30 Nëntor 2022

Ministri Peci qëndroi për vizitë zyrtare në Lituani

Vilnius, 12 nëntor - Ministri i Bujqësisë, Pylltarisë dhe Zhvillimit Rural, Faton Peci me ftesë të homologut të tij lituanez, Ministrit të Bujqësisë, Kęstutis Navickas qëndroi për vizitë zyrtare dy-ditore në shtetin e Lituanisë.

Gjatë qëndrimit të tij në këtë shtet, Ministri Peci zhvilloi takime të shumta që kishin për qëllim thellimin e bashkëpunimit dhe ndarjes së përvojave mes dy shteteve në fusha të ndryshme sektoriale.

Gjatë takimit të tij me Ministrin e Bujqësisë së Lituanisë, Kęstutis Navickas, Ministri Faton Peci tha se bashkë me Navickas biseduam rreth thellimit të bashkëpunimit duke ndarë përvojat dhe ekspertizat me qëllim të ngritjes së kapaciteteve, sidomos në instrumentin për ndihmë parahyrëse për zhvillim rural të Bashkimit Evropian – IPARD, në avancimin e politikave, përafrimin e legjislacionit, si dhe procesin e dixhitalizimit.

“Biseduam për sigurinë globale ushqimore dhe shkëputjen e zinxhirit ushqimor në botë, si pasojë e agresionit Rus ndaj Ukrainës, me c’rast  kemi shkëmbyer edhe eksperiencat e dy vendeve tona. Lituania është një nga prodhuesit më të mëdhenj të drithrave dhe të grurit në botë për kokë banori, e aftë për të eksportuar grurë në sasi të konsiderueshme dhe me cilësi të jashtëzakonshme. Prandaj, edhe biseduam për mënyren e bashkëpunimit në këtë fushë, duke filluar nga fara e deri tek plehrat”, u shpreh Ministri Peci pas takimit me z. Navickas.

Në kuadër të kësaj vizite, Ministri i BPZhR-së, Faton Peci zhvilloi takim bilateral edhe me Ministrin e Ambientit të Lituanisë, Simonas Gentvilas, me ç’rast diskutuan për shumë çështje që ndërlidhen me sfidat mjedisore dhe menaxhimin më të mirë të pyjeve.

Ministri Peci pati rastin të theksoj përkushtimin e tij dhe përpjekjet e Qeverisë së Kosovës për të adresuar siç duhet dhe në kohë sfidat mjedisore dhe klimatike duke vënë në qendër të gjitha aktivitete ekonomike, zhvillimin e qëndrueshëm, efikasitetin e burimeve, mbrojtjen e natyrës, veprimin e klimës dhe përpjektjet e Qeverisë për t'i kthyer këto sfida në mundësi.  

“Ministrin z. Gentvilas e njoftova për përpjekjet e Ministrisë së Bujqësisë, Pylltarisë dhe Zhvillimit Rural në zbatimin e Marrëveshjes së Gjelbër Evropiane (EGD), kornizën e BE-së për klimën, Strategjinë e BE-së për Biodiversitetin, Strategjia e BE-së nga ferma në pirun, planin e veprimit për ndotje zero, si dhe ambiciet për vitin 2030 në përputhje me objektivat e ndërmjetme klimatike.

Pyjet në Lituani mbulojnë afërsisht 35% të territorit të saj dhe sot Lituania krahas vendeve të BE-së prinë në ruajtjen e ekosistemit dhe biodiversitetit pyjor. Prandaj, edhe biseduam për mundësitë e rritjes së bashkëpunimit mes dy shteteve tona si në ngritjen e kapaciteteve të Kosovës në planet menaxhuese, procesin e inventarizimit dhe krijimin e katastrit pyjorë të Kosovës”, tha Ministri Peci pas këtij takimi.

Ndërkohë, pas këtyre takimeve të një rëndësie të vëçantë, Ministri i BPZhR-së, Faton Peci premtoi se shumë shpejt produktet tona vendore do të jenë prezent në tregun e shtetit lituanez dhe njëkohësisht falënderoi për mikëpritjen homologun e tij Kęstutis Navickas, të cilin edhe e ftoi që një të ardhmen të afërt ta vizitojë Republikën e Kosovës dhe të njihet nga afër me potencialin zhvillimor që Kosova ofron.

Kalendari

Ngjarjet e datës 30 nëntor 2022

- Iniciative për Drejtësi dhe Barazi INJECT dhe Iniciativa Kosovare për Stabilitet IKS organizojnë diskutimin publik për iniciativat e reja ligjore për Mbrojtjen e Grave. (Hotel Sirius, ora 9:00)

- Kosova Women 4 Women  në bashkëpunim me Departamentin e Punës Sociale të Universitetit të Prishtinës organizon konferencën "Politikat në veprim kundër dhunës në baza gjinore". (Hotel Sirius, ora 9:00)

- Zëvendëskryeministër i parë për Integrim Evropian, Zhvillim dhe Dialog, Besnik Bislimi raporton para Komisionit për Integrim Evropian. (Ndërtesa e Kuvendit, salla N506, ora 10:00)

- Komisioni për Mbikëqyrjen e Agjencisë së Kosovës për Inteligjencë shqyrton kërkesën për shtim të mjeteve buxhetore për Agjencinë e Kosovës për Inteligjencë në Projektligjin për Buxhet për vitin 2023. (Ndërtesa e Kuvendit, salla N302, ora 10:00)

- Komisioni për të Drejtat e Njeriut, Barazi Gjinore, për Persona të Pagjetur, Viktimat e Dhunës Seksuale të Luftës dhe Peticione takohet me Fabian Salvioli raportues special i OKB-së për promovimin e së vërtetës, drejtësisë, dëmshpërblimit dhe garancive për mospërsëritje të shkeljeve të të drejtave të njeriut dhe të së drejtës ndërkombëtare. (Ndërtesa e Kuvendit, salla N10, ora 10:00)

- Agjencia e Punësimit në bashkëpunim me GIZ Kosova, Universitetin e Prishtinës dhe Oda Ekonomike Gjermano-Kosovare organizojnë ceremoninë e hapjes së edicionit të shtatë të Panairit Kombëtar të Punës, Karrierës dhe Ndërmarrësisë. (Salla “1 Tetori”, ora 10:00)

- Komisioni për Buxhet, Punë dhe Transfere shqyrton raportet lidhur me shqyrtimin e Projektligjit për Borxhin Shtetëror dhe Garancitë Shtetërore. (Ndërtesa e Kuvendit, salla C203, ora 10:00)

- Institutit për Politika Zhvillimore organizon edicionin e dytë të Forumit të OZhQ-ve me titull ‘Koordinimi në mes të nivelit lokal dhe qendror të qeverisjes për zbatimin e Agjendës 2030'. (Hotel Emerald, ora 10:00)

- Komuna e Rahovecit organizon konsultimin publik me qytetarë për planin e Mobilitetit Urban në Rahovec. (Hotel Park Plaza, ora 10:00)

- Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit shqyrton Projektligjin mbi ndarjet buxhetore për Buxhetin e Republikës së Kosovës për vitin 2023, nga fushëveprimi që mbulon Komisioni për Legjislacion. (Ndërtesa e Kuvendit, salla N204, ora 11:00)

- Aleanca Kosovare e Bizneseve mban Kuvendin e VIII Zgjedhor Qendror. (Hotel Amazona, ora 11:00)

- Mbahet seanca plenare e Kuvendit​ të Republikës së Kosovës në të cilën do të paraqitet në interpelancë me kryeministrin, Albin Kurti për çështjen: "Masat urgjente të Qeverisë së Republikës së Kosovës në raport mesituatën e krijuar në vend". (Kuvendi i Kosovës, ora 11:30)

- Ministrja e Drejtësisë, Albulena Haxhiu, së bashku me Ministren e Arsimit, Shkencës, Teknologjisë dhe Inovacionit, Arbërie Nagavci do të vizitojnë Komunën e Kamenicës me ç ‘rast do të​ takohen me Kryetarin, Kadri Rahimaj. (Komuna e Kamenicës, ora 12:30)

- Ministrja e Drejtësisë, Albulena Haxhiu, së bashku me Ministren e Arsimit, Shkencës, Teknologjisë dhe Inovacionit, Arbërie Nagavci do të vizitojnë Shkollën Fillore të Mesme të Ulët, "Xhavit Ahmeti" në fshatin Hodonoc, Komuna e Kamenicës. (Objekti i Shkollës në fshatin Hodonoc, ora 13:00)

- Komisioni Qendror i Zgjedhjeve mban mbledhjen e radhës. (Objekti i KQZ-së, ora 14:00)

- Ministrja e Drejtësisë, Albulena Haxhiu, së bashku me Ministren e Arsimit, Shkencës, Teknologjisë dhe Inovacionit, Arbërie Nagavci do të jenë afër grave që udhëheqin biznese, znj. Ibadete Sadiku, znj. Kadrije Mustafa dhe znj. Emine Kërhanaj. (Kamenicë, ora 15:00)