12 Gusht 2022

Një në gjashtë vetë rrezikohen nga varfëria në Gjermani

Berlin, 5 gusht - Vitin e kaluar, në Gjermani ishin në rrezik për të rënë në varfëri rreth 13 milionë vetë.

Zyra Federale e Statistikave të Gjermanisë ka njoftuar se mbi të gjitha janë të prekura familjet me një prind dhe personat që jetojnë vetëm.

Numri i njerëzve në rrezik të varfërisë në Gjermani ra vetëm pak në vitin 2021. Siç raportohet nga Zyra Federale e Statistikave, vitin e kaluar nga varfëria u rrezikuan rreth 13 milionë vetë.

Kjo korrespondon me 15.8 për qind të popullsisë dhe ose me afërsisht një në gjashtë qytetarë që jetojnë në Gjermani. Në vitin 2020, kjo shifër ishte 16.1 për qind me 13.2 milionë vetë.

Sipas përkufizimit të BE, një person konsiderohet i rrezikuar nga varfëria kur ka më pak se 60 për qind të të ardhurave mesatare të të gjithë popullsisë.

Në vitin 2021, ky prag ishte 15.009 euro neto në vit për një person që jeton vetëm në Gjermani, dhe 31.520 euro neto për dy të rritur me dy fëmijë nën moshën 14 vjeç.

Në varësi të llojit të familjes, numri i njerëzve që jetojnë në familje me një prind dhe i njerëzve që jetojnë vetëm dhe që rrezikohen nga varfëria është dukshëm më i lartë se mesatarja kombëtare.

Në vitin 2021, më shumë se një e katërta e njerëzve që jetonin në familje me një prind (26.6%) kërcënoheshin nga varfëria. Për njerëzit që jetojnë vetëm, kjo shifër ishte 26.8 për qind.

Për njerëzit që jetojnë në familje të përbëra nga dy të rritur dhe një fëmijë (9.0%) ose me dy fëmijë (11.4%) si dhe për familjet e përbëra nga dy të rritur pa fëmijë (11.5%), shkalla e rrezikimit nga varfëria në vitin 2021 ishte më e ulët se mesatarja kombëtare.

Në të kundërt, njerëzit që jetonin në një familje me dy të rritur me tre ose më shumë fëmijë kishin një shkallë të rrezikimit nga varfëria prej 23.6 përqind, dukshëm më e lartë se mesatarja kombëtare.

Me 16.2 për qind, fëmijët dhe të rinjtë në Gjermani ishin më të rrezikuar nga varfëria se mesatarja.

Vitin e kaluar, bazuar në statusin mbizotërues të aktivitetit të personave 18 vjeç e lart, pothuajse një në dy persona rrezikohej nga varfëria në grupin e të papunëve, ose 47.0 për qind. Nga ana tjetër, ky proporcion ishte vetëm 8,6% tek ata që kryenin një veprimtari profesionale.

Për pensionistët, shkalla e rrezikut nga varfëria ishte 19.3 për qind. Në mesin e grave të moshës 65 vjeç e lart, rreziku i varfërisë ishte dukshëm më i lartë në vitin 2021 (21.0%) sesa tek burrat në të njëjtën grupmoshë (17.4%).

 Të ardhurat më të ulëta të grave në krahasim me burrat shpjegohen, për shembull, me ndërprerjen e karrierës profesionale dhe rrjedhimisht me të drejtat më të ulëta të pensionit, shpjegoi Zyra Federale e Statistikave.

Gjithsej 16.5 për qind e femrave dhe 15.1 për qind e meshkujve rrezikoheshin nga varfëria në vitin 2021./DW

 

Kalendari

Ngjarjet e datës 12 gusht 2022

 - Kryeministri i Republikës së Kosovës, Albin Kurti, bashkë me ministrin e Financave, Punës dhe Transfereve, Hekuran Murati, vizitojnë Doganën e Kosovës. (Drejtoria e Doganës, ora 8:30)

- Kuvendi nëpërmjet Grupit të Deputetëve të Rinj shënon Ditën Ndërkombëtare të Rinisë. (Salla plenare, ora 10:00)

- Komuna e Rahovecit organizon takimet B2B në kuadër të aktiviteteve të Muajit të Mërgimtarëve. (Restaurant Ura e Shenjtë, ora 10:00)

- Nisma e të Rinjve për të Drejtat e Njeriut – Kosovë ((YIHR KS) shënon Ditën Ndërkombëtare të Rinisë me një aksion rrugor me slloganin “Kur bohet mirë?!” (Sheshi “Nënë Tereza”, ora 12:00)

- Avokati i familjes Dehari, Tomë Gashi, mban konferencë për medie në lidhje me rastin e vdekjes së aktivistit të VV-së, Astrit Dehari. (Zyrat e Tomë Gashit, mbi Kino ABC, ora 12:00)

- Kryeministri i Republikës së Kosovës, Albin Kurti, bashkë me ministrin e Financave, Punës dhe Transfereve, Hekuran Murati, vizitojnë kompaninë “Rroni Fer” Sh.P.K. (Magjistralja Gjakovë-Prizren_kilometri i dytë, Objekti i ish-ndërmarrjes “Metaliku”, Gjakovë, ora 14:30)

- Qendra për Këshillim, Shërbime Sociale dhe Hulumtime organizon Festivalin e Rinisë për nder të Ditës së Rinisë. (Lagjja Taukbashqe, ora 18:00)

- Mbahet edicioni i parë i festivalit “MAL FEST”, i cili synon të jetë tradicional dhe objektiv e ka rininë dhe mërgatën e Komunës së Malishevës. Festivali organizohet nga Komuna e Malishevës në bashkëpunim me  organizatën “Values for Better Future”.(parku i qytetit në Malishevë, ora 19:00)

- Në kuadër të Akademisë Verore ‘’Arbën Xhaferi"  mbahet panel diskutimi me deputetët e rinjë të Kuvendit të Kosovës lidhur me rolin dhe rëndesin e të rinjëve në politikë. (Akademia për Siguri Publike të Kosovës, ora 19:30)