07 Shkurt 2023

“Lumbardhi Përsëri Publik” ndër fituesit e Çmimeve të Trashëgimisë Europiane

Bruksel, 1 korrik - Komisioni Evropian dhe Europa Nostra sapo kanë shpallur fituesit e vitit 2022 Çmimet e Trashëgimisë Evropiane / Çmimet Europa Nostra, financuar nga programi i BE-së për Evropën Kreative.

Në mesin e fituesve të sivjetëm është edhe iniciativa për ruajtjen dhe rijetësimin e Kino Lumbardhit, “Lumbardhi Public Again” (Lumbardhi Përsëri Publik) e cila u drejtua nga Fondacioni Lumbardhi me partnerë prej vitit 2015.

Këtë vit, që shënon 20 vjetorin e Çmimeve më prestigjioze të Evropës në fushën e trashëgimisë, 30 arritje të jashtëzakonshme të trashëgimisë nga 18 vende evropiane janë dhënë në pesë kategori. Këto kategori janë në përputhje me zhvillimet dhe prioritetet më të fundit në lidhje me politikën dhe praktikën e trashëgimisë në Evropë. Fituesit do të festohen më 26 shtator në Pragë në Ceremoninë e Çmimeve të Trashëgimisë Evropiane, që do të mbahet në Operën Shtetërore të restauruar së fundmi dhe bashkëprezantuar nga Komisionerja Evropiane për Inovacionin, Kërkimin, Kulturën, Arsimin dhe Rininë, Mariya Gabriel dhe Presidenti Ekzekutiv i Europa Nostras, Prof. Dr. Hermann Parzinger.

Duke reaguar ndaj shpalljes së fituesve të vitit 2022, Komisionerja Evropiane Mariya Gabriel, deklaroi: “Përgëzoj ngrohtësisht të gjithë fituesit e Çmimeve të Trashëgimisë Evropiane të këtij viti / Çmimeve Europa Nostra për cilësinë e jashtëzakonshme të punës së tyre dhe hapjen e tyre ndaj inovacionit. Viti 2022 është një vit i veçantë pasi ne po festojmë 20 vjetorin e Çmimit të BE-së për Trashëgiminë Kulturore, i cili është bërë çmimi më i spikatur për komunitetin evropian të trashëgimisë. Shumë nga iniciativat e shpërblyera demonstrojnë interesin dhe angazhimin e madh të të rinjve për trashëgiminë tonë, historinë tonë dhe identitetin tonë kulturor, i cili është veçanërisht i rëndësishëm në këtë Vit Evropian të Rinisë. Një mendim i veçantë shkon për dy laureatët ukrainas. Creative Europe, që i bashkëfinancon Çmimet, qëndron për promovimin e kulturës dhe krijimtarisë në ndërtimin e shoqërive gjithëpërfshirëse dhe kohezive të bazuara në vlerat tona thelbësore evropiane.”

Presidenti Ekzekutiv i Europa Nostra, Prof. Dr. Hermann Parzinger, tha: “Fituesit e çmimit të këtij viti janë shembuj të fuqishëm se si trashëgimia jonë na rilidh me natyrën, ndihmon në krijimin e ndjenjës së përkatësisë dhe vendit dhe është një bllok integral ndërtimi në zhvillimin e një ekonomie që mbështetë një mënyrë të qëndrueshme dhe gjithëpërfshirëse të jetës. I përgëzoj këta fitues të jashtëzakonshëm, profesionistë dhe entuziastë, për punën e tyre thelbësore dhe të lavdërueshme”.

“Ndikimi që ka pasur nisma “Lumbardhi Përsëri Publik” në komunitetin lokal është shumë cilësor dhe dallohet për mënyrën se si ka ndikuar në politikat dhe qëndrimet e trashëgimisë kulturore në rajon e më gjerë. Angazhimi kreativ i të rinjve në aktivitete është i lavdërueshëm dhe bën të dukshme vlerat e shumta të vendeve të trashëgimisë për zhvillimin e qëndrueshëm ekonomik dhe social të qyteteve”, theksoi juria e Çmimeve.

Vendimin rreth fituesve të çmimeve e mori juria e përbërë nga ekspertë të trashëgimisë nga e gjithë Evropa, pas vlerësimit nga komisionet e pavarura përzgjedhëse të kandidaturave të paraqitura nga organizata dhe individë nga 36 vende evropiane.

 

Kalendari

Ngjarjet e datës 7 shkurt 2023

 - Komisioni për Arsim, Shkencë, Teknologji, Inovacion, KulturÑ‘, Rini dhe Sport, shqyrton Projektligjin pÑ‘r Agjencinë e Kosovës për Akreditim. (Kuvendi i Kosovës, salla N303, ora 10:00)
    
- Komisioni për Ekonomi, Industri, Ndërmarrësi dhe Tregti, shqyrton Planin e Performancës për vitin 2023, të Zyrës së Rregullatorit të Energjisë. (Kuvendi i Kosovës, salla N10, ora 11:00)
    
- Kryetari i Gjilanit, Alban Hyseni, së bashku me përfaqësuesit e grupeve të qytetarëve organizon ceremoninë për nënshkrimin e Agjendës së Kontratës Sociale për Gjilanin, që është zotim i përbashkët nëpërmjet zyrtarëve të Komunës dhe qytetarëve për të përmirësuar komunikimin, bashkëpunimin dhe veprimet kolektive. (Shkolla e Mesme e Muzikës, Gjilan, ora 12:00)
    
- Ministri i Mjedisit, Planifikimit Hapësinor dhe Infrastrukturës, Liburn Aliu, raporton në Komisionin për Mjedis, Ushqim, Bujqësi, Planifikim dhe Zhvillim. Temë diskutimi është plani Hapësinor i Parkut Kombëtar “Bjeshkët e Nemuna”. (Kuvendi i Kosovës, salla N302, ora 13:00)

- Kryetari i Komunës së Preshevës, Shqiprim Arifi, do të dorëzojë Kallëzim Penal në Prokurorinë Speciale në Prishtinë, për keqpërdorimin e mjeteve të Qeverisë së Kosovës nga ana e Këshillit Kombëtar Shqiptar. (Ndërtesa e Prokurorisë, ora 14:00)  
    
- Një delegacion i ambasadorëve të shteteve të QUINT-it në selinë e OSBE-së në Vjenë të Austrisë, vizitojnë Akademinë e Kosovës për Siguri Publike. I pranishëm do të jetë dhe ministri i Punëve të Brendshme, Xhelal Sveçla. (Akademia për Siguri Publike, Vushtrri, ora 14:25)