27 Janar 2023

Prodhimet vendore nga toka e Kosovës në sofër të Evropës

Prishtinë, 4 gusht - Gjatë ditës së sotme, fermeri Mehdi Bresilla nga fshati Llugaxhi i komunës së Lipjanit po përgatit 200 tonë speca të llojit somborka për t’i eksportuar për në shtetin e Suedisë.

Ministri i Bujqësisë, Pylltarisë dhe Zhvillimit Rural, Faton Peci ishte i pranishëm në këtë aktivitet të z. Bresilla i cili po shënon edhe dërgesën e parë në drejtim të këtij shteti.

Duke parë për së afërmi punën dhe angazhimin e të gjithëve, Ministri Peci i përgëzoi për punën dhe njëkohësisht u shpreh se eksporti i produkteve tona vendore po shënon rritje çdo ditë e më shumë, për çka edhe jemi krenarë me punën e fermerëve tanë të cilët me zellin e tyre të vazhdueshëm po mbushin raftet e dyqaneve në mbarë Evropën me produkte kosovare.

Vitin e kaluar, fermeri Mehdi Bresilla përmes aktivitetit të tij bujqësor ka arritur që vetëm rendiment nga specat të vjelë rreth 170,000 kg.

Këtë vit, ai është i bindur se frytet e punës së tij do arrijnë 220,000 kg, ku nga kjo sasi 50,000 kg do të eksportohen të konservuara.

Në bashkëpunim me kompaninë “Alb Fresh” planifikon që të eksportojë edhe 100,000 kg lakër, kulturë të cilën e kultivon si kulturë të dytë pas korrjes së grurit.

Përveç kulturës së specit që zë një sipërfaqe prej 8.5ha dhe lakrës me 1 ha, ai kultivon edhe 5,2 ha me mollë, 9,3 ha me grurë, 8,7 ha me misër dhe 2,2 ha me dredhëz (e tëra e dedikuar për eksport).

z. Bresilla punëson 7 punëtorë të rregullt dhe rreth 40 punëtorë sezonal duke i kontribuar zhvillimit ekonomik të vendit dhe forcimit të ekonomive familjare në rrethin ku jeton.

 

Kalendari

Ngjarjet e datës 27 janar 2023

 - Mbahet dita e dytë e konferencës Ndërkombëtare për Siguri Siguri Kinernetike “Cyber Zero” në të cilën diskutohet sulmet online dhe kërcenimet në sigurinë kibernetike. (Klan Arena, ora 9:00)
    
- Bordi i Komisionit të Pavarur për Miniera dhe Minerale raporton në Komisionin për Ekonomi, Industri, Ndërmarrësi dhe Tregti lidhur me vendimin për lirimin nga obligimi për rentën minerare për ndërmarrjen “Ferronikeli”. (Kuvendi i Kosovës, C203, ora 10:00)
    
- Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione takohet me përfaqësues të OJQ-së “Zëri i Romëve, Ashkalinjve dhe Egjiptasve”. (Kuvendi i Kosovës, salla N10, ora 10:00)
    
- Ministri i Financave Punës dhe Transfereve, Hekuran Murati, raporton në Komisionin për Buxhet, Punë dhe Transfere, lidhur me vendimin për rritjen e vlerës së faturave të tatimit në pronë. (Kuvendi i Kosovës, C203, ora 13:30)
    
- Në Akademinë e Kosovës për Siguri Publike (AKSP) mbahet ceremonia e diplomimit të gjeneratës së 42 të kadetëve të Shërbimit Korrektues të Kosovës (SHKK). Merr pjesë ministrja e Drejtësisë, Albulena Haxhiu etj. (Ndërtesa e re e Fakultetit të Sigurisë Publike në AKSP, Vushtrri, ora 13:30)
    
- Universiteti Publik “Kadri Zeka” në Gjilan do të nderojë me çmimin “Doctor Honoris Causa” anëtarin e Parlamentit Evropian, Lukas Mandl. (Teatri i Qytetit, Gjilan, ora 15:00)