27 Janar 2023

MCC përuron disa nga investimet në Kosovë në fushën e energjisë

Prishtinë, 18 tetor - Korporata Sfidat e Mijëvjeçarit (MCC) ka përuruar disa nga investimet në Kosovë në fushën e energjisë.

Drejtoresha ekzekutive e Korporatës amerikane Sfidat e Mijëvjeçarit, Alice Albright tha të martën se qasja në burime të besueshme të energjisë është pjesë thelbësore e zbutjes së varfërisë dhe rritjes ekonomike.

Ajo i bëri këto komente në Prishtinë ku mori pjesë në përurimin një projekti të financuar nga kjo korporatë për rinovimin e pesë rrokaqiejve duke siguruar shkallë më të mirë izolimi dhe kursimi të energjisë.

“Qasja e besueshme në energji është një pjesë thelbësore e jetesës bashkëkohore dhe elementi kryesor i zbutjes së varfërisë, rritjes ekonomike dhe përmirësimit të standardit të jetesës. Por, fatkeqësisht kërkesa në Kosovë për energji elektrike të besueshme po tejkalon mundësitë e furnizimit me të”, tha zonja Albright.

Ambasadori amerikan në Prishtinë, Jeff Hovenier tha se Kosova po përballet me krizë energjetike dhe për të tejkaluar atë në periudhën afatgjate duhet të investojë në burime tjera të energjisë.

“Siç e dimë të gjithë, kriza energjetike në Evropë po prek shtetet si Kosova ku kërkesa tejkalon prodhimin vendor dhe kjo na shtynë edhe më shumë që të përqendrohemi në problemet që shfaqen për shkak të mungesës së infrastrukturës dhe mbështetja në qymyr, mbi burimet tjera të energjisë”, tha ai.

Ministrja e Ekonomisë, Artane Rizvanolli tha se Shtetet e Bashkuara vazhdojnë të mbesin partnerët kryesorë në sektorin e energjisë.

“Investimet e tilla janë tepër të rëndësishme posaçërisht në një kohë të tillë sfiduese, kur çmimet e energjisë janë kaq të larta dhe kursimi i energjisë është bërë kaq i rëndësishëm. Investimet e tilla kanë përfitime të shumëfishta, për banorët, shtetin dhe mjedisin”, tha ajo.

Më 28 korrik Shtetet e Bashkuara dhe Kosova nënshkruan në Uashington marrëveshjen e programit kompakt të Korporatës amerikane Sfidat e Mijëvjeçarit përmes së cilës pritet të investohen mbi 236 milionë dollarë në sektorin e energjisë. 202 milionë do të sigurohen nga qeveria amerikane.

Qëllimi i ndihmës financiare amerikane është të sigurohet pavarësia e sektorit të energjisë në Kosovë, pëfshirë ruajtjen e energjisë elektrike për periudha kur nevoja është më e madhe, sidomos gjatë stinës së dimrit.

Aktualisht Kosova është e varur nga termocentralet me qymyr të cilat prodhojnë rreth 95 për qind të energjisë së përgjithshme të vendit, dhe, sipas ekspertëve, në stinën e dimrit kërkesat e mëdha për energji nuk mund të përmbushen nga kapacitetet aktuale prodhuese të vendit.

Kalendari

Ngjarjet e datës 27 janar 2023

 - Mbahet dita e dytë e konferencës Ndërkombëtare për Siguri Siguri Kinernetike “Cyber Zero” në të cilën diskutohet sulmet online dhe kërcenimet në sigurinë kibernetike. (Klan Arena, ora 9:00)
    
- Bordi i Komisionit të Pavarur për Miniera dhe Minerale raporton në Komisionin për Ekonomi, Industri, Ndërmarrësi dhe Tregti lidhur me vendimin për lirimin nga obligimi për rentën minerare për ndërmarrjen “Ferronikeli”. (Kuvendi i Kosovës, C203, ora 10:00)
    
- Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione takohet me përfaqësues të OJQ-së “Zëri i Romëve, Ashkalinjve dhe Egjiptasve”. (Kuvendi i Kosovës, salla N10, ora 10:00)
    
- Ministri i Financave Punës dhe Transfereve, Hekuran Murati, raporton në Komisionin për Buxhet, Punë dhe Transfere, lidhur me vendimin për rritjen e vlerës së faturave të tatimit në pronë. (Kuvendi i Kosovës, C203, ora 13:30)
    
- Në Akademinë e Kosovës për Siguri Publike (AKSP) mbahet ceremonia e diplomimit të gjeneratës së 42 të kadetëve të Shërbimit Korrektues të Kosovës (SHKK). Merr pjesë ministrja e Drejtësisë, Albulena Haxhiu etj. (Ndërtesa e re e Fakultetit të Sigurisë Publike në AKSP, Vushtrri, ora 13:30)
    
- Universiteti Publik “Kadri Zeka” në Gjilan do të nderojë me çmimin “Doctor Honoris Causa” anëtarin e Parlamentit Evropian, Lukas Mandl. (Teatri i Qytetit, Gjilan, ora 15:00)