06 Shkurt 2023

LDK, PDK dhe AAK prijnë me punësime në ndërmarrjet publike

Prishtinë, 7 dhjetor - Organizata Çohu në kuadër të Javës Kundër Korrupsionit, ka publikuar hulumtimin “Zaptimi i vazhdueshëm”, ku janë paraqitur gjetjet se në sa prej pozitave të larta publike janë punësuar persona përmes konkurseve publike, e të cilët kanë lidhje me partitë politike.

Hulumtimi ka përfshirë periudhën 2017-2021. Të dhënat tregojnë se në këtë periudhë kohore, 222 zyrtarë publikë që janë të punësuar në pozita të larta publike kanë lidhje me partitë politike.

Pjesë e hulumtimit dhe verifikimit kanë qenë të gjithë zyrtarët e lartë publikë, të cilët e deklarojnë pasurinë në Agjencinë Kundër Korrupsionit (AKK).

Të dhënat tregojnë se varësisht se cila parti është në pushtet, e shfrytëzon mundësinë për shtrirjen e patronazhit politik në institucionet shtetërore. Kjo është faktuar edhe në dy hulumtimet paraprake që janë a realizuar lidhur me këtë dukuri.

Në 24 ndërmarrje publike, janë verifikuar të gjithë zyrtarët që e deklarojnë pasurinë dhe të dhënat e siguruara tregojnë se 105 zyrtarë të lartë kanë lidhje me partitë politike.

Nga hulumtimi ka rezultuar se në periudhën 2017-2021 me punësime në ndërmarrjet publike prijnë LDK dhe PDK me nga 30, AAK me 18, NISMA me 12, PSD me 3, AKR me 2, LVV me 5, si dhe SKS, PSHDK, PD, PLE dhe KDTP me nga një.

Pjesë e hulumtimit kanë qenë edhe institucionet e pavarura dhe sipas të dhënave 19 persona që kanë lidhje me partitë politike janë punësuar në pozita të rëndësishme vendimmarrëse në këto institucione.

Numrin më të madh të të punësuarve përmes konkursit në institucione publike, e ka PDK me 7 zyrtarë, pasuar nga LDK me 6, AAK ka 4 të tillë dhe nga një NISMA dhe AKR.

Edhe në ministri numri i zyrtarëve të lartë që janë përzgjedhur përmes konkurseve publike, e që kanë lidhje me partitë politike është shumë i lartë.

Hulumtimi ka ka gjetur se 96 zyrtarë të lartë që punojnë në ministri kanë lidhje me parti politike, prej tyre 38 janë nga PDK, 17 nga LDK, 16 nga AAK, 10 nga AKR, 7 nga NISMA, 2 nga LVV, 1 nga PSD, 1 nga PD, 2 nga Partia Demokratike Turke, 1 nga NDS.

Në këtë raport janë përfshirë edhe disa hulumtime të realizuara nga Çohu, ndër vite lidhur me politizimin e universiteteve publike. Në hulumtimin e realizuar në vitin 2016, rezulton se 70 profesorë të UP-së kanë qenë apo janë ende pjesë e politikës njëkohësisht. Ndërkaq, përgjatë viteve 2017-2021, Preportr ka identifikuar 10 profesorë që i janë bashkuar partive politike.

Në universitetet e tjera publike, atë të Prizrenit, Pejës, Gjilanit, Gjakovës, Mitrovicës, dhe Ferizajt, Preportr ka gjetur se në periudhën 2017-2021, në pozitat udhëheqëse në këto universitete janë përzgjedhur nëntë persona me prapavijë partiake.

Kalendari

Ngjarjet e datës 6 shkurt 2023

- Forumi Rinor i Lidhjes Demokratike të Kosovës do të organizoj një aksion si reagim ndaj skandalit të fundit me vende të punës në Arsim dhe akuzave publike për shitjen e vendeve të punës. (Para Komunës së Prizrenit, ora 9:30)
    
- Ministria e Financave, Punëve dhe Transfereve lanson Platformën për Punësim të të rinjve ku pjesëmarrës do të jenë Kryeministri, Albin Kurti, Ambasadori i Zvicrës, Thomas Kolly dhe Ministri, Hekuran Murati. (Hotel Sirius, ora 10:00)
    
- Mbahet mbledhja e Kryesisë së Kuvendit ku në rend dite është Interpelanca e Kryeministrit të Republikës së Kosovës, Albin Kurti. (Kuvendi i Kosovës, salla C301, ora 11:00)

- Kryesia e Parlamentit Studentor mban konferencë për media lidhur me organizimin e marshit kundër asociacionit. (Para Bibliotekës Kombëtare në Prishtinë, ora 11:00)

    Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione, takohet me përfaqësues të Komisionit Qeveritar për Persona të Zhdukur dhe Këshillit Koordinues të Familjarëve të Personave të  Zhdukur gjatë luftës në Kosovë. (Kuvendi i Kosovës, salla N302, ora 12:00)

 

- Kryeministri i Republikës së Kosovës, Albin Kurti dhe ministri i Financave, Punës dhe Transfereve, Hekuran Murati vizitojnë ndërmarrjen “Liri”, në Prizren. (Ndërmarrja "Liri", Prizren, ora 16:00)

 

- Kryetari i Kryeqytetit Përparim Rama së bashku me përfaqësuesit e grupeve të qytetarëve organizojnë ceremoninë e nënshkrimit të Agjendës për Kontratën Sociale për Kryeqytetin që është zotim i përbashkët ndërmjet zyrtarëve të komunës dhe qytetarëve për të përmirësuar komunikimin, bashkëpunimin dhe veprimet kolektive. (SHFMU “Ismail Qemajli”, Bregu i Diellit, ora 19:00)