01 Gusht 2021

Çekia mbështet proceset integruese të Kosovës

Prishtinë, 1 prill - Ministri i Punëve të Jashtme i Republikës së Kosovës, Enver Hoxhaj, ka pranuar të premten një letër urimi nga Ministri i Punëve të Jashtme të Republikës së Çekisë, Karel Schwarzenberg.

Në këtë letër, e cila është dorëzuar nga Ambasadori i Çekisë në Kosovë, Jiri Dolezel, shefi i diplomacisë çeke ka shprehur urimet e tij për emërimin e Ministrit Enver Hoxhaj në postin e Ministrit të Punëve të Jashtme të Republikës së Kosovës, duke shprehur vullnetin e tij për të bashkëpunuar në zhvillimin e mëtejshëm të raporteve të shkëlqyeshme në mes të dy shteteve.

“Dëshiroj të ju siguroj për mbështetjen e vazhdueshme të shtetit tim për Kosovën në rrugën drejt Bashkimit Evropian”, thuhet në letrën e shefit të diplomacisë çeke, Karel Schwarzenberg.

Ministri i Punëve të Jashtme i Çekisë, po ashtu ka shprehur dëshirën që të takohet së shpejti me homologun kosovar, Enver Hoxhaj.

Ndërsa,  Ministri i Punëve të Jashtme i Republikës së Kosovës, Enver Hoxhaj, gjatë takimit me Ambasadorin e Çekisë në Kosovë, Jiri Dolezel, ka shprehur vullnetin e institucioneve të Kosovës për të forcuar bashkëpunimin e gjithanshëm me Çekinë, e veçanërisht intensifikimin e marrëdhënieve ekonomike. 

“Dëshirojmë të intensifikojmë marrëdhëniet në të gjitha fushat, forcimin e bashkëpunimit mes dy qeverive, dy parlamenteve por mbi të gjitha mes qytetarëve të dy shteteve tona”, ka thënë Ministri Hoxhaj.

Kurse, Ambasadori Jiri Dolozel ka shprehur mbështetjen e Republikës çeke për shtetin e  Kosovës në të gjitha aspekte, përfshirë edhe procesin e liberalizimit të vizave për qytetarët e Kosovës.

Ai po ashtu ka bërë të ditur se Ministri i Punëve të Jashtme të Çekisë,  por edhe disa zyrtarë të tjerë të lartë të shtetit çek, planifikojnë të vizitojnë Kosovën. 

Kalendari

Ngjarjet e datës 1 Gusht 2021

- Nën organizimin e Presidentes së Republikës së Kosovës, Vjosa Osmani mbahet ceremonia e dorëzimit të medaljes post-mortem për Beau Biden më ç'rast me një fjalë rasti do t’iu drejtohet Presidentja Osmani, gjithashtu përmes një video-mesazhi edhe Presidenti i Shteteve të Bashkuara të Amerikës, Joe Biden, si dhe me një fjalë rasti ambasadori i Shteteve të Bashkuara në Kosovë Philip S. Kosnett. (Oborri në hyrje të objektit të Kuvendit ora 18:30 - Mediat duhet të jenë të pranishme në Presidencë, ora 17:45)