24 Maj 2022

Dy lajme të mira

Shkruar nga Ali Mehmeti

Pas humbjes së djathtës ekstreme në Francë, e njëjta ndodhi edhe në Slloveni. Atje fitoi Robert Golob, në garë me kandidatin tjetër Janez Jansha, përkundër shumë lojërave të pista që u bënë kundër Golobit.

Robert Golob është një inxhinier i elektroteknikës i doktoruar në vitin 1994 në po këtë drejtim. Në kohën, sa Milan Kuçan dhe Janez Drnovshek ishin presidentë të Sllovenisë, ai kishte funksione politike, kurse nga viti 2006 vihet në ballë të ndërmarrjes shtetërore GEN-I ku mbetet gjer në muajin dhjetor 2021.

E zhvilloi këtë ndërmarrje në përmasa ndërkombëtare duke zhvilluar aktivitet në 22 shtete, me 16 filiale dhe 500 punëtorë, në lëmin e prodhimit dhe shitblerjes të energjisë elektrike dhe gazit.

Përveç kësaj, ai kishte formuar edhe  një parti politike dhe në fund “Lëvizjen Liria”, me të cilën kandidoi për president të Sllovenisë në zgjedhjet e 24 prillit 2022, të cilat edhe i fitoi.

Kundërkandidati i tij Janez Jansha, popullist i djathtë, adhurues i Donald Trump, i përkrahur nga autokrati hungarez Orban, kurse ky i fundit i përkrahur nga Putini, nuk la gjë pa bërë, për ta diskredituar Golobin.

Madje nga dita që kuptoj se do ta ketë për kundërkandidat filloi të thur plane kundër tij. Me 17 mars 2022 mediumet në Slloveni publikuan lajmin se Golob kishte xhiro-llogari sekrete në Rumani, kurse paraprakisht kishte deklaruar se nuk ka një të tillë askund në botë.

Vetëm 4 ditë para zgjedhjeve, me 20 prill 2022, Golobi arriti ta vërteton nëpërmjet organeve të shtetit rumun se iu kishte vjedhur identiteti; se ekzistonte një xhiro-llogari në Raiffeisen bankë në Rumani, në emrin Robert Golob, për që nuk ka të bëj me atë, e për më tepër në këtë xhiro-llogari nuk kishte pasur kurrfarë hyrje-dalje të parave!

Tentimi i dytë për diversion u bë 4-5 ditë para zgjedhjeve, kur një twitt mesazh nga Mirko Mayer, redaktor i stacionit televiziv slloven Planet TV, në pronësi të Jozsef Vida, një oligark hungarez nga rrethi i Viktor Orban publikoi lajmin sipas të cilit, Golob ishte i përfshirë në shpëlarje të parave.

Këtë lajmë e transmetuan të gjitha mediumet duke përfshirë edhe ato të Kosovës, pasi përmendej si i përfshirë, edhe emri i ambasadorit të Kosovës në Kroaci Martin Berishaj.

Tentimi i tretë për diversion u bë ditën e zgjedhjeve, kur mediumet e afërta me Janshën lansuan lajmet se Rusia po ndërhyn në zgjedhjet sllovene duke përkrahur Golobin.

Edhe pse mediumet më të mëdha sllovene nuk shkruajtën për këtë, Partia Popullore Evropiane (EPP), anëtare e së cilës është ajo e Janshës, postoi të dielën në Twitter se ishte e shqetësuar për ndërhyrjen e mundshme të Rusisë në zgjedhjet sllovene.

Në fakt kjo ishte një pritë, për të kontestuar zgjedhjet nëse rezultati do jetë i disfavorshëm, kurse diferenca të jetë e vogël, siç pritej.

Por, as diferenca nuk qe e vogël dhe as votuesit nuk u mashtruan, ashtu që Jansha u detyrua t’ia uroj fitoren Golobit.

Pra, tanimë që është dokumentuar se diversioni i parë dhe i tretë nuk ishin asgjë tjetër por lajme të rrejshme, si mund ta marrim për të mirëqenë akuzën e Janshes në lidhje me ambasadorin e Kosovës në Kroaci Martin Berishajn, sipas të cilit, ai është i përfshirë në shpëlarje të 600 mijë eurove, bashkë me Golobin dhe për llogari të tij.

Lajm i mirë është që Agjencia kundër korrupsionit e Kosovës sot hapi hetim mbi pasurinë e ambasadorit në fjalë, që përfundimisht do i pohoj ose mohoj akuzat e Janshës.  
 

Kalendari

Ngjarjet e datës 25 maj 2022

- Instituti Demokratik i Kosovës mbanë diskutimin publik me temën “Raportet Kosovë-Serbi: Tabelat e veturave dhe një Dialog që nuk po lëvizë!” një diskutim i përbashkët i përfaqësuesve të shoqërisë civile me pjesëmarrës nga politika, mediat dhe përfaqësuesit e misioneve ndërkombëtare në Kosovë. (Hotel Sirius, ora 9:30)  

- Komisioni për Buxhet, Punë dhe Transfere, shqyrton raportin vjetor financiar të Agjencisë për Informim dhe Privatësi për vitin 2021, Projektligjin për plotësimin dhe ndryshimin e Ligjit për Fondet Pensionale të Kosovës, etj. (Kuvendi i Kosovës, salla C203, ora 10:00)

- OJQ "Iniciativa për Drejtësi dhe Barazi - Inject" organizon konferencën përmbyllëse  të Projektit me titull “Sigurimi i të Drejtave Pronësore të Grave përmes rritjes së Kapaciteteve Institucionale në Kosovë”.  (Hotel Emerald, ora 10:00)

- Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione, diskuton për zbatimin e Ligjit për Mbrojtjen e Fëmijës. (Kuvendi i Kosovës, salla N302, ora 10:00)

- Kryetari i Komunës së Prizrenit, Shaqir Totaj, pret në takim Christopher Hyland, kontribues në Pavarësinë e Kosovës në SHBA-të dhe në prezantimin e shtetit tonë te ish-presidenti amerikan Bill Clinton. (Shtëpia e Bardhë, Prizren, ora 11:00)

- Mbahet edicioni i 21-të të panairit ndërkombëtar EXPOKOS, që i dedikohet bizneseve të sektorëve të: Ndërtimit, Energjisë, Makinerisë dhe Sigurisë dhe Mbrojtjes. Merr pjesë zëvendëskryeministri i Kosovës, Besnik Bislimi. (Pallati i Rinisë, ora 11:00)

- Mbahet Kuvendi i pestë i Partisë Eko Lëvizja e Gjelbër e Kosovës. (Hotel Grand, salla e Kuqe, ora 11:00)

- Drejtoria e Mirëqenies Sociale, në kuadër të “Fushatës vetëdijesuese për trajtimin e fëmijëve në situatë rruge” organizon një kampanjë me moton “Unë s’jap lëmoshë, AS TI! & Bashkë t’i mbrojmë fëmijët në situatë rruge” me qëllim të përçimit të mesazhit se dhënia e lëmoshës cenon dhe dëmton jetën e fëmijëve në situatë rruge. (Sheshi “Nënë Tereza”, ora 11:00)

- Punëtorët e Lotarisë së Kosovës protestojnë në shenjë pakënaqësie për mosplotësimin e kërkesave të tyre për Ligjin për Lotarinë e Kosovës dhe pagat për këta punëtorë. (Para ndërtesës së Qeverisë, ora 11:30)

- Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022, në nivelin legjislativ, ekzekutiv, rregullator dhe në ndërmarrje publike mban mbledhje. (Kuvendi i Kosovës, salla N303, ora 14:00)

- Instituti Kombëtar Demokratik organizon debatin e parë mbi politika nën temën “Në mbrojtje të demokracisë: Politikat gjithpërfshirëse të punësimit kanë rëndësi”. (Objekti i komunës së re në Prishtinë, ora 14:00)

- Klubi Futbollistik Drita mban konferencë për medie. (Selia e Federatës së Futbollit të Kosovës, ora 14:00)

- Klubi Futbollistik Llapi mban konferencë për medie. (Selia e Federatës së Futbollit të Kosovës, ora 15:00)

 Fondacioni Lumbardhi hapë sezonin e programeve që kremtojnë 70-vjetorin e kinemasë me promovimin e librit “Lumbardhi: një histori episodike” dhe fillimin e programit të filmit LXX në ekran të madh. (Kino Bahçe në Prizren, ora 19:00)