifikimin e njerëzve për tregun e punës. 

Ndërkaq, në intervistën për Agjencinë e Lajme të Sofjes “Novinite”, Ministri i Punëve të Jashtme Enver Hoxhaj ka thënë se Kosova dhe Bullgaria në të ardhmen pritet të nënshkruajnë disa marrëveshje të cilat mund të përdoren për promovimin e marrëdhënieve të ngushta jo vetëm ndërmjet dy qeverive dhe dy shteteve, por edhe në raportet ndërmjet dy shoqërive dhe dy popujve tanë.

Lidhur me avancimin e shkëmbimeve ekonomike mes dy vendeve, Ministri Hoxhaj ka thënë se hapi i parë që duhet të ndërmerret është nënshkrimi i disa marrëveshjeve në mbështetje të njerëzve të biznesit në Bullgari dhe Kosovë.

Në këtë intervistë, Ministri Hoxhaj ka folur edhe për proceset ndërkombëtare që lidhen me Kosovën, idetë anti-evropiane të Serbisë për ndryshim kufijsh apo krijim shtetesh mono-etnike, minoritetet në Kosovë dhe çështjet që lidhen me procesin e njohjes së Kosovës, veçanërisht nga pesë vendet e BE-së që ende se kanë marrë një vendim të tillë.

Duke iu referuar ideve të Beogradit për ndarjen e Kosovës, Ministri Hoxhaj ka thënë se Kosova është shteti i shtatë i pavarur i dalë nga shpërbërja e ish-Jugosllavisë. “Kjo do të thotë që çështjet e kufijve, shteteve dhe territoreve në rajon janë një kapitull i mbyllur. Ne nuk do të pranojmë kurrë idetë për ndarje etnike dhe territoriale sepse këto ide do të krijonin jostabilitet, do të prodhonin dhunë dhe i tërë rajoni do të kthehej prapa, aty ku ishte para 20 vjetësh”, ka thënë Hoxhaj.

Rreth ideve për krijimin e shteteve të mëdha kombëtare në rajon, Ministri Hoxhaj po ashtu ka thënë se është vizion anti-Evropian promovimi i konceptit të shteteve një-etnike, duke shprehur përkushtimin e plotë të popullit të Kosovës për krijimin e një shteti civil, në përputhje me Kushtetutën e Kosovës dhe Planin e Ahtisaarit.

Kalendari

Ngjarjet e datës 19 Tetor 2021

- Mbahet seanca plenare e Kuvendit të Republikës së Kosovës. (Ndërtesa e Kuvendit, ora 10:00)

- Shefi i Misionit për Vëzhgimin e Zgjedhjeve nga BE Lukas Mandl dhe Udhëheqësja e Delegacionit të Anëtarëve të Parlamentit Evropian Viola von Cramon-Taubadel mbajnë konferencë për shtyp lidhur me për zgjedhjet lokale në Kosovë. (Hotel Swiss Diamond, ora 11:00)

- Organizata për Rritjen e Cilësisë në Arsim publikon raportin "Transparenca dhe llogaridhënia në universitetet publike në Kosovë - Mos - Informimi i Publikut 3". (Swiss Diamond Hotel, ora 11:00)

- Komisioni Evropian do ta publikojë paketën vjetore të zgjerimit, përfshirë Raportet e Vendeve ku do te mbahet konferencë për shtyp nga Komisioneri për Fqinjësi dhe Zgjerimi, Oliver Varhelyi. (Transmetimi në faqen e Zyrës së BE-së në Facebook, ora 17:15)

- Teatri i Prishtinës Dodona shfaq “Bob Vatsoni bie nga kati i nëntë por nuk vdes plotësisht”. (Teatri Dodona, ora 17:30)

- Shefi i Zyrës së BE-së, Tomas Szunyog i dorëzon raportin e Komisionit Evropian Kryeministrit të Kosovës, Albin Kurti me ç'rast do të mbajnë edhe një konferencë te përbashkët për shtyp, ora 18:30)