09 Dhjetor 2022

'Kosova në Fokus' në Festivalin e filmit në Lublanë

Lublanë, 18 nëntor - Kosova po merr vëmendje të veçantë në edicionin e sivjetmë të festivalit ndërkombëtar të filmit në Lublanë, i cili ka filluar më 9 nëntor 2022 dhe do të përmbyllet më datën 20 nëntor.

Përveç shfaqjes së filmave, festivali i Lublanës organizoi edhe një numër diskutimesh pas shfaqjeve, duke përfshirë edhe diskutimin Kinemaja Bashkëkohore e Kosovës, ku morën pjesë regjisorja Kaltrina Krasniqi dhe drejtuesi i Qendrës Kinematografike të Kosovës, Lum Çitaku.

Përgjatë festivalit, Çitaku dha një numër intervistash për televizionet dhe radiot sllovene dhe u takua me homologen sllovene nga Qendra e Filmit e Sllovenisë, Natasa Bucar dhe me drejtorin e Festivalit të Lublanës, Simon Popek. Në Lublanë Çitaku vizitoi edhe studion shtetërore të produksionit Viba film.

Në kuadër të “Kosova në fokus” u shfaqën filmat kosovar të metrazhit të gjatë “Vera andrron detin” nga Kaltrina Krasniqi, premierë sllovene, “Zgjoi” nga Blerta Basholli, “Martesa” nga Blerta Zeqiri, “Në kërkim të Venerës” nga Norika Sefa, propozimi i Kosovës për OSCARS 2023, dhe “Luaneshat e kodrës” nga Luàna Bajrami, të mbështetur nga QKK.

Nga filmat e metrazhit të shkurtër të mbështetur nga QKK u shfaqën “Pa vend” dhe “Në mes” nga Samir Karahoda dhe “Gardhi” nga Lendita Zeqiraj”.

 "Kosova në fokus" shfaqi edhe prodhime të pavarura të autorëve nga Kosova si “Zgjedhe një emër” nga Dritëro Mehmetaj, “Një muaj” nga Zgjim Terziqi dhe "These sounds taste synthetic” nga Gretel Dani.
 

Kalendari

Ngjarjet e datës 9 dhjetor 2022 - Kryeministri i Republikës së Kosovës, Albin Kurti, presidentja Vjosa Osmani-Sadriu dhe kryetari i Kuvendit, Glauk Konjufca, marrin pjesë në dëgjimin publik për Projektligjin për Liritë Fetare. (Ndërtesa e Qeverisë, ora 9:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit shqyrton Raportit për Projektligjin Agjencinë Kosovare për Krahasim dhe Verifikim të Pronës, Projektligjin për Bujqësi dhe Zhvillim Rural, etj. (Ndërtesa e Kuvendit, salla N302, ora 9:30)

- Komisioni për të Drejtat dhe Interesat e Komuniteteve dhe Kthim shqyrton Projektligjin për parandalimin dhe kontrollin e integruar të ndotjes, me raport amendamente të Komisionit funksional për Mjedis, Ushqim, Bujqësi, Planifikim dhe Zhvillim, etj. (Ndërtesa e Kuvendit, salla N10, ora 9:45)

- Instituti i Kosovës për Drejtësi organizon konferencë për media, ku do të publikohet raporti me titull “Qeverisja me duar të pastërta”, raport ky mbi deputetët, ministrat dhe kryetarët e komunave, të cilët kanë probleme me ligjin. (Hotel Sirius, ora 10:00)

- Gjykata Kushtetuese organizon “Ditën e Gjykatës së Hapur” në shënim e Ditës Ndërkombëtare të të Drejtave të Njeriut. (Gjykata Kushtetuese, ora 10:00)

- Për të shënuar 9 dhjetorin, Ditën Ndërkombëtare kundër Korrupsionit, Koalicioni i Organizatave të Shoqërisë Civile dhe Mediave, do të mbajnë një konferencë me temën “Fuqizimi i Kapaciteteve të Shoqërisë Civile për luftimin e korrupsionit”. (Hotel Sirius, ora 10:00)

- Kuvendi i Republikës së Kosovës vazhdon seancën plenare. (Kuvendi i Kosovës, ora 10:00)

- Ministrja e Drejtësisë, Albulena Haxhiu bashkëbisedon me studentët e Kolegjit AAB për temën mbi dhunën në bazë gjinore. (Kolegji AAB, ora 10:30)

- Rreth 60 punëtor teknik dhe ata te sigurimit fizik qe punojnë në Qendrat e Mjekësisë Familjare disa shkolla te Prishtinës  do te protestojnë me kërkesën për rritje të pagave. (Para komunës se Prishtinës, ora 11:00)

- Këshilli Rinor Kosovar organizon Kuvendin Zgjedhor të Këshillit të Nxënësve të Kosovës në nivel vendi. (Amfiteatri i Ministrisë së Drejtësisë, ora 13:00)

- Instituti i Kosovës për Drejtësi organizon aktivitet me studentët e Klinikës Ligjore të IKD– së, ku do të bëhet prezantimi i shpalljes së simuluar të një aktgjykimi të një rasti të korrupsionit. (Sheshi Skënderbeu në Prishtinë, ora 13:30)

- Lidhja Demokratike e Kosovës mban konferencë për medie. (Selia qendrore e LDK-së, ora 13:30)

- Ministrja e Drejtësisë, Albulena Haxhiu merr pjesë në një tryezë me gratë në Komunën e Mitrovicës. (Restaurantin "Va Piano", ora 15:00)

- Me rastin e 5 vjetorit të ndarjes nga jeta të artistit, Blerim Peci, Komuna e Mitrovicës, në bashkëpunim me artistë, familjarë e miq të ish të ndjerit organizojnë takimin përkujtimor për të ndarë së bashku kujtime të bukura e të pashlyeshme për të. (Qendra e Kulturës "Rexhep Mitrovica", ora 17:00)

- Ministrja e Drejtësisë, Albulena Haxhiu merr pjesë në shfaqjen e filmit "Zgjoi". (Kino Armata, ora 17:00)