09 Dhjetor 2022

Përkrahja e ndërmarrësisë faktor kyç për zhvillimin ekonomik të vendit

Prishtinë, 18 nëntor - Ministria e Industrisë, Ndërmarrësisë dhe Tregtisë (MINT) ka organizuar një bashkëbisedim me ndërmarrësit vendorë dhe palët e tjera të interesit, me temën: “Ndërmarrësia dhe Rritja e Qëndrueshme Ekonomike”.

Në shënjim të Javës Globale të Ndërmarrësisë, MINT ka organizuar këtë ngjarje me qëllim të diskutimit me ndërmarrësit vendorë, shoqatat industriale dhe akademinë, për politikat dhe instrumentet përkrahëse qeveritare për ndërmarrjet fillestare, të vogla dhe të mesme, gjersa sektori privat është kontribuues kryesor për rritjen e qëndrueshme ekonomike.

Ministrja e Industrisë, Ndërmarrësisë dhe Tregtisë, Rozeta Hajdari, e cila që prej marrjes së mandatit, ka punuar vazhdimisht për zhvillimin e hovshëm të ndërmarrësisë në Republikën e Kosovës, ka thënë se fusha e ndërmarrësisë ka rëndësi të madhe dhe vendimtare për rritjen e qëndrueshme ekonomike të vendit.

‘Unë personalisht besoj në ju ndërmarrësit tanë, sepse ju jeni ata që mund të ndryshoni mënyrën se si jetojmë dhe punojmë. Me sukseset dhe revolucionet e juaja, ju përveçse krijoni pasuri nga ndërmarrësia, ju krijoni edhe vende pune dhe kushte për një shoqëri të lulëzuar dhe ekonomi të qëndrueshme në Republikën tonë. Për më shumë, ju jeni liderët e inovacionit teknologjik, që sjellin në treg produkte apo shërbime inovative dhe teknologji të re, që kontribuojnë në rritjen e konkurrueshmërisë së juaj në treg  dhe arritjen e synimit tonë për transformim të industrisë vendore, në një industri më të integruar globalisht’ theksoi Ministrja.

Gjersa zhvillimi i ndërmarrësisë nxit inovacionin, krijon vende pune dhe kontributet e ndërmarrësve mbrojnë sistemin social, ministrja Hajdari theksoi se zhvillimi i ndërmarrësisë është në fokus të Programit të Qeverisë së Kosovës dhe Ministrisë së Industrisë, Ndërmarrësisë dhe Tregtisë.

Duke i njoftuar të pranishmit për proceset e hartimit të politikës kombëtare për zhvillim industrial, inovacion dhe ndërmarrësi nën udhëheqjen e MINT, ajo sjelli në vëmendje se shkëmbimi i ngushtë dhe i vazhdueshëm midis politikës dhe biznesit është thelbësor, veçanërisht tani në këto kohë sfiduese, pasi kostot socio-ekonomike po bëhen gjithnjë e më të dukshme, si shkak i rritjes së çmimeve të energjisë, zinxhirët e ndërprerë të furnizimit, varësitë e dhimbshme për lëndët e para, të cilat ndërmarrjet tona po i përjetojnë drejtpërdrejt.

Në këtë ngjarje, të pranishmit u njoftuan me gjerësisht për sektorët kryesorë industrialë të analizuar nga perspektiva e zingjirit të vlerës, nga drejtoresha e Departamentit të Industrisë, znj. Valbona Dushi dhe për hartimin e ligjit për inovacion dhe ndërmarrësi, nga drejtoresha e Departamentit të Inovacionit, znj Laura Zherka, si dhe për instrumentet përkrahëse për ndërmarrjet fillestare, të vogla dhe të mesme nga u.d kryeshefit të Agjencisë KIESA, Zef Dedaj. Në diskutim e sipër me ndërmarrësit, rektori i UBT-së, prof.dr. Edmond Hajrizi, ka shtjelluar rëndësinë e konceptit të ekosistemit si dhe efektin e madh që mund të krijojë ky ekosistem në shoqëri.

Bashkëbisedimet me ndërmarrësit, nga ministrja Hajdari me kolegë dhe të ftuarit në panel nga akademia, sektori privat dhe expertizës për inovacion dhe ndërmarrësi nga GIZ, vazhduan me reflektime të sinqerta në çështjet e ngritura lidhur me barrierat administrative për të bërit biznes dhe përparësitë për krijimin e bashkëpunimeve të strukturuara dhe të vazhdueshme në mes sektorit publik dhe privat, me qëllim të rritjes së konkurrueshmërisë se ndërmarrjeve vendore dhe zhvillimit te qëndrueshëm socio ekonomik.
 

Kalendari

Ngjarjet e datës 9 dhjetor 2022 - Kryeministri i Republikës së Kosovës, Albin Kurti, presidentja Vjosa Osmani-Sadriu dhe kryetari i Kuvendit, Glauk Konjufca, marrin pjesë në dëgjimin publik për Projektligjin për Liritë Fetare. (Ndërtesa e Qeverisë, ora 9:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit shqyrton Raportit për Projektligjin Agjencinë Kosovare për Krahasim dhe Verifikim të Pronës, Projektligjin për Bujqësi dhe Zhvillim Rural, etj. (Ndërtesa e Kuvendit, salla N302, ora 9:30)

- Komisioni për të Drejtat dhe Interesat e Komuniteteve dhe Kthim shqyrton Projektligjin për parandalimin dhe kontrollin e integruar të ndotjes, me raport amendamente të Komisionit funksional për Mjedis, Ushqim, Bujqësi, Planifikim dhe Zhvillim, etj. (Ndërtesa e Kuvendit, salla N10, ora 9:45)

- Instituti i Kosovës për Drejtësi organizon konferencë për media, ku do të publikohet raporti me titull “Qeverisja me duar të pastërta”, raport ky mbi deputetët, ministrat dhe kryetarët e komunave, të cilët kanë probleme me ligjin. (Hotel Sirius, ora 10:00)

- Gjykata Kushtetuese organizon “Ditën e Gjykatës së Hapur” në shënim e Ditës Ndërkombëtare të të Drejtave të Njeriut. (Gjykata Kushtetuese, ora 10:00)

- Për të shënuar 9 dhjetorin, Ditën Ndërkombëtare kundër Korrupsionit, Koalicioni i Organizatave të Shoqërisë Civile dhe Mediave, do të mbajnë një konferencë me temën “Fuqizimi i Kapaciteteve të Shoqërisë Civile për luftimin e korrupsionit”. (Hotel Sirius, ora 10:00)

- Kuvendi i Republikës së Kosovës vazhdon seancën plenare. (Kuvendi i Kosovës, ora 10:00)

- Ministrja e Drejtësisë, Albulena Haxhiu bashkëbisedon me studentët e Kolegjit AAB për temën mbi dhunën në bazë gjinore. (Kolegji AAB, ora 10:30)

- Rreth 60 punëtor teknik dhe ata te sigurimit fizik qe punojnë në Qendrat e Mjekësisë Familjare disa shkolla te Prishtinës  do te protestojnë me kërkesën për rritje të pagave. (Para komunës se Prishtinës, ora 11:00)

- Këshilli Rinor Kosovar organizon Kuvendin Zgjedhor të Këshillit të Nxënësve të Kosovës në nivel vendi. (Amfiteatri i Ministrisë së Drejtësisë, ora 13:00)

- Instituti i Kosovës për Drejtësi organizon aktivitet me studentët e Klinikës Ligjore të IKD– së, ku do të bëhet prezantimi i shpalljes së simuluar të një aktgjykimi të një rasti të korrupsionit. (Sheshi Skënderbeu në Prishtinë, ora 13:30)

- Lidhja Demokratike e Kosovës mban konferencë për medie. (Selia qendrore e LDK-së, ora 13:30)

- Ministrja e Drejtësisë, Albulena Haxhiu merr pjesë në një tryezë me gratë në Komunën e Mitrovicës. (Restaurantin "Va Piano", ora 15:00)

- Me rastin e 5 vjetorit të ndarjes nga jeta të artistit, Blerim Peci, Komuna e Mitrovicës, në bashkëpunim me artistë, familjarë e miq të ish të ndjerit organizojnë takimin përkujtimor për të ndarë së bashku kujtime të bukura e të pashlyeshme për të. (Qendra e Kulturës "Rexhep Mitrovica", ora 17:00)

- Ministrja e Drejtësisë, Albulena Haxhiu merr pjesë në shfaqjen e filmit "Zgjoi". (Kino Armata, ora 17:00)