09 Shkurt 2023

Filloi turneu ‘Muzikë n’Teatër’ nga Shpat Deda

Prishtinë, 6 dhjetor - Në mesin e kamerave që luftonin për hapësirë dhe publikut që mezi priste të fillonte programi, e hëna e 5 dhjetorit u shënua me sallën e stërmbushur të Amfiteatrit të Teatrit Kombëtar të Kosovës në Prishtinë ku filloi turneu ‘Muzikë n’Teatër’ i kantautorit Shpat Deda. Ishte një mbrëmje magjike me figura të spikatura të Kosovës në mesin e të pranishmëve e cila do të jehojë për një kohë të gjatë në kujtimet më të bukura të kryeqytetit.

Skena e hapur, audienca e hipnotizuar përreth saj, instrumentet e bukura muzikore dhe ndërveprimet magjepsëse në mes të tyre e shndërruan këtë performansë të Shpat Dedës, shoqëruar mjeshtërisht nga Visar Kuçi e Tomor Kuçi, në një koncert autorial që i prek nivelet më të larta artistike.  

Dymbëdhjetë këngët e performuara ishin një udhëtim ëndërrash për secilin të pranishëm, ku këngët e albumit ‘Rrugës’ nga Shpat Deda dhe disa nga hitet e tij të pavdekshme erdhën në një formë krejtësisht të re dhe të freskët për publikun kryeqytetas.

Shpati, tanimë një kantautor i  kompletuar dhe i dëshmuar i skenës me mbi tridhjetë këngë origjinale të publikuara në tre albume përgjatë 15 viteve të fundit, shkëlqeu në një dritë të re ku vinte në shprehje përvoja e tij e gjatë në skenë, zotërimi i pakontestueshëm i saj dhe një pjekje e theksuar artistike.

Ishte një mbrëmje ndryshe prej çkado që ka servuar skena e kryeqytetit në vitet e pasluftës, dhe një festë e origjinalitetit dhe virtuozitetit kryeqytetas nën lojën e këtyre tre artistëve të mahnitshëm, ndërsa dëshmia më e mirë për këtë janë duartrokitjet e pandalshme dhe brohoritjet frenetike të të pranishmëve.

Pas Prishtinës, turneu ‘Muzikë n’Teatër’ do të vazhdojë edhe në skenat teatrale të pesë qyteteve të ndryshme të Kosovës. Pas një koncerti të tilë në Prishtinë, një gjë është e sigurt: datat e këtij turneu assesi nuk bën të humben sepse muzika n’teatër është një magji që nuk harrohet.
 

Kalendari

Ngjarjet e datës 9 shkurt 2023

- Kuvendi i Republikës së Kosovës mban seancë plenare. (Kuvendi i Kosovës, ora 10:00)

- Këshilli Gjyqësor i Kosovës mban mbledhjen e radhës. (Objekti i KGJK-së, ora 10:00)

- Ministri i Shëndetësisë, Arben Vitia, viziton Komunën e Podujevës, ku do të pritet nga kryetari Shpejtim Bulliqi. (Podujevë, ora 10:00)

- Ministri i Shëndetësisë, Arben Vitia, dhe kryetari i Podujevës, Shpejtim Bulliqi, do të përurojnë Qendrën e Mjekësisë Familjare në Gllamnik. (Fshati Gllamnik, Podujevë, ora 11:00)  

- Komuna e Prizrenit nënshkruan Agjendën e Kontratës Sociale për Prizrenin, që është zotim i përbashkët i Komunës dhe qytetarëve për përmirësimin e komunikimit, bashkëpunimit dhe veprimeve kolektive. (Këndi Amerikan në Prizren, ora 11:00)

- Federata e Boksit organizon ceremoninë e ndarjes së çmimeve “Laureatët e viti 2022”. (Hotel Sirius, ora 17:00)