27 Janar 2023

Gjilani mban debat publik për riorganizimin e manifestimit “Flaka e Janarit 2023”

Gjilan, 19 korrik - Me iniciativë të kryetarit të Gjilanit, Alban Hyseni, është mbajtur debati publik me komunitetin artistik për riorganizimin e manifestimit mbarëkombëtar kulturor “Flaka e Janarit 2023”.

Qëllimi i këtij debati ka qenë për të diskutuar lidhur me mënyrën, konceptin e organizimit e zgjidhjen e problemeve me të cilat janë ballafaquar në të kaluarën.

Kryetari Hyseni ka thënë me këtë rast se angazhimi i përbashkët në rritjen e vlerës së këtij manifestimi kulturor mbarëkombëtar është i një rëndësie të veçantë.

“Ideja është që organizimet që na presin në të ardhmen edhe të shkojnë mirë e edhe të mos kemi probleme, por edhe t’i japim vlerë shtesë manifestimit, i cili ka vite po aq sa unë. Për mua si kryetar i Komunës me moshë të re, është vlerë e veçantë që e kam mundësinë që të vazhdojë organizimin e një manifestimi të tillë, pjesë e të cilit jeni shumë prej jush që nga fillimi”, thënë kreu i Gjilanit.

Ai ka paralajmëruar edhe një debat publik të radhës që do të jetë i përgjithshëm, sikurse edhe debate për secilën shtyllë.

“Përveç diskutimit të përgjithshëm për formën dhe konceptin e organizimit, ne kemi menduar që të organizojmë edhe dëgjime të tjera publike për secilën shtyllë, veç e veç, ku e kemi mundësinë që t’i diskutojmë problemet e sfidat dhe mundësitë se si ta avancojmë edhe më tutje “Flakën e Janarit”, duke e ditur se është aktiviteti i vetëm kulturor që ka përmasa përtej komunës e vendit tonë”, ka shtuar kryetari Hyseni.

Drejtori i Kulturës, Rinisë dhe Sportit, Kushtrim Zeqiri, ka thënë se DKRS ka propozuar riorganizimin e “Flakës së Janarit” përmes një koncept-dokumenti, i cili do të plotësohet nëpërmjet diskutimit me komunitetin artistik të të gjitha shtyllave të këtij manifestimi.

Në fund, kryetari Hyseni dhe drejtori Zeqiri kanë falënderuar komunitetin artistik për pjesëmarrjen dhe kontributet në këtë debat, duke konfirmuar se të gjitha idetë e propozimet e tyre do të merren parasysh, në mënyrë që organizimi i manifestimit “Flaka e Janarit 2023” të bëhet në nivel sa më të lartë, në të gjitha shtyllat. ​
 

Kalendari

Ngjarjet e datës 27 janar 2023

 - Mbahet dita e dytë e konferencës Ndërkombëtare për Siguri Siguri Kinernetike “Cyber Zero” në të cilën diskutohet sulmet online dhe kërcenimet në sigurinë kibernetike. (Klan Arena, ora 9:00)
    
- Bordi i Komisionit të Pavarur për Miniera dhe Minerale raporton në Komisionin për Ekonomi, Industri, Ndërmarrësi dhe Tregti lidhur me vendimin për lirimin nga obligimi për rentën minerare për ndërmarrjen “Ferronikeli”. (Kuvendi i Kosovës, C203, ora 10:00)
    
- Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione takohet me përfaqësues të OJQ-së “Zëri i Romëve, Ashkalinjve dhe Egjiptasve”. (Kuvendi i Kosovës, salla N10, ora 10:00)
    
- Ministri i Financave Punës dhe Transfereve, Hekuran Murati, raporton në Komisionin për Buxhet, Punë dhe Transfere, lidhur me vendimin për rritjen e vlerës së faturave të tatimit në pronë. (Kuvendi i Kosovës, C203, ora 13:30)
    
- Në Akademinë e Kosovës për Siguri Publike (AKSP) mbahet ceremonia e diplomimit të gjeneratës së 42 të kadetëve të Shërbimit Korrektues të Kosovës (SHKK). Merr pjesë ministrja e Drejtësisë, Albulena Haxhiu etj. (Ndërtesa e re e Fakultetit të Sigurisë Publike në AKSP, Vushtrri, ora 13:30)
    
- Universiteti Publik “Kadri Zeka” në Gjilan do të nderojë me çmimin “Doctor Honoris Causa” anëtarin e Parlamentit Evropian, Lukas Mandl. (Teatri i Qytetit, Gjilan, ora 15:00)