05 Dhjetor 2022

'Visar Kuçi Trio'' promovon albumin "Departures"

Prishtinë, 22 dhjetor -  "Visar Kuçi Trio" promovon albumin e tyre të ri të titulluar "Departures" më ç'rast do të mbahet një koncert promovues në "Kino Armata", në Prishtinë.

Ky event do të realizohet duke respektuar të gjitha masat e parandalimit të përhapjes së virusit Sars-COV-2, duke u bazuar në manualin e Ministrisë së Shëndetësisë.

Albumi dhe koncerti janë të mbështetura nga Komuna e Prishtinës dhe Kino Armata.

"Visar Kuçi Trio" u formua ne vitin 2013 nga Visar Kuçi në kitarë, Enver Muhamedi në kontrabas dhe Enes Bajramliqi në tupana.

Ne vitin 2013, ata debutuan në "Prishtina Jazz Fest". Pas asaj, trioja ishte aktive duke marrë pjesë në shumë organizime të ndryshme të jazz skenës së Kosovës si dhe asaj ndërkombëtare.

Në vitin 2017, ata publikuan albumin e tyre të parë të titulluar "Modern Waves".

Në nëntor të vitit 2019, ata patën dy koncerte në Stamboll të Turqisë. Gjatë qëndrimit në Stamboll, incizuan studio albumin e tyre të dytë, të titulluar "Departures".

Albumi ishte paraparë të publikohej në qershor të këtij viti, mirëpo për shkak të situatës së krijuar me pandeminë, finalizimi i tij u bë në fund të nëntorit, pra një vit pas audio incizimit.

Albumi u incizua në "Hayyam Studio”, në Stamboll, në nëntor të vitit 2019.

Albumi "Departures" përmban tetë krijime të reja të kompozuara nga Visar Kuçi, përveç këngës "Departures", (emrin e së cilës e mban ky album) që është kompozuar nga Enver Muhamedi dhe Visar Kuçi.

Albumi i takon zhanrit "Modern Jazz" dhe është një përfaqësim i shumë stileve apo nën-zhanreve të muzikës jazz. Kryesisht ka karakter minimal me tema të shtrira që krijojnë hapësirë meditative për dëgjuesin.

Dizajni i mbështjellësit u punua nga Nita Salihu - Hoxha dhe është përfaqësim i drejtpërdrejtë i konceptit muzikor që ka ky album.

Audio miksimi dhe masterizimi u bë në Prishtinë, nga Tomor Kuçi.

"Departures", në gjuhën shqipe, në terminologjinë e fluturimeve, përkthehet si "Nisjet", mirëpo ka edhe kuptime të tjera si: largim ose shmangie. “Departures” (Nisjet) gjatë këtij viti ishin pothuajse plotësisht të ndaluara për të gjithë, gjë që e bën krijimin muzikor të hapësirave të reja nga trio edhe më domethënës.

Albumi do të printohet në një numër të kufizuar në formë të CD-së, mirëpo forma kryesore e distribuimit do të jetë në platformën digjitale për muzikë, "Spotify".

Albumi i Visar Kuçi Trio-s, "Departures", është dedikim për Elmir Taranin, njërin prej përkrahësve dhe njëherit, adhuruesëve më të mëdhenj të trios, i cili para një viti na la fizikisht, për të mbetur përgjithmonë në kujtimet dhe muzikën e trios.

Kalendari

Ngjarjet e datës 5 dhjetor 2022 - Kryetari i Kryeqytetit, Përparim Rama, do të nënshkruajë marrëveshjen me partneritet publiko privat për ndërtimin e tri shkollave të reja dhe ofrimin e shërbimeve të mirëmbajtjes dhe operimit në Komunën e Prishtinës. (Ndërtesa e Vjetër e Komunës së Prishtinës, ora 9:00)

- Instituti i Kosovës për Drejtësi, Grupi për Studime Juridike dhe Politike, Lëvizja Fol, Iniciativa për Progres, Çohu dhe Colombus organizojnë tryezë të rrumbullakët, ku do të diskutohet lidhur me “Reforma në Drejtësi”. (Hotel Sirius, ora 10:00)

- Ministrja e Drejtësisë, Albulena Haxhiu do të bëjë lansimin e Protokollit Shtetëror për Trajtimin e Rasteve të Dhunës. (Hotel Emerald, ora 11:00)

- Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022 interviston Njazi Thaçin, Luigj Imerin, Perparim Kabashin, Nagip Krasniqin, Faruk Hajrizin, Rrezarta Pllanën, Hysen Fazliun, Musa Misinin, Skender Hazirin, Ali Hamitin, Izet Rushitin dhe Krenar Bujupin. (Ndërtesa e Kuvendit, salla N204, ora 11:00)

- Presidentja e Republikës së Kosovës, Vjosa Osmani Sadriu pret në takim Ndihmës Administratoren e USAID-it, Erin E. McKee. (Kabineti i Presidentes,ora 12:00)

- Ministria e Kulturës, Rinisë dhe Sportit në bashkëpunim me UNICEF-it dhe UN Volunteers shënojnë Ditën Ndërkombëtare të Vullnetarizmit. (Kino Armata, sheshi “Zahir Pajaziti”, ora 13:00)

- Instituti i Kosovës për Drejtësi organizon tryezë të rrumbullakët, ku do të prezantohet raporti me titull “Parashkrimi i Korrupsionit”, i cili është rezultat i monitorimit sistematik që IKD i bënë sistemit Gjyqësor dhe atij Prokurorial të Republikës së Kosovës. (Hotel Sirius, ora 13:00)

- Zëvendësministri i Drejtësisë, Blerim Sallahu, do të hapë ekspozitën e të burgosurve rreth rasteve të Dhunës në Familje. (Hollin e Ministrisë së Drejtësisë, ish objekti Rilindja, ora 13:00)

- Këshilli Rinor Kosovar në bashkëpunim me Kuvendin e të Rinjëve të Ferizajt dhe Komunën e Ferizajt do të mbajë panelin e diskutimit dhe aktivitetin ‘Dita e Vullnetarizmit’ me qëllim të promovimit dhe diskutimit rreth punës vullnetare, nevojave të vullnetarëve dhe aktiviteti i tyre në këtë komunë. (Salla e Kuvendit Komunal në Ferizaj, ora 14:00)

- Lëvizja FOL në kuadër të  “Javës Kundër Korrupsion 2022” mban konferencë për media me ç’rast do të bëjë publikimin e raportit "Masat disiplinore kundër nëpunësit civil për korrupsion dhe shkelje etike". (Hotel Sirius, ora 15:15)

- Kryeministri i Kosovës, Albin Kurti pret në takim Ndihmës Administratoren e USAID-it, Erin E. McKee. (Zyra e Kryeministrit të Republikës së Kosovës, ora 15:45)            


- Komisioni Qendror i Zgjedhjeve mban mbledhjen e radhës. (Objekti i KQZ-së, ora 16:30)